Read Khoekhoegowab Numeri 16 Bible Online

Numeri 16 - Khoekhoegowab bible

Numeri 16

¹Tsî Koraxi, Jitshari ôab, Kehati ôab, Levib ôab ge Datanni tsî Abirammi tsîkha Eliab ôakha ge ū tsî Onni, Peleti ôab, Rubenni ôab tsîna,

²tsî gu ge ǀgamkaidisikorodisi aogu, Israeli ôan digu, ǀhaohâb di ǂamsagu, ǀhûs di ǂgaihesagu, ǀonsa ūhâ aogu Moseb di ais aiǃâ ge khâi.

³Tsî gu ge Moseb tsî Aronni tsîkha ǃoagu ǀhû tsî ǁîkha ǃoa ge mî: Î kho ǂâubahe, nē ǀhaohâb hoab, ǁîn hoan kom a ǃanuo, tsî ǃKhūb kom ǁîn ǁaegu hâo; tarexa kho ǁnâi sakho ǃKhūb di ǀhaohâb ǂamai ra ǀgapiǀgapisen?

⁴Tsî Moseb ge ǁnâuo, ob ge ais âb ai ge ǁnā.

⁵Tsîb ge Koraxi tsî saoǃgonaon âb hoan ǀkha ǃhoa tsî ge mî: ǁArikam ǁgoab ge ǃKhūba nîra ǂanǂan, tari-i a ǁîb di, tari-i a ǃanu ǃkhaisa, î-i ǁîba ǀgū ti; tsî ǁîb ga ūǂuibasen-i, ǁnā-eb ge ǁîba nî ǀgū kai.

⁶Dī nēsa: Ū wiroksoade, sats Koraxts tsî ǀhaohâb âts hoaba,

⁷î du ǁari ǀaesa ǂgā, î du ǀanǀanxūna ǃKhūb di ais aiǃâ ǁîdi ai ǁgui; o i ge nîra ī, ǁnā khoeb, ǃKhūb xa ga ūǂuiheb nî ǃanu ǃkhaisa. ǂÂubahe go re, Levib ôago!

⁸ǃAruǀîb ge Moseba Koraxi ǃoa ge mî: ǁNâu re, sa Levib ôago!

⁹ǂKharibahe go ra, Israeli Elob sago Israeli di ǀhaohâba xu ge ǀgora ǃkhaisa, sagob nî ǁîba ǀgū kaise, ǃKhūb di tabernakeli di ǃoabasa ǃoaba tsî go nî ǀhaohâb di ais aiǃâ mâga, ǁîna go nî sîsenbase?

¹⁰Tsîb ge sago tsî sago di ǃgâsagu, Levib ôagu hoagu tsîgo ge ǀgū kai; tsî go kha ǁnâi pristerǃoabas ona ra ôabasen?

¹¹ǁNā-amaga, sago tsî sago di ǀhaohâb hoab tsîdu ge ǃKhūb ǃoagu ǀhû hâ. Tareba ǁnâi Aronna, o du kha ǁîb ǃoagu ra ǀara?

¹²ǃNubaib ge Moseba sîsī tsî Datanni tsî Abirammi tsîkha, Eliab ôakha ge ǂgai kai, xawe kha ge: ǃApasī khom tide, ti ge mî.

¹³ǂKhariba tsi i a, ǃhūb, daib tsî danib tsîkha xa ra dâuba xuts go ǂgaeǂguiǃapa da ǃkhaisa, ǃgaroǃhūb ǃnâts nî ǃgam dase, ots ra gao-aodīsen sida ǂama?

¹⁴Tsî ǁnās tawats ge ǁkhāti ǃhūb, daib tsî danib tsîkha ra dâuǃnâb ǃnâ ūǂgā da tama tsî ǁkhāti ǃhanagu tsî ǂauxûiǂûǃhanagu tsîga mā da tama hâ ǀumise. ǁNâi nē khoegu di mûde ūǂuits nî? ǃApasī da tide.

¹⁵ǃNubaib ge Moseba kaise ge ǁaixa tsîb ge ǃKhūb ǃoa ge mî: ǁÎn di ǁguibasa tā kōǀî! Tita ge esel-i xare-e ǁîna xu ū tama tsî ǀgui-i âna tsūdī tama hâ.

¹⁶ǃNubaib ge Moseba Koraxi ǃoa ge mî: Sats tsî ǀhaohâb âts hoab tsîdo ǁari hâ ǃKhūb di ais aiǃâ; sats tsî ǁîn tsî Aronni tsîdo ǁaris ǁga.

¹⁷Î du mâ-i hoa-e ǁî-i di wiroksoasa ū î du ǀanǀanxūna ǂgā, î du mâ-i hoa-e ǁî-i di wiroksoasa ǃKhūb di ais a aiǃâ ūhā, ǀgamkaidisi tsî korodisi wiroksoade; sats on tsî Aronni tsîkho, mâb hoaba ǁîb di wiroksoasa.

