Read Khoekhoegowab Numeri 14 Bible Online

Numeri 14 - Khoekhoegowab bible

Numeri 14

¹ǃNubain ge ǀhaohân hoana khâi tsî dommi âna ge ūkhâi, tsî ǁaes ge ǁnā tsuxub ǁkhāb ǃnâ gere ā.

²Tsî Israeli ôan hoan ge Moseb tsî Aronni tsîkha ǃoagu ge ǀara, tsî ǀhao hân hoan ge ǁîkha ǃoa ge mî: Î da ga Egipteǃhūb ǃnâ ǁō hâ i; î da ga nē ǃgaroǃhūb ǃnâ ǁō hâ i!

³Tsî tarexab kha ǃKhūba ǁnā ǃhūb ǃoa ra ūsī da, gôab ǃnâ da nî ǁnāse, tsî sida di taradi tsî sida di ôana da nî ūǀhanahese. ǃGâibahe da kha tide, Egipteb ǃoa da ga oao?

⁴On ge nē-e nau-i ǃoa ge mî: A da danakhoeba dībasen, î da Egipteb ǃoa sī oa.

⁵O kha ge Moseb tsî Aronni tsîkha aira âkha ai ge ǁnā, ǀhaohâb hîa ǀhû hâ Israeli ôan dib hoab di ais aiǃâ.

⁶O kha ge Josuab, Nunni ôab, tsî Kaleb, Jefuneb ôab tsîkha, ǁnāgu, ǃhūba ge ǃkhēgu dikha saran âkha ge ǀkhau.

⁷Tsî kha ge Israeli ôan di ǀhaohâb hoab ǀkha ǃhoa tsî ge mî: ǁNā ǃhūb, sige ge ǃgûǃnâǃganub, ǃkhē bi ge nîse, ǁîb ge kaise a ǃgâi ǃhū.

⁸ǃKhūb ga sada ǃnâ ǃgâibaheo, ob ge ǁîba ǁnā ǃhūb ǃnâ ūǂgâ tsî nî ǁîba mā da, ǃhūb, daib tsî danib tsîkha ra dâuǃnâba.

⁹Xawe du tā ǃKhūba mâǃoa, î du ǁaes ǁnā ǃhūb disa tā ǃao, ǁîn ge perese nî ība da; ǁîn di sommi ge ǁîna xu ge ǂgō, tsî ǃKhūb ge sada ǀkha hâ; tā ǁîna ǃao.

¹⁰ǃNubaib ge ǀhaohâb hoaba ge mî, ǀuiǁhomhe gu nîsa. Xawe ǂkhaisib ǃKhūb dib ge tentoms ǀhûs dis ǃnâ ge ǂhai Israeli ôan hoan aiǃâ.

¹¹Ob ge ǃKhūba Moseb ǃoa ge mî: Mâ ǁaeb kōses kha nē ǁaesa tita nî ǂoeǂoe? Tsî matikōsen kha tita ǃnâ ǂgom tide buruxa dīn ǁîn ǁaegu ta ge dīn hoan tawa?

¹²Tita ge ǁîna ǂhīǁōb ǀkha ǂnau, tsî nî hîkākā; tsî tita ge satsa ǁîn ǃgâ-ai kai tsî ǀgaisa ǁaese nî dī.

¹³Ob ge Moseba ǃKhūb ǃoa ge mî: On ge Egipteǁîna ǁnāsa nî ǁnâu, sats ge nē ǁaesa sa ǀgaib ǀkha ǁîn ǁaeguba xu ǂgaeǂguiǂuikai xui-ao;

¹⁴on ge ǁîna ǁanǂgā-aon nē ǃhūb din ǃoa nî mî, ǁnâun ge khami sats ǃKhūts ra nē ǁaes ǁaegu hâsa, sats ǃKhūts ra aisa xu ais ǃoa mûhesa, sa ǀnanus ra ǁîn ǂamǃnâ mâsa, tsî sats ra ǁîn di ais aiǃâ ǃgûsa, tsēa ǀnanus ǃnâ tsî tsuxuba ǀaes ǃnâ.

