Read Khoekhoegowab Numeri 15 Bible Online

Numeri 15 - Khoekhoegowab bible

Numeri 15

¹ǁNās khaoǃgâb ge ǃKhūba Moseb ǃoa ge mî:

²ǃHoa re Israeli ôan ǃoa îts ǁîna mîba: Sadu ga ǃhūb, ǁanǃnâ du nîb, tita nîra mā dub ǃnâ sīo,

³tsî ǀaeǁguibasa du ga ǃKhūba ǁguibao, khauǁguibas kas, ǂāǁguibas kas hoasa, mîmâi-e du nî dīǀoaǀoase tamas ka io māsenxa ǁguibas ǃnâs kas, sadu di mîmâisa ǁâudīgu ǃnâs kas, ǀnamǀnamsa ǁama-e du ǃKhūba nî dībaga, goman xas kao, ǀgoan xas kao,

⁴ob ge ǁîb, ǃKhūba ra ǁguibas âba ǁguibaba ǂûǁguiba-e nî ǁguiba: Disiǁî ǃâs tsampereb dis xa, hakaǁî ǃâs hinni di olib ǀkha ǂnâ-aihe hâsa.

⁵Tsî ǂauxûib xa du ge ǂnâǁguibase hakaǁî ǃâs hinni dis kōse nî ǂhomi, khauǁguibases kao, ǂāǁguibases kao, ǀgui ǁkhaob di amǃnâs ai.

⁶Tsî ǀgui bairab di amǃnâs ai du ge ǂûǁguiba-e nî ǁguiba, ǀgam disiǁî ǃâra tsampereb, olib ǀkha ǂnâ-aihe hâb dira xa, ǃnonaǁî ǃâs hinni dis ǀkha.

⁷Tsî ǂauxûib xa du ge ǂnâǁguibase ǃnonaǁî ǃâs hinni disa nî ǁguiba ǀnamǀnamsa ǁamab ǃKhūb dib ase.

⁸Tsî ǂkham ǁgōba du ga khauǁguibases kas, ǂāǁguibases kas hoasa ǁāǁāo, mîmâi-e du nî dīǀoaǀoase, ǃKhūb di ganganǁguibase,

⁹o du ge ǂkham ǁgōb tawa ǂûǁguiba-e nî ǁguiba: ǃNona disiǁî ǃâdi tsampereb, olib ǀkha ǂnâ-aihe hâb dide xu, ǀgui hinni di ǃkhareba.

¹⁰Tsî ǂauxûib xa du ge ǂnâǁguibasa nî ǁguiba ǀgui ǃkhareb hinni diba, ǀaeǁguibas, ǀnamǀnamsa ǁamab ǃKhūb dib dis ase.

¹¹Nēti i ge nî dīhe ǁnā ǀgui ǁgōb ǀkhas kas, ǁnā ǀgui bairab ǀkhas kas, ǁnā ǀgui ǁkhaob gūn tsî pirin dib ǀkhas kas hoasa.

¹²ǀGaus hîa du nî ǁāǁās ǃoa du ge mâ-i hoa-i ǀkha ǁnāti nî dī, ǀgaus an ī khami.

¹³Mâ ǃhūb ǃnaesabeb hoab ge nēna ǁnāti nî dī, ǀaeǁguiba-e ra ǁguibaǃâ ǀnamǀnamsa ǁamab ǃKhūb dib ase.

¹⁴Tsî ǃhaokhoe-i ga sadu ǃnâ ǃhaokhoese hâo, sadu ǁaegu i ga hâo sadu di ǃhaodi ǃnâ, tsî i ga ǀaeǁguiba-e ǁāǁā, ǀnamǀnamsa ǁamab ǃKhūb dib ase, o i ge ǁîsa nî di, sadu on ra dī khami.

¹⁵Sats ǀhaohâts, sadu ǂûdu ka io, ǃhaokhoe-i, hîa sadu ǁaegu hâ i ka io: ǀGui ǂnûiǂgās ǀguis ge nî hâba du, ǀamo ǂnûiǂgāse sadu di ǃhaodi tawa nî hâs: Sadu īs ǁkhās xase i ge ǃhaokhoe-i ona nî ī ǃKhūb di ais aiǃâ, ti.

¹⁶ǀGui ǂhanub ǀguib tsî ǀgui dommi ǀguib ge sadu tsî ǃhaokhoe-i, sadu ǁaegu hâ-i tsîdo nî hâba.

¹⁷ǃAruǀîb ge ǃKhūba Moseb ǃoa ge mî:

¹⁸ǃHoa re Israeli ôan ǃoa îts ǁîna ǃoa mî: Sadu ga sīo ǁnā ǃhūb, ǁîb ǃnâ ta nî ūǂgâ dub ǃnâ,

¹⁹o i ge nîra i, ǃhūb di pereb xa du ga ǂû ǃnubai du ge ǃKhūba ǁguiba-e nî ǁguiba.

²⁰ǂGurosaben sadu di ǀâpereb din xa du ge ampereba ǃkhōkhâiǁguibase nî ǁguiba; ǃkhōkhâiǁguibas dāǃnâǃkhais dis xase du ge ǁîsa nî ǁguiba.

²¹ǂGurosaben sadu di ǀâpereb din xa du ge ǃKhūba ǃkhōkhâiǁguiba-e nî ǁguiba sadu di ǃhaodi ǃnâ.