¹⁸On ge mâ-i hoa-i âna ǁî-i di wiroksoasa ū tsî ǀaesa ǂgā tsî ǀanǀanxūna ge ǁgui-ai; tsîn ge tentoms ǀhûs dis di dao-ams tawa ge hā mâ, Moseb tsî Aronni tsîkha on.

¹⁹Ob ge Koraxa ǀhaohâb hoaba ǁîkha ǃoagu ge ǀhaoǀhao, tentoms ǀhûs dis di dao-ams tawa. ǃNubaib ge ǂkhaisib ǃKhūb diba nē ǀhaohâb hoab tawa ge ǂhai.

²⁰Ob ge ǃKhūba Moseb tsî Aronni tsîkha ǃoa ge mî:

²¹ǀGorasen nē ǀhaohâb di ǁaeguba xu, o ta ge tita ǁîna ǀgui mûsǀapiros ǀguis ǃnâs a khami nî hapu.

²²O kha ge ais âkha ai ǁnāǁgoe tsî ge mî: Elo, sats, gagadi ǁgans hoas didi di Elotse, ǀgui khoeb ǀguib ga ǁore, xawets kha ǀhaohâb hoaba ǁnâi nî ǁaixaǂam?

²³Ob ge ǃKhūba Moseb ǃoa ge mî:

²⁴ǃHoa re nē ǀhaohâb ǀkha îts mî: ǃGûǃapa du Koraxi, Datanni tsî Abirammi tsîgu di ǁanǃkhais ǂnamipesa xu.

²⁵ǃNubaib ge Moseba khâi tsî Datanni tsî Abirammi tsîkha ǃoa ge ǃgû; tsî ǁîb khaoǃgâ gu ge Israeli di kaiga ge ǃgû.

²⁶Ob ge ǀhaohâb ǁga ge mî: ǂGō re nē eloxoresa khoegu di tentomde xu, î du xū-i, hîa ǁîn di-e tā tsâǀkhā; î du ǀnîsi tā hîkākāhe ǁîn di ǁoren hoan ǃnâ.

²⁷Nētin ge ǁanǃkhais Koraxi, Datanni tsî Abirammi tsîgu dis di ǂnamipeba xu ge ǃgûǃapa; xawe Datanni tsî Abirammi tsîkha ge ǂoaxa tsî tentomdi ân di dao-ams ǃnâ ge hā mâ, taradi âkha ǀkha tsî ǀgôagu âkha ǀkha tsî ǀgôaron âkha ǀkha.

²⁸ǁGoasib ge Moseba ge mî: Nēs tawa du ge nî ǂan, ǃKhūb go tita sî ǃkhaisa, nē dīgu hoaga ta nî dīse, ti ǂgaob ǂûb di dī tama gu a ǃkhaisa.

²⁹Nēn ga ǁō-o, hoa khoen ra ǁōs xase, tsî ôaǃnâ-i ga ǁîn ǂama dīheo, khoen hoan ta ôaǃnâhe khami, ob ge ǃKhūba tita sî tama hâ.

³⁰Xawe ǃKhūb ga ǀasa xū-e kuruo, tsî ǃhūb ga ams âba khowa tsîb ga ǁîna ūn hâ xūn hoan ǀkha hapuo, tsîn ga ûitsamase ǀamoǀaeb ǃoa ǁgôao, o du ge nî ǂan, nē khoegu ge ǃKhūba goro ǂoeǂoe ǃkhaisa.

³¹Tsî i ge ge ī, nē mîdeb ge ǃhoatoao, ob ge ǃhūb, ǁîn ǃnaga hâba ge ǂkhawe.

³²Tsî ǃhūb ge ams âba khowa tsî ǁîna omdi ân ǀkha ge hapu tsî khoen, Koraxa anuba hân hoan tsî xūn hoan tsîn ǀkha.

³³On ge ge ǁgôa, ǁîn tsî ūn hâ xūn hoana ûitsamase ǀamoǀaeb ǃoa, ob ge ǃhūba ǁîna ge ǃgū-ai, tsîn ge ge kā ǀhaohâb ǁaeguba xu.

³⁴Ob ge Israeli hoab, ǁîn ǂnamipe hâba, ǁîn di ǃaus xa ge ǁhâ, îb ǃhūba ǀnîsi sida ona tā hapu! tin ra mî xui-ao.

³⁵Tsî ǀae-i ge ǃKhūba xu ǃgûǂoa tsî ǁnā ǀgamkaidisi tsî korodisi khoega ge hapu, ǀanǀanxūna ge ǁguibaga.