Read Khoekhoegowab Numeri 2 Bible Online

Numeri 2 - Khoekhoegowab bible

Numeri 2

¹Tsîb ge ǃKhūba Moseb tsî Aronni tsîkha ǃoa ge mî:

²Israeli ôan ge nî ǁgoe, mâb hoaba ǁîb di ǃkhaub ǃgao, ǁnā saodi ǁîb îgu omgu didi ǃoa; tentoms ǀhûs dis ǃoagun ge nî ǁgoeǂnamipe.

³Tsî aiǂoasǀî sores ra ǁhai ǀkhāb ai nî ǁgoen ge Judab ǁgoeǃkhais di ǃkhause nî ī, ǁîn di ǂnubidi ǃoa; tsî Nasonni, Aminadab ôab ge Judab ôagu di ǂamsase nî ī.

⁴Tsî ǁîb di ǂnubis tsî ǁîb di ǃgôahe gen ge hûdisihakaǀaǀoadisi tsî ǃnanikaidisi ge i.

⁵Tsî ǁîb xōǀkhās ge ǃhaos Isaskari disa nî ǁgoe; tsî Nataneli, Suari ôab ge Isaskari ôagu di ǂamsase nî ī.

⁶Tsî ǁîb di ǂnubis tsî ǁîb di ǃgôahe gen ge korodisihakaǀaǀoadisi tsî hakakaidisi ge i.

⁷ǁNās khaoǃgâ Sebulonni di ǃhaos; tsî Eliab, Helonni ôab ge Sebulonni ôagu di ǂamsase nî ī.

⁸Tsî ǁîb di ǂnubis tsî ǁîb di ǃgôahe gen ge korodisihûǀaǀoadisi tsî hakakaidisi ge i.

⁹ǃGôahesan hoan Judab di ǁgoeǃkhais din ge ǀguikaidisi ǁkhaisadisiǃnaniǀaǀoadisi tsî hakakaidisi ge i, ǁîn di ǂnubidi ǃoa, ǁîn ge nî aidoe.

¹⁰ǃKhaub Rubenni ǁgoeǃkhais dib, ǁîn di ǂnubidi ǃoa, ǁîb ge ǃkhawagasǀî nî hâ; tsî Elisuri, Sedeuri ôab ge Rubenni ôagu di ǂamsase nî ī.

¹¹Tsî ǁîb di ǂnubis tsî ǁîb di ǃgôahe gen ge hakadisiǃnaniǀaǀodisi tsî korokaidisi ge i.

¹²Tsî ǁîb xōǀkhās ge ǃhaos Simeonni disa nî ǁgoe; tsî Selumieli, Surisadaib ôab ge Simeonni ôagu di ǂamsase nî ī.

¹³Tsî ǁîb di ǂnubis tsî ǁîb di ǃgôahe gen ge korodisikhoeseǀaǀoadisi tsî ǃnonakaidisi ge i.

¹⁴ǁNās tawa ǃhaos Gadi disa, tsî Eljasab, Dehueli ôab ge Gadi ôagu di ǂamsase nî i.

¹⁵Tsî ǁîb di ǂnubis tsî ǁîb di ǃgôahe gen ge hakadisikoroǀaǀoadisiǃnanikaidisi tsî korodisi ge i.

¹⁶ǃGôahesan Rubenni ǁgoeǃkhais din hoan ge ǀguikaidisikorodisiǀguiǀaǀoadisi tsî hakakaidisikorodisi ge i ǂnubidi ân ǃoa. ǁÎn ge nî doeǃgon ǀgamǁîse.

¹⁷ǁNās khaoǃgâs ge tentoms ǀhûs disa nî doe, Leviǁîn di ǁgoeǃkhaisa ǁîn ǁgoeǃkhais ǁaegu hâǃâ; ǁîn ga ǁgoeo, on ge nauna nî doe, mâ-i hoa-e ǁî-i di ǃkhais ǂhanis tawa ǁîn di ǃkhaugu ǃoa.

