Read Khoekhoegowab Numeri 22 Bible Online

Numeri 22 - Khoekhoegowab bible

Numeri 22

¹ǁNās khaoǃgân ge Israeli ôana dāǁnâ tsî Moab ǃaub di ǂgādi ai sī ge ǁgoe, Jordanǃāb nēxaǃani Jerixos tawa.

²Tsî Balaki, Sipori ôab ge mû, Israels Amorǁîn tawa ge dīn hoana,

³ob ge Moaba nē ǁaes di ais aiǃâ kaise ge ǃao, kaisen ge ǂgui i xui-ao; ob ge Moaba ge ǀkhū Israeli ôan di ais aiǃâ.

⁴ǁNā-amagab ge Moaba Midiaǁîn di kaigu ǃoa ge mî: Ob ge nē ǀhaohâba nî hapu sida ǂnamipe hân hoana, gomab ra ǃaub di ǃam xūna hapu khami. ǁNā ǁaeb ǁkhāb aib ge Balaki, Sipori ôaba, Moabǁîn di gao-ao ge i.

⁵ǁÎb ge sîsabega ge sî Bileammi, Beori ôab, Petors, ǃāb amǃgâ ǁgoes, ǁîb ǁaes di ôan di ǃhūb ǃnâ hâs ǃoa, ǁîba nî ǂgaise, mî raǃâ: Mû, ǁae-i ge Egipteba xu go doeǂoaxa; mû, ǃhūb di ǃkhareban ge go ǃgū-ai, tsîn ge ǂhanuse tita ǃoa-ai hā ǁgoe.

⁶ǁNâi hā satsa îts nē ǁaesa ǀâxarexūba te re, tita xas a ǀgaisa xuige; ǀnîsi ta ǁîsa nî ǂnau ǁkhā, ǀnîsi ǁîsa ǃhūba xu doeǁgaǂui ǁkhā; ǂan ta a, sats ga ǀkhae-i ge ǀkhaehe hâ-e, tsî sats ga ǀâxarexū-i ge ǀâxarexuhe hâ-e xuige.

⁷ǃNubai gu ge kaigu Moabǁîn digu tsî kaigu Midiaǁîn digu tsîga ge ǃgû tsî gu ge amǃnâs aimûǀgarudi disa ǁîgu ǃomǁae ge ūhâ i; nēti gu ge Bileammi tawa sī tsî Balaki di mîde ge mîba bi.

⁸Ob ge ǁîgu ǃoa ge mî: Nē tsuxuba go hâǁgoa re, o ta ge ǃereamsa nî ūhāba go, ǃKhūb nî tita ǃoa ǃhoa khami. ǃNubai gu ge Moab di gaosabega Bileammi ǀkha ge hâ.

⁹Ob ge Eloba Bileammi tawa hā tsî: Mâ khoega sa tawa hâga? ti ge mî.

¹⁰Ob ge Bileamma Elob ǃoa ge mî: Balaki, Sipori ôab, Moabǁîn di gao-aob ge ǁîga tita ǃoa go sî, mî raǃâ:

¹¹Mû, ǁae-i ge Egipteba xu doeǂoaxa tsî ǃhūb di aisa ge ǃgū-ai; hā koma îts ǁîsa ǀâxarexūba te; ǀnîsi ta nî ǁîna ǃkhamū tsî ǁîna doeǁgaǂui ǁkhā.

¹²ǃNubaib ge Eloba Bileammi ǃoa ge mî: Sats ge ǁîgu ǀkha ǃgû tide; sats ge ǁnā ǁaesa ǀâxare tide, ǀkhaehen hâ amaga.

¹³Ob ge Bileamma ǃnauǁgoaga khâi tsî Balaki gaosagu ǃoa ge mî: ǃGûsī sago di ǃhūb ǃoa, ǃKhūb ge sago ǀkha ǃgûsa mā-amsa te tama hâ.

¹⁴O gu ge gaosagu Moabǁîn diga khâi tsî Balaki tawa ge sī, tsî gu ge ge mî: Bileammi ge sige ǀkha ǃgûsa ge ǂkhā.

¹⁵Tsî Balaki ge ǃaruǀî gaosaga ge sî, naugu ge ī is xa ǂgui tsî ǀgapiǃgôasaga.

