Read Khoekhoegowab Numeri 20 Bible Online

Numeri 20 - Khoekhoegowab bible

Numeri 20

¹Tsî Israeli ôan di ǀhaohâb hoab ge ǃgaroǃhūb Sinni ǃnâ sīo, ǂguro ǁkhâb ǃnâ, os ge ǁaesa Kades tawa ge hâ. Tsî Miriams ge ǁnāpa ǁō tsî ǁnāpa ge ǁkhōhe.

²Tsî ǁgam-i ge ǀhaohâba ǀkhaiba ge i; on ge Moseb tsî Aronni ǃoagu ge ǀhû.

³Tsî ǁaes ge Moseb ǀkha ge ǂnoagu, tsîn ge ge mî: Î da ga ǁō hâ i, sida di ǃgâsagu ge ǃKhūb di ais aiǃâ ǁō ǃnubai.

⁴Tsî tare xū-i ǃaroma kho kha ǀhaohâb ǃKhūb diba nē ǃgaroǃhūb ǃnâ go ūhā, nēpa da nî ǁōga, sida tsî sida di ǀgoan tsîda?

⁵Tsî tare xū-i ǃaroma kho kha ge doeǃapa kai da Egipteba xu, nē tsū ǃkhais tawa kho nî ūhā dase? Tsoroǃkhai-i ge a ǀkhai, tsî ǀnomahais ǂûn tsî ǂauxûiǂûhais ǂûn tsî granatǂûn ge a ǀkhai; tsî āǁgam-i ge ǁkhāti a ǀkhai.

⁶ǃNubai kha ge Moseb tsî Aronni tsîkha ǀhaohâb di aisa xu tentoms ǀhûs dis di dao-ams ǃoa ge ǃgû, tsî kha ge aira âkha ai ge ǁnā; tsî ǂkhaisib ǃKhūb dib ge ǁîkha tawa ge ǂhai.

⁷Tsî ǃKhūb ge Moseb ǃoa ge mî:

⁸Haisa ū îts ǀhaohâba ǀhaoǀhao, sats tsî Aronni, sa ǃgâsab tsîkho, î kho ǃhaob, ǁîn di mûdi aiǃâ hâb ǀkha ǃhoa, ob ge ǁîna ǁgammi âba nî mā; nētits ge ǁîna ǁgam-e nî ūǀkhība ǃhaoba xu, tsîts ge ǀhaohâb tsî ǀgoan âna nî āsi.

⁹ǁGoasib ge Moseba haisa ge ū ǃKhūb di ais aiǃâba xu, ǁîb ge mîmā bi xase.

¹⁰O kha ge Moseb tsî Aronni tsîkha ǀhaohâba ǃhaob aiǃâ ge ǀhaoǀhao, tsîb ge ǁîna ǃoa ge mî: ǃGâ ǁnâi re, sa ǁnâuǁoado, ǁgam-e xare ūǀkhība du khom nî?

¹¹ǃNubaib ge Moseba ǃommi âba ǀhōkhâi tsî ǃhaoba ǀgam ǃnāra kōse hais âb ǀkha ge ǂnau, o-i ge ǁgam-e ǀoasase ge ǀkhī, ǀhaohâb ge āse tsî ǁîn di ǀgoan ona.

¹²Ob ge ǃKhūba Moseb tsî Aronni tsîkha ǃoa ge mî: Tita kho ge ǂgom tama i amaga, Israeli ôan di mûǁae kho nî tita khaise, ǁnā-amaga kho ge sakho nē ǀhaohâba ūǂgā tide ǃhūb, tita ge ǁîna māb ǃnâ.

¹³Nēgu ge ǁgamgu Meribas digu, ǁîgu ǃaroman ge Israeli ôana ǃKhūb ǀkha ǂnoaguga; tsîb ge ǁîba ǁîn ǃnâ ge khaihe.

¹⁴ǁNās khaoǃgâb ge Moseba Kadesa xu sîsabega ge sî Edommi di gao-aob ǃoa, mî rase: Nētib ra mî sa ǃgâsab Israela: Sats ge a ǂan ǃgomsigu sida ge ǂgâǃnâga.