¹⁸ǃKhaub, Efraimmi ǁgoeǃkhais dib, ǁîn di ǂnubidi ǃoa, ǁîb ge huriǂoasǀî nî hâ, tsî Elisamab, Amihudi ôab ge Efraimmi ôagu di ǂamsase nî i.

¹⁹Tsî ǁîb di ǂnubis tsî ǁîb di ǃgôahe gen ge hakadisiǀoadisi tsî korokaidisi ge i.

²⁰Tsî ǁîb xōǀkhā ǃhaos Manaseb disa; tsî Gamalieli, Pedasuri ôab ge Manaseb ôagu di ǂamsase nî i.

²¹Tsî ǁîb di ǂnubis tsî ǁîb di ǃgôahe gen ge ǃnonadisiǀgamǀaǀoadisi tsî ǀgamkaidisi ge i.

²²ǁNās tawa Benjaminni di ǃhaosa; tsî Abidanni, Gideonni ôab ge Benjaminni ôagu di ǂamsase nî i.

²³Tsî ǁîb di ǂnubis tsî ǁîb di ǃgôahe gen ge ǃnonadisikoroǀaǀoadisi tsî hakakaidisi ge i.

²⁴ǃGôahesan Efraimmi ǁgoeǃkhais din hoan ge ǀguikaidisiǁkhaisaǀoadisi tsî ǀguikaidisi ge i ǁîn di ǂnubidi ǃoa. Tsîn ge nî doe ǃnonaǁîse.

²⁵ǃKhaub Danni ǁgoeǃkhais dib ge ǀapasǀî nî hâ, ǁîn di ǂnubidi ǃoa; tsî Ahieseri, Amisadaib ôab ge Danni ôagu di ǂamsase nî i.

²⁶Tsî ǁîb di ǂnubis tsî ǁîb di ǃgôahe gen ge ǃnanidisiǀgamǀaǀoadisi tsî hûkaidisi ge i.

²⁷Tsî ǁîs xōǀkhās ge Aseri di ǃhaosa nî ǁgoe; tsî Pagieli, Okranni ôab ge Aseri ôagu di ǂamsase nî i.

²⁸Tsî ǁîb di ǂnubis tsî ǁîb di ǃgôahe gen ge hakadisiǀguiǀaǀoadisi tsî korokaidisi ge i.

²⁹ǁNās tawa Naftalib di ǃhaosa; tsî Ahirab, Enanni ôab ge Naftalib ôagu di ǂamsase nî i.

³⁰Tsî ǁîb di ǂnubis tsî ǁîb di ǃgôahe gen ge korodisiǃnonaǀaǀoadisi tsî hakakaidisi ge i.

³¹ǃGôahe gen, Danni ǁgoeǃkhais din hoan ge ǀguikaidisikorodisihûǀaǀoadisi tsî ǃnanikaidisi ge i. Khaos ain ge nî doe, ǁîn di ǃkhaugu ǃoa.

³²Nēn ge ǃgôahe gen Israeli ôan din, ǁîn îgu di omgu ǃoa; ǃgôahe gen ǁgoeǃkhaidi din hoan, ǁîn di ǂnubidi ǃoa, ǁîn ge ǃnanikaidisi tsî ǃnonaǀoadisikorokaidisi tsî korodisi ge i.

³³Xawe Leviǁîn ge Israeli ôagu ǃnâ ǃgôahe tama ge hâ i, ǃKhūb ge Moseba mîmā xase.

³⁴Tsî Israeli ôan ge ge dī, ǃKhūb ge Moseba mîmān hoan ǃnâ, ǁnātin ge ge ǁgoe ǁîn di ǃkhaugu ǃoa, tsî ǁnātin ge ge doe, mâb hoab ǁîb di ǃhaodi ǃoa, ǁîb îgu di omgu ǃoa.