¹⁵Tsîts kha ǁnâi nē ǁaesa ǀgui khoeb ǀguib as xase nî ǃgam? On kom ǀūben, nē gomma nî ǁnâuna ǃhoa tsî nî mîo:

¹⁶ǃKhūb ge nē ǁaesa ǁnā ǃhūb, ǁînab ge nūbab ǃnâ ūsī ǁoa ge i amagab ge ǁîna ǃgaroǃhūb ǃnâ ge ǂā ti.

¹⁷Ab ǁnâi ǀgaib ǃKhūb diba kai, sats ge ǃhoas ǁkhās xase, mî raǃâ:

¹⁸ǃKhūb ge a ǃnūǃnâxa tsî ǃgâidīxa, ǂhanuoǃnâsib tsî ǃûǂamsa ra ǀûbaǃâ, ǁîb ǀhapixa-e ǀhapiose ūhâ tamab, ǁgûgu di ǂhanuoǃnâsiba ǀgôan tawa ra ôaǃnâba, ǃnonaǁî tsî hakaǁî ǃhaos kōse.

¹⁹ǀÛba ǁnâi re ǂhanuoǃnâsib sa ǁaes diba kaisib sa ǀkhomxaǂgaosib dib ǃoa; tsî ǀnaits ǁîba nē ǁaesa Egipteǃhūba xu nēpas kōse gere ǀûba khami.

²⁰Ob ge ǃKhūba: Tita ge ǁîna go ǀûba sa mîs ǃoa, ti ge mî.

²¹Xawe amase ûi ta hâ ǃkhais aob ge ǃhūbaib hoaragaba ǃKhūb di ǂkhaisib xa nîra ǀoa.

²²ǁNā khoegu hoagu, ti ǂkhaisib tsî ti buruxa dīgu, Egipteb ǃnâ tsî ǃgaroǃhūb ǃnâ ta ge dīga mû tsî xawe disi ǃnādi kōse ge ǃâitsâ te tsî ti domma ǁnâuǀnam tama igu

²³ge amase ǁnā ǃhūb, ǁîgu di îga ta ge nūbaba mû tide; ā, ǀguib xareb, tita ge ǂoeǂoegu dib ge ǁîba mû tide.

²⁴Xawe ti ǃgāb Kaleb, ǀkhara gagas ge ǁîb ǀkha ge hâ i tsî titab ge saohâhâ amaga ta ge tita ǁîba ǁnā ǃhūb, ǁîb ǃnâb ge sīb tawa nî ūsī, tsî surib âb ge ǁnā ǃhūba ǀumise nîra ūhâ.

²⁵Tsî Amalekǁîn tsî Kanaanǁîn tsîn ge ǁnā ǃgoaǃnāb ǃnâ ǁan hâ. ǁAri ǂoa î du ǃgaro ǃhūb ǃoa doe, ǂĀxahuribǀî gau daob ai.

²⁶ǁNās khaoǃgâb ge ǃKhūba Moseb tsî Aronni tsîkha ǃoa ge mî:

²⁷Mâ ǁaeb kōse ta kha nē ǂkhaba ǀhaohâb, tita ǃoagu ra ǀarab ǀkha nî hâ? Tita ge ǀara-aidi Israeli ôan didi, ǁîdi ǀkhan ra tita ǃoagu ǀarade go ǁnâu.

²⁸Mî ǁîn ǃoa: Tita ûi hâ ǃkhais ao, tib ra ǃKhūba mî, tita ge sado nîra dī-ū, sadu ge ti ǂgaeǃnâ mî khami.

²⁹Sadu di ǁō hâ sorodi ge nē ǃgaroǃhūb ǃnâ nîra ǁnā; tsî sadu ǃgôahe hâdu hoadu, sadu di ǀgaus hoas ǃoa, ǀgamdisi kurigu â-ib tsî ǁnāsa ǃnā hâba xu, sadu, tita ǃoagu goro ǀarado;

³⁰amase du ge ǁnā ǃhūb ǃnâ sī tide, ǁîb ǂamai ta ge ti ǃomma ūkhâib, ǁîb ǃnâ ta nî ǁan kai duba, Kaleb, Jefuneb ôab tsî Josuab, Nunni ôab tsîkha ǀguikha.

