Read Khoekhoegowab Numeri 21 Bible Online

Numeri 21 - Khoekhoegowab bible

Numeri 21

¹Tsî Kanaanǁîb, Arads di gao-aob, ǃkhawagasǀî ǁan hâb ge ǁnâuo, Israeli ǃkhē-aogu Atarims di daoba-ū ra hā ǃkhaisa, ob ge Israeli ǃoagu ǃkham tsî ǀnîgu âna ǃkhōsase ge ūǃgû.

²Ob ge Israela ǃKhūba nū-e nūba tsî ge mî: Nē ǁaesats ga ti ǃommi ǃnâ māǃario, o ta ge ǃādi âna nî hîkākā.

³Ob ge ǃKhūba Israeli di domma ǁnâu-am tsî Kanaanǁîna ge māǁnâ; tsîb ge ǁîn tsî ǃādi ân tsîna ge hîǀhuru, tsîb ge ǁnā ǃkhaisa Horma ti ge ǂgai.

⁴ǃNubain ge Horǃhomma xu ǂĀxahurib di daoba-ū ge doe, Edommi di ǃhūban nî doe-īǀkhāse; xawe ǁaes di ǀoms ge daob xa ge ǀara.

⁵Os ge ǁaesa Elob tsî Moseb tsîkha ǃoagu gere ǃhoa: Tarexa kho kha sida Egipteba xu ge doeǃapa kai, nē ǃgaroǃhūb ǃnâ da nî ǁōga? Nēpa i kom pere-e a ǀkhaio, tsî ǁgam-i on, tsî sida di ǀoms kom nē xū tama ǂû-i xa ra uixao.

⁶ǃNubaib ge ǃKhūba ǀaexa ǀaona ǁaes ǃnâ ge sî, ǁîn ge ǁaesa ge nâ; on ge ǂgui khoen Israeli dina ge ǁō.

⁷ǁNā-amagas ge ǁaesa Moseb tawa hā tsî ge mî: Sida ge go ǁore, ǃKhūb ǃoagu tsî sa ǃoagu da goro ǃhoa amaga, xuige ǀgore ǃKhūba îb nē ǀaona sida xu ūbē. ǃNubaib ge Moseba ǁaesa ge ǀgoreba.

⁸Ob ge ǃKhūba Moseb ǃoa ge mî: ǀAexa ǀao-e dībasen îts ǁî-e hai-i ai ǂnûi; o i ge nîra ī, nâhe ka-i hoa-i ge ǁî-e i ga kō ǃnubai nîra ûi.

⁹Ob ge Moseba ǂaib ǀkha ǀao-e dī tsî hai-i ai ge mâi i; o i ge ge ī, khoe-i ga ǀao-i xa nâheo, o i ge ǂaiǀaoba kō tsî gere ûi.

¹⁰Tsî Israeli ôan ge dāǁnâ tsî Obots tawa sī ge ǁgoe.

¹¹ǁNās khaoǃgân ge Obotsa xu dāǁnâ tsî ǃnomdi Abarims didi tawa ǃgaroǃhūb ǃnâ sī ge ǁgoe, Moab ǃoa-ai, aiǂoasǀî.

¹²ǁNāpa xun ge dāǁnâ tsî ǃārob Seredi tawa sī ge ǁgoe.

¹³ǁNāpa xun ge dāǁnâ tsî Arnonni, ǃgaroǃhūb ǃnâ hâb, Amorǁîn di ǀkhariga xu ra ǂoaxab tawa sī ge ǁgoe; Arnonni ge Moab di ǀkhariba xui-ao, Moab tsî Amorǁîn ǁaegu.

¹⁴ǁNā-amaga i ge ra mîhe ǂkhanis ǃKhūb di torogu dis ǃnâ: Wahebǀî Sufas ǃnâ tsî ǃārob Arnonniǀî,

¹⁵tsî ǃārogu di dâuǂoas Ari di hâǃkhaisǀî ra ǂoas tsî Moab di ǀkharib tawa ra ǃgâsens.

¹⁶Tsî ǁnāpa xun ge Beers ǃoa ge ǃgû. Nēs ge ǁnā tsaus, ǃKhūb ge ǁîs xa Moseb ǃoa mîsa: Khoena ǀhaoǀhao î ta tita ǁîna ǁgam-e mā.

¹⁷ǁNāǃnubais ge Israelǁaesa nē ǁnaetsana-e ge ǁnae: Urikhâi, sa tsause, î du ǁîs xa saogubes ai ǁnae.

¹⁸Sa tsaus, gaosagu xa khaohe hâs, ǁaes di ǃgôahesagu xa xoraǃgamǃgamhe hâs, ǂhanub di mā-aoba xu ǁîn di haidi ǀkha. Tsî ǃgaroǃhūba xun ge Matanas ǃoa ge doe.

