Read Khoekhoegowab Numeri 11 Bible Online

Numeri 11 - Khoekhoegowab bible

Numeri 11

¹Tsî i ge ge ī, ǁaes ge ǀara ǃnubai i ge ǂkhaba ge i ǃKhūb ǂgaera ǃnâ; ǃKhūb ge ǁîsa ge ǁnâu amagab ge ǁaib âba ge khâi tsî ǀaes ǃKhūb dis ge ǁîn ǁaegu khau tsî ǁgoeǃkhais di ǀkhâuǀamde ge hapu.

²ǃNubais ge ǁaesa Moseba ge ǂgai; ob ge Moseba ǃKhūb ǃoa ge ǀgore, tsîs ge ǀaesa ge ǀari.

³ǁNā-amagab ge ǀons ǁnā ǃās disa Tabera ti ge ǂgai, ǃKhūb di ǀaes ge ǁîn ǁaegu khau amaga.

⁴Tsî habasa khoen, ǁîn ǁaegu hân ge turab xa ge ǃkhōhe; ǁnā-amagan ge Israeli ôan ona ǁkhawa ā tsî: Tari-e ǁgan-e nî ǂû kai da? ti ge mî.

⁵ǂÂi da kom rao ǁnā ǁaun Egipteb ǃnâ da ge xū-i ama tamase gere ǂûn xa; tôan xa tsî ǃhanatsaman xa tsî ǀoran xa tsî ǃhān xa tsî Jode-uib tsîn xa.

⁶Xawe nēsis ge sida ǀomsa a ǂnâsa, ǀnî xū-i ge sida mûdi aiǃâ a ǀkhai, nē manab ǀguib komo.

⁷Tsî manab ge korianderǃkhommi khami ge ī, tsî ǀûb âb ge hairab di ǀûb khami ge ī.

⁸Os ge ǁaesa ǃgûma tsî ge ǀhaoǀhao bi tsî ge ǁkhami bi ǁkhamidi ǃnâ tsî ge sâi bi sūdi ǃnâ tsî ǁîb xa amperedana ge dī; tsî ǁkhoab ge olitsampereb dib khami ge ǁkhoa.

⁹Tsî ǀaub ge tsuxuba ǁgoeǃkhais ai ǁnāo, ob ge manaba ǁîb ai ge ǁgôaxa.

¹⁰ǃNubaib ge Moseba ǁaes ra ā ǃkhaisa ge ǁnâu ǁîn ommi din ǃnâ, mâ-i hoa-i ǁî-i oms di dao-ams ǃnâ. Ob ge ǁaib ǃKhūb diba kaise ge khâi; tsî Moseb di mûǁae i ge ǁkhāti ge tsū i.

¹¹Ob ge Moseba ǃKhūb ǃoa ge mî: Tarexats kha satsa ǃgāb âtsa tsūse ge sîsenū, tsî tarexa ta kha sa mûǁae ǀkhomma hō tama hâ, ots ra ǃgommi nē ǁaes hoaragas diba tita ai ǁgui?

¹²ǃKhōǃoa ta xare ge tita nē ǁaes hoasa? ǁOra ta xare ge ǁîsa? Ots ra tita ǃoa mî: ǁÎna tani sa tîǂams ǃnâ, kaikaiǁgûb ra dai ra ǀgôa-e tanis xase, ǁnā ǃhūb, ǁîn îgats ge nūbaba ǃoa

¹³Mapa xu ta kha ǁnâi ǁgan-e nî hō, nē ǁaes hoasa ta nî mās kōse? Titaǀîn ra ā tsî: ǁGan-e mā da, î da ǂû re! ti mî.

¹⁴Tita ǀgui ta kom nē ǁaes hoasa tani ǁoao, ǃgomdāhe ta kom rao.

¹⁵Tsî ǁnātits ga dī-ū teo, ǁnâi ǃgam te re, ǀkhomma ta ga sa mûǁae hō hâ io, î ta ti tsūǃōba tā mû!

¹⁶Ob ge ǃKhūba Moseb ǃoa ge mî: Tita ǀhaoǀhaoba hûdisi aogu Israeli di kaigu diga, ǁîgu xats a ǂan ǁaes di kaigu tsî ǁîs di ǃoabasabegu asa; tsîts ge ǁîga nî ūsī tentoms ǀhûs dis tawa, î gu sa ǀkha ǁnāpa sī mâ;

¹⁷o ta ge tita ǁgôaxa tsî nî ǁnāpa sa ǀkha ǃhoa tsî ǁnā gagas, sa ai hâs xa ū, tsî nî ǁîgu ai ǁgui; o gu ge ǃgommi nē ǁaes diba sa ǀkha nî tani, îts tā ǀguri tani.

¹⁸ Îts ǁaes ǃoa mî: Khaisen ǁaris ǁga, o du ge ǁgan-e nî ǂû. Sadu ge ǃKhūb di ǂgaera ǃnâ goro ā tsî: Tari-e ǁgan-e nî ǂû kai da? Egipteb ǃnâ da kom ge ǃgâibahe io, ti go mî. ǁNā-amagab ge ǃKhūba sado ǁgan-e nîra mā, o du ge nî ǂû.

