Read Khoekhoegowab Numeri 13 Bible Online

Numeri 13 - Khoekhoegowab bible

Numeri 13

¹Tsî ǃKhūb ge Moseb ǃoa ge mî:

²Khoega sîǂui Kanaanǃhūb, Israeli ôana ta nî māba nî ǃkhēga; mâ ǃhaos ǁîn îgu dis hoasa xu du ge ǀgui khoeba nî sî, ǁîn ǁaegu ǂamkhoese ība.

³Ob ge Moseba ǁîga ǃgaroǃhūb Paranna xu ge sî ǃKhūb di mîmās ǃoa. ǁNā khoegu hoagu ge Israeli ôan di danakhoe ge i.

⁴Tsî nēdi ge ǀondi âga: Rubenni ǃhaos xa Samuab, Sakuri ôab;

⁵Simeonni ǃhaos xa Safati, Horib ôab;

⁶Judab ǃhaos xa Kaleb, Jefuneb ôab;

⁷Isaskari ǃhaos xa Jigali, Joseb ôab;

⁸Efraimmi ǃhaos xa Hoseab, Nunni ôab;

⁹Benjaminni ǃhaos xa Paltib, Rafub ôab;

¹⁰Sebulonni ǃhaos xa Gadieli, Sodib ôab:

¹¹Joseb ǃhaos xa, Manaseb ǃhaos di amǃnâs ai Gadib, Susib ôab;

¹²Danni ǃhaos xa Amieli, Gemalib ôab;

¹³Aseri ǃhaos xa Seturi, Mixaeli ôab;

¹⁴Naftalib ǃhaos xa Nabib, Wofsib ôab;

¹⁵Gadi ǃhaos xa Geueli, Makib ôab.

¹⁶Nēdi ge ǀondi ǁnā aogu, Moseb ge ǃhūba gu nî ǃkhēse sîgu dide; tsî Moseb ge Hoseab, Nunni ôaba, Josua ti ge ǂgai.

¹⁷Ob ge Moseba ǁîga ge sî, ǃhūb Kanaanna gu nî ǃkhēga, tsîb ge ǁîgu ǃoa ge mî: Nēpa-ū ǃgûǃapa ǃkhawagasǀî, î go ǃapa ǃhommi ai;

¹⁸î go ǃhūba sī kō, matib ī ǃkhaisa, tsî ǁaes, ǁîb ǃnâ ǁan hâsa isen a ǀgaisa, isen a ǂkhabusa ǃkhaisa, isen a ǀoro, isen a ǂgui ǃkhaisa.

¹⁹Tsî mati ī ǃhūb a ǃkhaisa, ǁîb ǃnân ǁan hâba, iseb a ǃgâi, iseb a tsū ǃkhaisa; tsî mati ī ǃādi asa, ǁîdi ǃnân ǁan hâde, ise di ǁgâudi ǃnâ, isen ǁaposa ǃkhaidi ǃnâ ǁan hâ ǃkhaisa;

²⁰tsî ǁkhāti mati ī ǃhūb a ǃkhaisa, iseb a kausas, iseb a ǃgarasasa, ise di haide ǁîb ǃnâ hâsa, ise di hâ tamasa. Î go ǃgariǃgarisen î go ǃhūb di ǂûn xa ū. Tsî ǁnā tsēdi ge ǂguro ǂûn ǂauxûiǂûhais din di tsē ge i.

²¹Nēti gu ge ǃgûǃapa tsî ǃhūba ge ǃkhē ǃgaroǃhūb Sinna xu Rehobs kōse, Hamats ǃoats ra ǃgûǀî.

²²O gu ge ǃgûǃapa ǃkhawagasa-ū tsî Hebrons kōse ge sī, tsî ǁnāpa gu ge Ahimanni, Sesaib tsî Talmaib tsîga ge hâ i, Anaki ôaga. Tsî Hebrons ge Soans, Egipteb ǃnâ ǁgoes xa hû kurigu aiǃâ ge ǂnubihe hâ i.

²³ǁNās khaoǃgâ gu ge ǃgoaǃnāb Eskoli tawa sī tsî ǁnāpa ǀgui ǂgonaba ge ǃgaoǁnâ ǂauxûiǂûhais di narus ǀkha; ǁîsa kha ge ǀgamkha tanihai-i ai ge tani; tsî granatǂûn tsî ǀnomahais ǂûn on xa.

²⁴ǁNā ǃkhais ǁkhās ge ǃgoaǃnāb Eskoli dib ti ge ǂgaihe, ǁnā narus ǂauxûiǂûhais ǂûn dis, Israeli ôan ge ǁnāpa ǃgaoǁnâs ǃaroma.

²⁵ǁNās khaoǃgâ gu ge ǃhūb di ǃkhēsa xu ge oa hakadisi tsēdi di ǀunis ai.

²⁶Tsî gu ge Moseb tsî Aronni tsîkha ǃoa ǃgûsī tsî ǀhaohâb Israeli ôan dib ǃoa ge sī ǃgaroǃhūb Paranni ǃnâ Kades tawa; tsî gu ge ǁîkha ǃereamsa ge ūhāba, tsî ǀhaohâb hoaba ǃhūb di ǂûna ge mû kai.

²⁷Tsî gu ge ǁîba ǃhoaba tsî ge mî: Sige ge ge sī ǁnā ǃhūb, sadu ge sige sîb ǃoa; tsî amaseb ge ǁîba daib tsî danib tsîkha xa ra dâuǃnâhe, tsî nē-i ge a ǁîb di ǂû.

²⁸Nēs ǀguis: ǁAes ge a ǀgaisa, ǁnā ǃhūb ǃnâ ǁan hâsa, tsî ǃādi ge ǁaposa tsî kaise a kai, tsî ge ge ǁnāpa ǁkhāti Anaki ôana ge mû.

²⁹Amalekǁîn ge ǃkhawagas ǃhūb ǃnâ ǁan hâ; xawe Hetiǁîn, Jebusǁîn tsî Amorǁîn ge ǃhomgu ǃnâ ǁan hâ, tsî Kanaanǁîn ge hurib tawa Jordanǃāb amǃgâ ǁan hâ.

³⁰ǃNubaib ge Kaleba Moseb aiǃâ ǁaesa ǃnōǃnō tsî ge mî: A da ǁkhoaǂgaoxase doeǃapa, î da ǁîba ǀumise ūhâ; amase da ge ǁîna nî dan xuige.

³¹Xawe aogu, ǁîb ǀkha ge ǃgûǃapa hâ igu ge ge mî: ǁNā ǁaes ǃoa da ge doeǃapa ǁoa, sada xan a ǀgaisa amaga.

³²Nēti gu ge ǁîga ǁnā ǃhūb hîa gu ge ǃkhēb xa Israeli ôana tsū gomma ge ūhāba mî raǃâ: ǁNā ǃhūb, ǁîba ge ge ǃgûǃnâǃganub, ǃkhē bi ge nîga, ǁîb ge a ǃhū, ǁîb ǃnâ ǁan hâna ra hapuba; tsî ǁaes ǃnâ ge ge mû khoegu hoagu ge gaxu soros â-i khoe ge i.

³³Sige ge ǁnāpa ǁkhāti hoan xa gaxu khoega ge mû, Anaki ôagu hoagu xa gaxuga; tsî sige ge sige mûǁae ǂhomn khami gere mûsen, ǁnāti ge ge ǁkhāti ǁîgu mûǁae ge ī i.