Read Khoekhoegowab Numeri 17 Bible Online

Numeri 17 - Khoekhoegowab bible

Numeri 17

¹Ob ge ǃKhūba Moseb ǃoa ge mî:

²Mîba Eleasari, Aronni ôab, pristera, îb wiroksoade khau hâ ǀaesa xu ūkhâi, îts ǀaesa ǃnūse tsoroxu, ǁîdi a ǃanu xuige;

³wiroksoadi ǁnāgu, ǁîgu di ǀomdi ǃoagu koro ǁoregu dide a di dīhe ǂnauǂhabaǂhabasa ǀurise, altars nî ǁîb ǀkha ǃkhûǃgâhese; ǃKhūb di ais aiǃâ gu go ǁîde ūhā amaga di ge a ǃanu; tsî di ge Israeli ôana saose nî ība.

⁴Ob ge Eleasari, pristera ǁnā ǂaiwiroksoadi, khauǃkhūhe hâgu go ūhāde ū tsî ǁîde ge ǂnauǂhabaǂhaba, altars di ǃkhûǀkhāxūse.

⁵ǂÂiǂâisens Israeli ôan dis ase, î-i khoe-i xare-i hîa ǃhaokhoe-i, Aronni surib di tama-e tā ǀgū, ǀanǀanxūna i nî ǂhubiga ǃKhūb di ais aiǃâ, î-i tā hāǂamhe Koraxi tsî ǁîb di ǀhaohâb go hāǂamhe khami, ǃKhūb ge Moseb di ǃoabasa xu mîs xase.

⁶Xawe sao ra tsēs ge Israeli ôan di ǀhaohâb hoaba Moseb tsî Aronni tsîkha ǃoagu ǀara tsî ge mî: Sakho ge ǃKhūb di ǁaesa go ǃgam.

⁷O i ge ge ī, ǀhaohâb ge Moseb tsî Aronni tsîkha ǃoagu ǀhû tsî ǀhûs di tentoms ǃoa ǂnano, mû, os ge ǁnā ǀnanusa ǁîsa ge ǃgū-ai, tsî ǂkhaisib ǃKhūb dib ge ge ǂhai.

⁸O kha ge Moseb tsî Aronni tsîkha ǀhûs di tentoms aiǃâ ge hā.

⁹ǃNubaib ge ǃKhūba Moseb ǃoa ge mî:

¹⁰ǂGō kho nē ǀhaohâb di ǁaeguba xu, o ta ge tita ǁîna ǀgui mûsǀapiros ǃnâs a khami nî hapu. ǃNubai kha ge aira âkha ai ge ǁnā.

¹¹Ob ge Moseba Aronni ǃoa ge mî: Ū wiroksoasa, îts altarsa xu ǀaesa ǂgā îts ǀanǀanxūna ǁgui-ai îts ǃnoesase ra ǃgûǃâ ǁîn ǂama ǂkhîbagusa dī; kai ǁaib ge ǃKhūb di ais aiǃâba xu go ǃgûǂoa xuige, ǁōb ge go tsoatsoa.

¹²Ob ge Aronna ǁîsa Moseb ge mî xase ū tsî ǀhaohâb di ǁaegub ǃnâ ge ǃkhoeǂgâ, tsî mû, ǁōb ge go tsoatsoa hâ i ǁaes ǁaegu; ob ge ǀanǀanxūna ǂgā tsî ǂkhîbagusa ge dī ǁaes ǂama.

¹³Tsîb ge ǁō hân tsî ûitsaman tsîn ǁaegu ge mâ i, nētib ge ǁōba ge ǀû.

¹⁴Tsî ǁnā ǁōb xa ge ǁōn ge hakaǀaǀoadisi tsî hûkaidisi ge i, Koraxi di dīǃkhais ǃaroma ge ǁōn ose.

¹⁵Tsî Aronni ge Moseb ǃoa ge oa tentoms ǀhûs dis di dao-ams tawa, ob ge ǁōba ge ǀû.

¹⁶ǃNubaib ge ǃKhūba Moseb ǃoa ǃhoa tsî ge mî:

¹⁷ǃHoa re Israeli ôan ǀkha îts ǁîn xa mâ ǁgûsi ommi hoaba ǀgui haisa ūba, ǁîn di ǂamsagu hoagu xa ǁîgu îgu di ommi ǃoa, disiǀgamǀa haide; îts mâb hoab di ǀonsa hais âb ai xoa,

¹⁸xawe Aronni di ǀonsats ge Levib di hais ai nî xoa; ǀgui hais ge ǁîn îgu ommi di danasa nî hâba xuige.

¹⁹Tsîts ge ǁîde nî ǁguibē tentoms ǀhûs dis ǃnâ, ǀhûǀguitimîs aiǃâ, tita sadu ǀkha nî ǀhû ǃkhais tawa.

²⁰O i ge nîra ī, hais, tita nî ūǂuibasen khoeb dis nîra ǃkhā ǃkhaisa; tsî tita ge nîra ǂkhîǂkhî ti ǃoagun ra ǀara ǀaradi Israeli ôan dide, sakho ǃoagun ra ǀarade.

²¹Ob ge Moseba Israeli ôan ǀkha ge ǃhoa; o gu ge ǁîn di ǂamsagu hoaga ǁîba ǀgui haisa ge mā, mâ ǂamsab hoab ama ǀgui haisa, ǁîgu îgu di ommi ǃoa; disiǀgamǀa haide; Aronni di hais ge ǁkhāti ǁîgu di haidi ǁaegu ge hâ i.

²²Ob ge Moseba nē haide ge ǁguibē ǃKhūb di ais aiǃâ, tentoms ǀhûǀguitimîs dis ǃnâ.

²³Tsî i ge sao ra tsēs ai ge ī, Moseb tentoms ǀhûǀguitimîs dis ǃnâ ge ǂgâ ǃkhaisa; tsî mû, Aronni di hais Levib ommi dis ge ge ǃī; ǃkhādes ge ǁîsa ūǀkhī xui-ao, ā, ǁhare tsîs ge amandelǂûna ge ūǀkhī.

²⁴ǃNubaib ge Moseba nē haidi hoade ǃKhūb di ais aiǃâba xu Israeli ôan hoan ǃoa ge ūǂui; on ge ge mû, tsî mâb hoab ge hais âba ge ū.

²⁵ǁGoasib ge ǃKhūba Moseb ǃoa ge mî: Aronni di haisa ǁkhawa ǀhûǀguitimîs aiǃâ ūhā, îs sâuhe mâǃoaxa ǀgôan di saose; nētits ge tita ǃoagun ra ǀara ǀaradi âna nî ǀû kai, în tā ǁō.

²⁶Ob ge Moseba ge dī; ǃKhūb ge ǁîba mîmā xaseb ge ge dī.

²⁷On ge Israeli ôana Moseb ǀkha ǃhoa tsî ge mî: Kō, ǁō da ra, kā da ra, hoatsama da ge ra kā.

²⁸Tabernakeli ǃKhūb diba ga ǀgū-i hoa-i ge nîra ǁō. ǁNâi ǁō raǃâ hîkākāhe da nî?