Read Khoekhoegowab Numeri 19 Bible Online

Numeri 19 - Khoekhoegowab bible

Numeri 19

¹ǃAruǀîb ge ǃKhūba Moseb tsî Aronni tsîkha ǀkha ǃhoa tsî ge mî:

²Nēs ge ǂnûiǂgās ǁnā ǂhanub, ǃKhūb ge māb disa, mî raǃâ: ǃHoa re Israeli ôan ǀkha în ǀapa, ūo tsâus, ǂkhôa-e ūhâ tamas, ǃnao-i xare-e ǁîs ai hā tamasa sa tawa ūhā.

³Ots ge ǁîsa pristeri Eleasara nî mā; ob ge ǁîsa nî ūǂoa ǁgoeǃkhais ǃaugaba ǃoa, on ge ais âb aiǃâ nî ǂā si.

⁴Ob ge pristeri Eleasara ǀaob âs xa ǁîb di ǀkhunub ǀkha ū tsî ǀaob âs xa ǂhanuse tentoms ǀhûs dis ǃoagu hû ǃnādi kōse nî ǀgapi.

⁵On ge tsâusa mûra âb aiǃâ nî khauǃkhū; ǁîs di khōb tsî ǁîs di ǁgans tsî ǁîs di ǀaob tsî ǁîs di ǀharab tsînan ge nî khauǃkhū.

⁶Ob ge pristera sederhai-i tsî hisop tsî skarlakǀapab tsîn xa ū tsî ǁîna khaus nē tsâus dis ǁaegu nî aoǂgā.

⁷ǃNubaib ge pristera saran âba ǁā tsî ǁgans âba ǁgam-i ǀkha khō tsî ǁnās khaoǃgâ ǁgoeǃkhais ǃnâ nî ǂgâ; tsî pristeri ge nî ǃanuoǃnâ ǃuis kōse.

⁸Tsî ǁîsa go khauǃkhūb on ge saran âba ǁgam-i ǀkha ǁā tsî ǁgans âba ǁgam-i ǀkha khō tsî nî ǃanuoǃnâ, ǃuis kōse.

⁹Tsî khoeb hîa ǃanub ge tsaob nē tsâus diba ǀhaoǀhao tsî ǁîba ǁgoeǃkhais ǃauga ǃanu ǃkhais ǃnâ nî ǁguibē; tsîb ge ǁîba ǀhaohâb Israeli ôan diba nî sâubahe khōsens di ǁgam-i ǃoa; ǁoreokaisens ge a ǁî.

¹⁰Tsî tsaob nē tsâus diba ga ǀhaoǀhaob, ǁîb ge saran âba ǁā tsî nî ǃanuoǃnâ ǃuis kōse. Nēs ge Israeli ôan tsî ǃhaokhoe-i, ǁîn ǁaegu ǃhaokhoese hâ-i tsîna ǀamo ǂnûiǂgāse nî ība.

¹¹ǁŌ hâ xū-i kas, ǁō hâ soros khoe-i dis kas hoasa ga tsâǀkhā-i, ǁî-i ge hû tsēdi kōse nî ǃanuoǃnâ.

¹²ǃNonaǁî tsēs ai i ge ǁîn ǀkha nî ǁoreokaisen, o i ge hûǁî tsēs ai nî ǃanu; xawe ǃnonaǁî tsēs ai i ga ǁoreokaisen tama io, o i ge hûǁî tsēs ai ǃanu tide.

¹³ǁŌ hâ xū-i kas, ǁō hâ soros, khoe-i ǁō ge i dis kas hoasa ga tsâǀkhā-i tsî ga ǁoreokaisen tama i-i, ǁnā-i ge ǃKhūb di tabernakela ra ǀuriǀuri; ǁnā-amagas ge ǁnā ǀomsa Israela xu nî ǃhomǂuihe; khōsens di ǁgam-i ge ǁî-i ai ǀgapihe tama hâ xui-aos ge nî ǃanuoǃnâ; ǃanuoǃnâsib â-i ge ganupe ǁî-i ai hâ.

¹⁴Nēb ge ǂhanuba, khoe-i ga tentoms ǃnâ ǁō-o: Tentoms ǃnâ ga ǂgâ-i hoa-i tsî tentoms ǃnâ ga hâ-i hoa-i, ǁî-i ge hû tsēdi kōse nî ǃanuoǃnâ.

¹⁵Tsî ǁkhāti mâ ǁkhowa-amsa soa-i hoa-i, ai-i ǃgae-aihe tama hâ-i, ǁî-i ge a ǃanuoǃnâ.

¹⁶Tsî mâ-i hoa-i ǃgarob ai ga gôab ǀkha ǃgamhe hâ-i kas, ǁō hâ-i kas, khoe-i di ǂkhōgu kas, ǀhobas kas hoasa tsâǀkhā-i, ǁî-i ge hû tsēdi kōse nî ǃanuoǃnâ.

¹⁷Tsî ǃanuoǃnâ-i ǂaman ge khauǃkhūhe hâ tsâus, ǁoreokais dis di tsaob xa ū tsî nî ǁîb ai ûitsama ǁgam-e soa-i ǃnâ ǂgā.

¹⁸Tsî khoeb hîa ǃanub ge hisob xa ū tsî ǁgam-i ǃnâ ǂgā tsî nî tentoms tawa tsî sîsenūdan hoan tawa tsî ǀomdi, ǁnāpa hâ kaidi tawa ǀgapi; ǁnās ǁkhās xase ǁî-i, hîa ǂkhō-i kas, ǃgamhe hâ-i kas, ǁō hâ-i kas, ǀhoba-i kas hoasa ge tsâǀkhā-i tawa.

¹⁹Tsî ǃanu khoeb ge ǃanuoǃnâ-e ǃnonaǁî tsēs ai tsî hûǁî tsēs ai nî ǀgapi; tsî hûǁî tsēs aib ge ǁî-e nî ǁoreo kai; o i ge ǁî-i di sarana nî ǁā, tsî ǁgam-i ǀkha khōsen tsî i ge nî ǃanu, ǃuis ai.

²⁰Xawe ǁnā-i hîa ǃanuoǃnâ-i tsî ǁoreokaisen tama ga ī-i, ǁnā-i di ǀoms ge ǀhaohâb di ǁaeguba xu nî ǃhomǂuihe, ǃanusib ǃKhūb diba i ge ǀuriǀuri, khōsens di ǁgam-i ge ǁî-i ai ǀgapihe tama hâ i xui-ao, ǁî-i ge a ǃanuoǃnâ.

²¹Nēs ge ǁîna ǀamo ǂnûiǂgāse nî ība. Tsî ǁgam-i khōsens di-e ga ǀgapi-i, ǁnā-i ge ǁî-i di sarana nî ǁā; ǁkhāti ǁgam-i khōsens di-e ga tsâǀkhā-i ge nî ǃanuoǃnâ, ǃuis kōse.

²²Ā, ǁnā ǃanuoǃnâ-i ga tsâǀkhā-i hoa-i ge nî ǃanuoǃnâ; tsî ǀoms, ǁî-e ga tsâǀkhās ge nî ǃanuoǃnâ, ǃuis kōse.