Read Khoekhoegowab Numeri 18 Bible Online

Numeri 18 - Khoekhoegowab bible

Numeri 18

¹Tsîb ge ǃKhūba Aronni ǃoa ge mî: Sats tsî sa ôagu tsî sa îb di ommi tsîn ge sa ǀkha ǂhanuoǃnâsib ǃanusib diba nîra tani; sats tsî sa ôagu tsîn ge sa ǀkha ǂhanuoǃnâsib sa pristerǃoabas diba nîra tani.

²Tsîts ge ǁkhāti sa ǃgâsagu, Levib di ǃhaos, sa îb di ǃhaosa sa ǀkha nî ǀgū kai, î gu sa ǀkha ǃgaeǁaesen, î gu satsa ǃoaba, ti; xawe sats tsî sa ôagu ge sa ǀkha tentoms ǀhûǀguitimîs disa nî hâba.

³Tsî gu ge sa ǃûisa nî ǃûi tsî tentoms hoas di ǃûisa; xawe altars di sîsenūdan ǃanusib din tsî altars tsîna gu ge ǀgū tide, î gu tā ǁō, ti, ǁîgu tsî sats ona.

⁴Tsî gu ge sats ǀkha mâǀhao tsî nî tentoms ǀhûs dis di ǃûisa ǃûi tentoms ǃoabas hoas ǃnâ; tsî ǃhaokhoe-i ge satsa ǀgū tide.

⁵Tsî sago ge ǃanusib di ǃûisa nî ǃûi tsî altars di ǃûisa, ǁgôasi-i xare-i hâ tidega Israeli ôan ǂama.

⁶Mû, tita ge sa ǃgâsagu, Leviǁîga, Israeli ôana xu ge ū, sago ge ǁîga hōse māhe hâ ǃKhūb xa, tentoms ǀhûs dis di ǃoabasa gu nî ǃoabase;

⁷xawe sats tsî sa ôagu sats ǀkha, sago ge pristerǃoabasa nî dī altars di dīǃkhaidi hoadi ǃnâ, tsî ǂgāmâisab ǃgâb ai nî dīhen hoana go ge sago nî ǃoaba; sago di pristerǃoabasa ta ge tita sago ǀkhaexū-i di ǃoabase ra mā; tsî khoe-i hîa ga ǀgū-i, ǁî-i ge nî ǃgamhe.

⁸ǃAruǀîb ge ǃKhūba Aronni ǃoa ge mî: Tsî tita, mû, tita ge satsa ti ǁguibadi di ǃûisa ge mā, Israeli ôan di ǃanu xūn hoan ǀkha ta ge ǁîde satsa ge mā ǂkhauǀkhās ǃaroma, tsî sa ôaga ǀamo ǂnûiǂgāse.

⁹Nē-i ge nî sa ǃanun di ǃanu-i xa ǀaesa xu; ǁîn di ǁguibadi hoade ǂûǁguibas ân hoas ǀkha, tsî ǁoreǁguibas ân hoas ǀkha tsî ǀhapiǁguibas ân hoas ǀkha, titan nî mādawasa; ǁîs ge sats tsî sa ôaga ǃanun di ǃanusise nî ība.

¹⁰Hoan xa ǃanu ǃkhais tawats ge ǁîsa nî ǂû; aoreb hoab ge ǁîsa nî ǂû, ǃanu xūses ge nî ība tsi.

¹¹Tsî nēs on ge nî sa: ǁGuibas ǁîn mās dis gongonǁguibadi Israeli ôan didi hoadi ǀkha; tita ge ǁîde satsa ge mā tsî sa ôagu on tsî sa di ôadi on sats ǀkha, ǀamo ǂnûiǂgāse; sa ommi ǃnâ ga ǃanu-i hoa-i ge ǁîsa nî ǂû.

¹²Hoan xa ǃgâi-i olib di-i xa, tsî hoan xa ǃgâi-i, ǂkhon ǂauxûib di-i xa tsî ǃhorob di-i xa, ǁîn ǂgurosaben, ǃKhūban ga mān, ǁîna ta ge tita satsa ge mā.

¹³ǂGuro ǂûn, ǁîn di ǃhūb ǃnâ hân hoan, ǃKhūban nî ūhāban ge nî sa; sa ommi ǃnâ ga ǃanu-i hoa-i ge ǁîsa nî ǂû.

¹⁴Israels ǃnâ ǀâxarehe hân hoan ge nî sa.

¹⁵ǁHāsa ga ǁkhowa-ammi hoab ǁgans hoas dib, ǃKhūban ga ūhābab, khoen xas kao, ǀgoan xas kao, ǁîb ge nî sa; xawe khoen di ǂguroǃnaesabats ge nî oreǃari; ǁkhātits ge ǂguroǃnaesab, ǃanuoǃnâ ǀgoan diba nî ore.