³¹Xawe sadu di ôaron, ǁîn xa du ge: ǁÎn ge nî ūǀhanahe, ti mîn, ǁîna ta ge nîra ūǂgâ, tsî ǁîn ge ǁnā ǃhūb, sadu ge ǃharaxūba, nîra ǂan.

³²Tsî sadu xasa, sadu di ǁō hâ sorodi ge ǃgaroǃhūb ǃnâ nîra ǁnā.

³³Tsî sadu ôan ge nē ǃgaroǃhūb ǃnâ ǃûi-aose nî doema hakadisi kurigu kōse; tsîn ge sadu di ǀaiga nîra tani, sadu di ǁō hâ sorodi nî ǃgaroǃhūb ǃnâ hapuhes kōse.

³⁴ǁNā tsēdi, ǁîdi ǃnâ du ge ǃhūba ǃkhēdi, hakadisi tsēdi, ǃoa du ge mâ tsēs hoasa ǀgui kurib as xase sadu di ǂhanuoǃnâsiga nîra tani, hakadisi kurigu kōse, tsî du ge nîra hōǃâ ti khôaǁnâsa.

³⁵Tita ǃKhūta ge go ǃhoa: Amase ta ge ǁîsa nîra dī nē ǂkhaba ǀhaohâb, ǁnān, ti ǃoagu go ǀhûn dib hoab tawa; ǁîn ge nē ǃgaroǃhūb ǃnâ toa tsî nîra ǁō ǁnāpa.

³⁶Tsî ǁnā khoegu, Moseb ge sîgu, ǃhūba gu nî ǃkhēse, ǁîgu hîa oa raǃâ ǀhaohâb hoaba ti ǃoagu ge ǀara kaiga, ǃhūba tsū gomma ra ūǀkhībase;

³⁷ǁnā khoegu, ǃhūba tsū gomma ge ūǀkhībagu ge ǁō-i xa ge ǁō ǃKhūb di ais aiǃâ.

³⁸Xawe Josuab, Nunni ôab, tsî Kaleb, Jefuneb ôab tsîkha ge ûitsamase ge hâ ǁnā khoegu, ǃhūba nî ǃkhēse ge ǃgû hâ igu xa.

³⁹Tsî Moseb ge nē mîde Israeli ôan hoan ǀkha ge ǃhoa. Os ge ǁaesa kaise ge ǃoa.

⁴⁰On ge ǃnauǁgoaga khâi tsî ǃhommi di ǀgapib ai ge ǃapa, mî raǃâ: Mû nē da hâ tsî da ge nî doeǃapa ǁnā ǃās, ǃKhūb ge ǁîs xa mîsa ǃoa; ǁore da go amaga.

⁴¹Ob ge Moseba ge mî: Tare xū-i ǃaroma du kha ǃKhūb di mîmāsa ǁnāti ra ǃûǂam? Nē ǃkhais kom amǁnā tideo.

⁴²Tā doeǃapa, ǃKhūb ge sadu ǁaegu hâ tide xuige; î du tā ǀnîsi ǂnauhe sadu khākhoen di ais aiǃâ.

⁴³Amalekǁîn tsî Kanaanǁîn ge ǁnāpa sadu di ais aiǃâ hâ, tsî du ge gôab ǃnâ nîra ǁnā; ǃKhūba xu du ge ǂnanbē amagab ge ǃKhūba sadu ǀkha hâ tide.

⁴⁴Xawen ge ǂanapega dītsâ, ǃhommi di ǀgapib ai ǃapasa; xawe ǃKhūb ǃgaeǀhaos di ǂgaes tsî Moseb tsîn ge ǁgoeǃkhais ǁaeguba xu ǀgora tama ge i.

⁴⁵ǃNubain ge Amalekǁîn tsî Kanaanǁîn tsîn, ǁnā ǃhommi ai ǁan hâna ǁgôaxa tsî ǁîna ge ǂnau tsî Hormas kōse ǁîna ge ǂnaukākā.