Read Khoekhoegowab Numeri 12 Bible Online

Numeri 12 - Khoekhoegowab bible

Numeri 12

¹Tsî Miriams tsî Aronni tsîra ge Moseba ge ǃhoaǃoa, Kusiǁî tara-eb ge ū xui-ao;

²tsî ra ge ge mî: ǁNâi Moseb ǃnâ-ū ǀguib ra ǃKhūba ǃhoa? Sim ǃnâ-ūs tsînab ǃhoa tama hâ? Tsî ǃKhūb ge ǁîsa ge ǁnâu.

³Xawe ǁnā aob, Moseb ge kaise tsamtsiǃnâ ge i, khoen, ǃhūbaib ai hân hoan ǃgâ-ai.

⁴ǃNubaib ge ǃKhūba ǃnapetamase Moseb, Aronni tsî Miriams tsîn ǃoa ge ǃhoa: Sa ǃnonado, ǂoaxa du re tentoms ǀhûs dis ǃoa. On ge ǁî ǃnonana ge ǀkhī.

⁵ǃNubaib ge ǃKhūba ǀnanus ǃnâ ǁgôaxa tsî tentoms di dao-ams tawa ge mâ; ǁnās khaoǃgâb ge Aronni tsî Miriams tsîra ge ǂgai; o ra ge ǁîǀgamra ge ǀkhī.

⁶Ob ge ge mî: ǁNâu nēsi ti mîde! Kēbo-aob ga sadu ǃnâ hâo, o ta ge tita ǃKhūta ai-e xu ǁîb tawa nî ǂanǂansen. ǁHapo-i ǃnâ ta ge tita ǁîb ǀkha nî ǃhoa.

⁷Xawe ǁnātib ge ti ǃgāb Moseba ī tama, ti ommi hoaragab ǃnâ ǂgomǂgomsase ība.

⁸Amsa xu ams ǃoa ta ge tita ǁîb ǀkha ra ǃhoa, ā, ǂhaisase tsî ǃkhae mîdi ǀkha tama, tsî īsib ǃKhūb dibab ra ǃgapaǀî. Tarexa ro ǁnâi ge ǃao tama hâ i, ti ǃgāb, Moseb ǃoagu ǃhoasa?

⁹ǃNubaib ge ǃKhūb di ǁaiba ǁîraǀî ge khâi, tsîb ge ǁîba ge bē.

¹⁰Tsî ǀnanus ge tentomsa xu ge ǂgō; tsî kō, Miriams ge ǃomamaxa ge i, ǃuri tsamaros khami. Tsî Aronni ge Miriamsa ge kōǀî, tsî mû, ǁîs ge ǃomamaxa ge i.

¹¹ǁNā-amagab ge Aronna Moseb ǃoa ge mî: Okha, ti ǀhonkhoetse, tā sim ai ǁgui re nē ǁoreb ǂkhabasem go dīb tsî ǁîb ǀkham go ǁoreba.

¹²As ǁîsa tā ǁō hâ-i xase ī re, ǁgans â-i, ǁgûs sorosa xu i ra ǀkhī hîa ǃkhareb ai hapuhe hâ-i xase.

¹³Ob ge Moseba ǃKhūb ǃoa ǂgai tsî ge mî: Ti Elotse, ǂgauǂgau si re!

¹⁴Ob ge ǃKhūba Moseb ǃoa ge mî: ǁÎs îb ga ais âs ǃnâ ǃharaxūsase ǂarao, xare taos kha tide hû tsēdi kōse? As hû tsēdi kōse ǁgoeǃkhais ǃauga ǃkhōǂuihe, îs ǁnās khaoǃgâ ǃkhōǃoahe.

¹⁵Nētis ge Miriamsa hû tsēdi kōse ǁgoeǃkhais ǃauga ge dīǂuihe; tsî ǁaes ge aiǃâ doe tama, Miriams ge ǃkhōǃoahes kōse.

¹⁶Xawe ǁnās khaoǃgâs ge ǁaesa Haserotsa xu ge doe tsî ǃgaroǃhūb Paranni ǃnâ ge sī ǁgoe.