¹⁶Tsî ǁîn ǃnâ ga orehegu, ǁîgats ge ǀgui ǁkhâb â-ise nî ore, sa ǃgôas ǃoa koro sekeldi di marib ama, ǃanusib di sekels ǃoa, ǁîs ge a ǀgamdisi gera.

¹⁷Xawe ǂguroǃnaesabeb gomas dib kao, ǂguroǃnaesabeb gūs dib kao, ǂguroǃnaesabeb piris dib kao, ǁîbats ge ore tide; ǁîgu ge a ǃanu, ǁîgu di ǀaobats ge altars ai nî ǀgapi, tsî ǁîgu di kaubats ge ǀaeǁguibase nî ǂhubi, ǃKhūba ǀnamǀnamsaba ǁamab ase.

¹⁸Tsî ǁgans âgu ge nî sa; gongonǁguibas di ǁkhaib tsî ǁgarab khamin ge nî sa.

¹⁹ǁGuibadi hoadi ǃanu xūn didi, Israeli ôan nî ǃKhūba ǁguibadi, ǁîde ta ge tita satsa ge mā, tsî sa ôaga tsî sa ôade sats ǀkha ǀamo ǂnûiǂgāse; ǀamo ǂōǃgaeǀhaosenses ge ǁîsa nî ība satsa tsî ǃkhommi, sats ǀkha hâba ǃKhūb di ais aiǃâ.

²⁰ǁKhātib ge ǃKhūba Aronni ǃoa ge mî: Sats ge ǁîn di ǃhūb ǃnâ ǀumi tide, tsîts ge ǁîn ǁaegu amǃnâ-e ūhâ tide: Tita ge sa amǃnâta tsî sa ǀumita Israeli ôan ǁaegu.

²¹Tsî mû, Levib ôaga ta ge tita disiǁî ǃân hoana Israels ǃnâ ǀumise ge mā, ǁîgu di ǃoabas hîa gu ra ǃoabas, tentoms ǀhûs dis di ǃoabas ǂama.

²²Tsî Israeli ôan ge ǃaruǀî tentoms ǀhûs disa ǀgū tide, ǁoreba tani tsîn nî ǁōga.

²³Xawe Leviǁîgu ge ǃoabas ǀhûs di tentoms disa ǃoaba tsî nî ǁîn di ǂhanuoǃnâsiba tani; ǀamo ǂnûiǂgāses ge ǁîsa sa ǃhaode nî ība; Israeli ôan ǁaegu gu ǀumi-i xare-e hō tide, ti.

²⁴Disiǁî ǃân Israeli ôan din, ǃKhūban ga ǁguiban ase ǁguiban, ǁîna ta ge tita Leviǁîga ǀumise ge mā; ǁnā-amaga ta ge tita ǁîgu ǃoa ge mî: ǀUmi-i xare-e gu Israeli ôan ǁaegu hō tide, ti.

²⁵Tsî ǃKhūb ge Moseb ǃoa ge mî:

²⁶Sats ge ǁkhāti Leviǁîgu ǀkha ǃhoa tsî ǁîga nî mîba: Israeli ôan xa go ga disiǁî ǃâna ǃkhōǃoao, ǀumise ta ǁîn xa sago ge māna, o go ge ǁîn xa ǁguiba-e ǃKhūba nî ǁguiba, disiǁî ǃâs disiǁîn disa.

²⁷O go ge ǁîsa ǁguibase nî ǃgôabahe, ǃhorob ase dāǃnâǃkhaisa xu tsî ǀoasib ase ǀāǃnâǃoreba xu.

²⁸Nēti go ge ǁkhāti ǃKhūba ǁguiba-e nî ǁguiba sago di disiǁî ǃân, Israeli ôan xa go nî ǃkhōǃoan xa; tsî go ge ǁîn xa ǃKhūba ǁguiba-e prister Aronna nî mā.

²⁹Sago di hōdi hoadi xa go ge ǁguiba-i hoa-e ǃKhūba nî ǁguiba; ǁîn di hoan ǃgâ-ai ǃgâin xa, ā, khaihe hâ ǃâs ân xa.

³⁰Ots ge ǁîn ǃoa nî mî: ǁÎn hoan ǃgâ-ai ǃgâina du ga ǁguibao, on ge ǁîna Leviǁîga hōbasens dāǃnâǃkhais dis ase nî ǃgôabahe, tsî hōbasens ǀāǃnâǃoreb dis ase.

³¹O go ge ǁîna mâ ǃkhaidi hoadi ǃnâ nî ǂû, sago tsî sago ommi din tsîdo, tentoms ǀhûs dis ǃnâ go ra dī ǃoabas di amǃnân a xui-ao.

³²O go ge ǁîn ǃaroma ǁoreba tani tide, ǁîn xa hoan ǃgâ-ai ǃgâina go ga ǁguibao; tsî go ge ǃanu xūn Israels dina ǃanuoǃnâ kai tide, î go tā ǁō ti.