¹⁵Mati gu ge sida di îga Egipteb ǃoa doeǁgôa tsî mati da ge ǂgui tsēdi kōse Egipteb ǃnâ ǁan ǃkhaisa, tsî Egipteǁîn ge sida tawa tsî sida îgu tawa ge tsūdī.

¹⁶ǃNubai da ge ǃKhūb ǃoa ge ǂgai, ob ge ǁîba ǀhomǃgāb âba sî tsî Egipteba xu ge ǂgaeǂguiǂui da; tsî mû, sida ge Kades, sa ǀkharigu di ǀkhâuǀams tawa ǁgoe ǃās ai hâ.

¹⁷A da sa ǃhūba doeǃganu re, ǃhanaba-ū da ge doeǃganu tide tsî ǂauxûiǂûǃhanaga-ū, tsî da ge ǁkhāti tsaugu di ǁgam-e ā tide; gao-aob di daob ai da ge nî ǃgû, ǂgō da ge tide, amǀkhāb ais kao, ǁareǀkhāb ais kao, sa ǀkhariga da nî doe-īǀkhās kōse.

¹⁸Xawe Edommi ge ǁîb ǃoa ge mî: Tita-ūts ge doeǃganu tide, î ta tā ǀnîsi gôab ǀkha ǃgûǃoa tsi.

¹⁹On ge Israeli ôana ǁîb ǃoa ge mî: Sida ge kai daob ǀkha nî doe, tsî sida ga sa ǁgam-e āo, tita tsî ti ǀgoan tsîda, o ta ge ǁî-e nî matare; ǀnî xū-e ta dī tide, ǀnūǃgûǃganus ǀguis.

²⁰Xaweb ge ǁîba ge mî: Doeǃgâuts ge tide. Tsî Edommi ge ǁîba ge ǃgûǂoaǃoa, kai ǁaes ǀkha tsî ǀgaisa ǃommi ǀkha.

²¹Nētib ge Edomma ge ǂkhā, Israelsa ǀkharib âba-ū doeǃganu kaisa; ǁnā-amagas ge Israelsa ǁîba xu ge ǂgō.

²²ǁGoasin ge Kadesa xu ge dāǁnâ; on ge Israeli ôan, ǀhaohâb hoaba, Horǃhommi tawa ge sī,

²³tsî ǃKhūb ge Moseb tsî Aronni tsîkha ǃoa ge ǃhoa, Horǃhommi, Edomǃhūb di ǀkharib tawa, mî raǃâ:

²⁴Aronni ge ǁîb di ǁaes tawa nî ǀhaoǀhaohe, ǁnā ǃhūb, Israeli ôana ta ge māb ǃnâb ge sī tide xui-ao, sakho ge ti mîmāsa ǁnâuǀnam tama ge i amaga, Meribas di ǁgamgu tawa.

²⁵Ū Aronni tsî Eleasari, ǁîb di ôaba, îts ǁîkha Horǃhommi ai ǃapa kai.

²⁶Îts Aronna saran âba ǂgaeǂuiǀkhā îts ǁîna Eleasari, ǁîb ôaba ǂgaeǂgā; Aronni ge ǀhaoǀhaohe tsî ǁnāpa nîra ǁō xuige.

²⁷Ob ge Moseba ge dī, ǃKhūb ge mîmā xase; Horǃhommi kōse gu ge ǀhaohâb hoab di mûǁae ge ǃapa xui-ao.

²⁸Tsî Moseb ge Aronna saran âba ǂgaeǂuiǀkhā tsî ǁîna ǁîb di ôab Eleasara ge ǂgaeǂgā; tsî Aronni ge ǁnāpa ge ǁō, ǃhommi di ǂaob ai. ǃNubai kha ge Moseb tsî Eleasari tsîkha ǁnā ǃhomma xu ge ǁgôaxa.

²⁹Tsî ǀhaohâb ge mûo, Aronni a ǀkhai ǃkhaisa, on ge Aronna ǃnonadisi tsēde ge āba Israeli ommi hoab dina.