²²Tsî ǁnāǁgôa du ka tsî nē mîmādi ǃKhūb didi, ǃKhūb ge Moseb ǀkha ǃhoadi hoade dī tama io,

²³ǃKhūb ge Moseb ǃomma xu mîmā dun hoan, ǁnā tsēs, ǃKhūb ge ǁîsa mîmāsa xu, tsî ǃaruǀî sadu di ǃhaodi ǃnâ,

²⁴o i ge nîra i, xū-i ga ǁhapusa xu ǃnaeo, ǀhaohâb a ǀū hîa, ob ge ǀhaohâb hoaba ǂkham ǁgōba nî ǁāǁā khauǁguibase, ǀnamǀnamsa ǁamab ǃKhūb dib ase, ǁî-i di ǂûǁguibas ǀkha tsî ǁî-i di ǂnâǁguibas ǀkha, ǁnā dommi ai; tsî ǂkharapiriba ǁoreǁguibase.

²⁵Ob ge pristera Israeli ôan di ǀhaohâb hoaba ǂkhîbagusa nî dība, on ge nîra ǀûbahe, ǁhapuǃkhai-i ge i xui-ao, tsîn ge ǁîn di ǁguibasa ge ǁguiba ǀaeǁguibase ǃKhūba tsî ǁîn di ǁoreǁguibasa ǃKhūb di ais aiǃâ ǁîn di ǁhapus ǂama.

²⁶Ob ge Israeli ôan di ǀhaohâb hoaba nîra ǀûbahe, ǃhaokhoe-i, ǁîn ǁaegu ǃhaokhoese ǁan hâ-i on, ǁaes hoas ge ǁhapu-i xa ge hāǂamhe xui-ao.

²⁷Tsî ǀoms ga ǁhapu-i ǀkha ǁoreo, os ge ǀgui kurixa pirisa ǁoreǁguibase nî ǁguiba.

²⁸Ob ge pristera ǁhapu ra ǀomsa ǂkhîbagusa nî dība, ǁhapu-i ǀkhas ga ǁoreo, ǃKhūb di ais aiǃâ ǂkhîbagusa ǁîsa ra dībaǃâ; os ge ǁîsa nîra ǀûbahe.

²⁹Israeli ôan di ǃnaesabe-i tsî ǃhaokhoe-i, ǁîn ǁaegu hâ-i on ge ǀgui ǂhanub ǀguib xa nî hâbahe, ǁnā-i ǁhapu-i ǀkha ra ǁore-e.

³⁰Xawe ǁnā ǀoms, ǂanapega ga xū-e dīs, ǃhūb ǃnaesaben dis kas, ǃhaokhoen dis kas hoas, ǁîs ge ǃKhūba ra ǃharaxū; tsî ǁnā ǀoms ge ǁîs di ǁaes ǁaeguba xu nîra ǃhomǂuihe.

³¹ǃKhūb mîsas ge ǃharaxū tsî mîmās âbas ge a ǁauǁau amaga; ǁnā ǀoms ǂûs ge nîra ǃhomǂuiǃarihe, ǂhanuoǃnâsib âs ge ǁîs ai hâ.

³²Tsî Israeli ôan ge ǃgaroǃhūb ǃnân hâ hîa khoeb, sâtsēs ai ǀaena ra sā-aiba ge hō.

³³Tsî ǁîba ge ǀaena ra sā-aise a hōn ge ǁîba Moseb tsî Aronni tsî ǀhaohâb ǃoa ge ūhā.

³⁴On ge ǁîba ǃkhōsis ǃnâ ge ū, tare xū-eb nî dīhes ge ǂhaiǂhaihe tama hâ i xui-ao.

³⁵Ob ge ǃKhūba Moseb ǁga ge mî: ǁNā khoeb ge ǂanǂansase nî ǃgamhe; ǀhaohâb ge ǁîba nî ǀuiǁhom ǁgoeǃkhais ǃauga.

³⁶ǃNubaib ge ǀhaohâb hoaba ǁgoeǃkhais ǃauga ūǂui tsî ge ǀuiǁhom bi, ǁōb ges kōse, ǃKhūb ge Moseba mîmā xase.

³⁷Tsî ǃKhūb ge Moseb ǃoa ge mî:

³⁸ǃHoa re Israeli ôan ǃoa îts ǁîna mîba: An tsurirona dībasen ǁîn saran di ǁhôadi tawa ǁîn di ǃhaodi ǃnâ; tsî ǁhôas di tsuriron ain ge ǀhomǂhoa ǁapaba nî ǃgae;

³⁹tsî ǁîb ge tsuriron tawa nî hâba du, kōǀî tsî du nî ǃKhūb di mîmādi hoadi xa ǂâi tsî ǁîde dīse; tsî du ge sadu di ǂgaob tsî sadu di mûde ôa-am tide, ǁîna du nî ǀaiǃgonga;

⁴⁰î du ǂâiǂâisen î du dī ǃKhūb mîmādi hoade, î du sadu Eloba ǃanuse ība.

⁴¹Tita ge ǃKhūta, sadu di Elota, Egipteǃhūba xu ge ǂgaeǂguiǂui du ta, Elose ta nî ība duse: Tita ge ǃKhūta, sadu di Elota.