¹⁹O du ge nî ǂû ǀgui tsēs ǀguis kōse tama i, ǁkhāti ǀgam tsēra kōse tama i, ǁkhāti koro tsēdi kōse tama i, ǁkhāti disi tsēdi kōse tama i, ǁkhāti ǀgamdisi tsēdi kōse tama i tsî;

²⁰hî-î, ǀgui ǁkhâb hoaragab kōse, ǂguisa xus nî ǂoaxa tsî uixa du nîs kōse, ǃKhūb, sadu ǁaegu hâba du go aoxū, tsî ais âb aiǃâ du goro ā tsî: Tare xū-i ǃaroma da Egipteba xu ge doeǂoa? ti mî amaga.

²¹Ob ge Moseba ge mî: ǃNanikaidisiǀoadisin ge, ǀnūǃgû ran nē ǁaes din, ǁîn ǁaegu ta hâna; xawets ra satsa: Tita ge ǁîna ǁgan-e nîra mā, ǀoasa ǁkhâb kōsen nî ǂûga, ti mî?

²²Xare ǂābahen nî gūn tsî goman tsîna, ǂâubahen nîs kōse? Xare ǀhaoǀhaohen nî ǁaun hurib din hoana ǂâubahen nîs kōse?

²³Ob ge ǃKhūba Moseb ǃoa ge mî: ǁNâi ǃnubub kha a ǃKhūb di ǁôaba? Mûts nî nēsi, īses nî ti mîsa ība tsi, īses ība tsi tide ǃkhaisa.

²⁴Ob ge Moseba ǂoa tsî ǃKhūb di mîde ǁaesa sī ge mîba; tsîb ge hûdisi aogu, ǁaes di kaiga ǀhaoǀhao tsî ǁîga tentoms ǂnamipe ge mâi.

²⁵ǃNubaib ge ǃKhūba ǀnanus ǃnâ ǁgôaxa tsî ǁîb ǀkha ge ǃhoa; tsîb ge gagas ǁîb ai hâs xa ū tsî ǁîsa hûdisi aogu, ǁnā kaigu ai ge ǁgui, o i ge ge ī, gagas ge ǁîgu ai sâo, o gu ge gere kēbo, xawe ǁnās khaoǃgâ tama.

²⁶Tsî ǀgam aokha ge ǁgoeǃkhais ǃnâ ge hâ i, ǀguib di ǀons ge Eldad tsî naub di ǀons ge Medad; tsî ǁnā gagas ge ǁîkha ai ge sâ, xoamâisan di kha ge i xui-ao, tentoms ǃoa kha ge ǂoa tama hâ i xawe; tsî kha ge ǁgoeǃkhais ǃnâ gere kēbo.

²⁷ǃNubaib ge ǀgôaba ǃkhoesī tsî Moseba ǂhôa tsî ge mî: Eldadi tsî Medadi tsîkha ge ǁgoeǃkhais ǃnâ ra kēbo.

²⁸Ob ge Josuab, Nunni ôab, Moseb di ǃgāb, ǃkhōǂuihesa ǂkhamkhoegu diba ǃeream tsî: Ti ǀhonkhoe Mosetse, ǃkhâi kha re! ti ge mî.

²⁹Xawe Moseb ge ǁîb ǃoa ge mî: Titats ra tauba? Îs ga ǃKhūb di ǁaes hoasa kēbo-ao hâ, îb ga ǃKhūba ǁîb Gagaba ǁîn ai mā.

³⁰ǁNās khaoǃgâb ge Moseba ǁgoeǃkhais ǃnâ ge ǀhû, ǁîb tsî Israeli di kaigu ona.

³¹ǁGoasi i ge ǂoa-e ǃKhūba xu ǃgomǂoa tsî ǃnabarina huriba xu ūhā tsî ǁîna ǁgoeǃkhais tawa ge tsoro, ǀgui tsēs daob kōse nî īna, nēpa tsî naupa ǁgoeǃkhais ǂnamipe; tsîn ge ǁaupe ǀgam ǂhâkha kōse ǃhūba ge ǃnā.

³²ǃNubais ge ǁaesa khâi tsî ǁnā tsēs hoas tsî ǁnā tsuxub hoab tsî sao ra tsēs hoasa ǃnabarina gere ǀhaoǀhao; ǀorose ūhâ-i ge disi gomerde ge ǀhaoǀhao; tsîn ge ǁîna ge ǁguiǃābasen ǁgoeǃkhais ǂnamipe.

³³Tsî ǁgan-i ganupe ǁîn di ǁgûgu ǁaegu hâ i ǁgaehe tama hâ hîab ge ǃKhūb di ǁaiba ǁaesǀî ge khâi, tsî ǃKhūb ge ǁaesa ama kai ǁnora-ai-i ǀkha ge ǂnau.

³⁴ǁNā-amagas ge ǀons ǁnā ǃās disa Turab ǀhobadi ti ra ǂgaihe; ǁnāpan ge ǁaes, turab xa ge hāǂamhesa ǁkhō amaga.

³⁵Turab ǀhobade xus ge ǁaesa Haserots ǃoa ge doe; tsîn ge Haserots tawa ge hâ.