¹⁹Tsî Matanasa xu Nahaliels ǃoa; tsî Nahalielsa xu Bamots kōse;

²⁰tsî Bamotsa xu ǁnā ǃgoaǃnāb, Moab di ǃgarob ǃnâ hâb, Pisgaǀgapib tawa ǁgoeb, ǃgaroǃhūbǀî ra kōb kōse.

²¹ǃNubaib ge Israela sîsabega ge sî Sihonni, Amorǁîn di gao-aob ǃoa, mî rase:

²²A ta koma sa ǃhūba doeǃganu. Sida ge ǂgō tide ǃhanagu ǃnâs kao, ǂauxûiǂûǃhanagu ǃnâs kao; tsaudi di ǁgam-e da ge ā tide; gao-aob di daob ai da ge nî ǃgû, sa ǃhūb di ǀkhariga da nî doe-īǀkhās kōse.

²³Xawe Sihonni ge Israela mā-am tama, ǁîb di ǃhūb di ǀkhariba doe-īǀkhāsa, tsî Sihonni ge ǁaes âba ǀhaoǀhao tsî ǂoa tsî Israelsa ǃgaroǃhūb ǃnâ ge ǃgûǃoa; tsîb ge Jahas tawa sī tsî Israels ǀkha ge ǃkham:

²⁴Xawe Israels ge ǁîba gôab di ǀāb ǀkha ǂnau tsî ǃhūb âba ǀumixūse ge ū Arnonna xu Jabokǃāb kōse, Amonni ôan kōse: Amonni ôan di ǀkharib ge ǁaposa ge i xui-ao.

²⁵Nētib ge Israela ǁnā ǃādi hoade ge ū; ob ge Israela Amorǁîn di ǃādi hoadi ǃnâ ge ǁan, Hesbons ǃnâ tsî ǁîs ǃnaga mā ǃādi hoadi ǃnâ.

²⁶Hesbons ge Sihonni, Amorǁîn gao-aob di ǃā ge i xui-ao; tsîb ge ǁîba Moabǁîn di gao-aob ǃoagu ǃkham tsî ǃhūb âba ge ū ǁîn di ǃomǁaeba xu Arnonni kōse.

²⁷ǁNā-amagan ra mî ǂkhoamîde ra ǃhoana: Hā Hesbons tawa; as ǂnubihe tsî ǁapoǁapohe ǃās Sihonni disa!

²⁸ǀAe-i ge ge ǂoa Hesbonsa xu, ǁhabu-e Sihonni di ǃāsa xu; ǁî-i ge ge hapu Ars Moabǁîn disa tsî ǀhonkhoegu Arnonni ǀgapigu diga.

²⁹Tsūba tsi, Moatse, sas, Kemob di kā hâ ǁaese, ǁîb ge ǁîb di ôagu, ǁō ge gu, tsî ǁîb di ôadi tsîna ge mā ǃkhōsis ǃnâ Sihonni, Amorǁîn di gao-aoba.

³⁰Tsî sida ge ǁîna ge dā; Hesbons ge a kā Dibons kōse; tsî sida ge ǁîna ge hîǀhuru Nofas kōse, Medebas kōse ra sīsa.

³¹Nētis ge Israelsa Amorǁîn di ǃhūb ǃnâ ge ǁan.

³²ǁNās khaoǃgâb ge Moseba khoega ge sî, Jasersab nî ǃkhē kaise; tsîn ge ǁîn di ǃnaga mâ ǃāde ge ū; tsîb ge Amorǁîn, ǁnāpa ǁan hâna ge doeǁgaǂui ūn hâsa xu.

³³ǃNubain ge ǂnan tsî Basanni di daoba-ū ge doeǃapa, tsî Ogi, Basanni di gao-aob ge ǁîna ge ǃgûǃoa, ǁîb tsî ǁaes âb hoab ǃkhams ǁga Edreis tawa.

³⁴Ob ge ǃKhūba Moseb ǃoa ge mî: Tā ǃao bi, sa ǃomǁae ta ge tita ge mā bi xuige, tsî ǁaes âb tsî ǃhūb âb on, tsîts ge ǁîba nî dī Sihonni, Amorǁîn di gao-aob, Hesbons tawa ǁan hâbats ge dī khami.

³⁵Tsîn ge ǁîba ge ǂnau, tsî ǁîb di ôagu tsî ǁîb di ǁaes tsîn, khoe-i xare-i ge ǁîba ǃgauba tama is kōse, tsîn ge ǃhūb âba ǀumise ge ū.