¹⁶ǁÎgu ge Bileammi tawa sī tsî ǁîb ǃoa ge mî: Nētib ra Balaki, Sipori ôaba mî: Tā ǂhanikaisen, îts ti tawa hā.

¹⁷Kaise, kaise ta ge nî ǃgôa tsi, tsî mîǀî tets ka xū-i hoa-e ta nî dī xuige; hā ǁnâi îts nē ǁaesa ǀâxarexūba te!

¹⁸ǃNubaib ge Bileamma ǃeream tsî Balaki di ǃgāgu ǃoa ge mî: Balaki ga ǀhaiǀurib tsî ǃhuniǀurib xa ǀoa hâ ommi âba mā te xawe ta ǃKhūb, ti Elob di mîmāsa a ǃûǂam ǁoa, ǂkhari xū-i kas, kai xū-i kas hoasa dīsa.

¹⁹Î go ǁnâi ǁkhāti nē tsuxuba nēpa hâǁgoa, î ta ǂan tare xū-eb nî ǃKhūba ǃaruǀî tita ǁga mî ǃkhaisa.

²⁰Ob ge Eloba tsuxuba Bileammi tawa hā tsî ǁîb ǃoa ge mî: ǁNā aogu go hā, satsa gu nî ǂgaise, xuige khâi îts ǁîgu ǀkha ǃgû; tsî ti ī, xawets ge satsa mîba tsi ta nî xū-i ǀgui-e nî dī.

²¹ǃNubaib ge Bileamma ǃnauǁgoaga khâi tsî esels âba ge ǃgaeǃgâ, tsîb ge Moab di gaosagu ǀkha ge ǃgû.

²²Ob ge Elob di ǁaiba ge khau, ǃgûb go ǃkhais xa; tsî ǀhomǃgāb ǃKhūb dib ge daob ǃnâ sī ge mâ ǁîb di mâǃoasabese; tsî Bileammi ge esels âb ai ge ǃgapi, tsî ǀgam ǃgākha âb ge ǁîb ǀkha ge hâ i.

²³Tsî esels ge ǃKhūb di ǀhomǃgāba daob ǃnâ ge mûmâ, ǂgaeǂuihesa gôab âba ǁîb ǃomǁae ūhâse; ǁnā-amagas ge eselsa daoba xu ǂgō tsî ǃaub ǃnâ ge ǃgû. ǁGoasib ge Bileamma eselsa ge ǂnau, ǁîsab nî ǁkhawa daob ǃoa ǁkhae-unuga.

²⁴Xawe ǀhomǃgāb ǃKhūb dib ge ǂauxûiǂûǃhanagu di daob ǃnâ sī ge mâ, ǂnubiǂgoaba nē ǀkhāb ai tsî nau ǀkhāb ai ūhâba.

²⁵Tsî esels ge ǃKhūb di ǀhomǃgāba mûo, os ge ǂgoab tawa ǁnûsen tsî Bileammi ǂaisa ǂgoab tawa ge ǁgâiǃgani; xui-aob ge ǁîsa ge ǂnauhâhâ.

²⁶Ob ge ǃKhūb di ǀhomǃgāba aiǃâb ǃoa ǃgû tsî ǂō ǃkhais, ǁîs tawa i amǀkhābǀîs kas, ǁareǀkhābǀîs kas hoasa ǂgōǃkhai-e a ǀkhais tawa sī ge mâ.

²⁷Tsî esels ge ǃKhūb di ǀhomǃgāba mûo, os ge ge ǁgoe Bileammi ǃnaga; ob ge ǁaib Bileammi diba ge khâi, tsîb ge eselsa hai-i ǀkha ge ǂnau.

²⁸Ob ge ǃKhūba esels di amsa ge khowa, Bileammi ǃoa ge mîsa: Tare xū-e ta kha dī tsi hâ, ots nēsi ǃnona ǃnādi kōse go ǂnau te?

²⁹ǃNubaib ge Bileamma esels ǃoa ge mî: Titas goro ǃhō amaga; gôa-e ta ga ti ǃomǁae ūhâo, o ta kom ga ǃgam si hâo.

³⁰Os ge eselsa Bileammi ǃoa ge mî: Sa esel tama ta ǁnâi tita, ǁî ta aits gere ǃgapi ta, ti ǀhonkhoe kaits gesa xu, nētsēs kōse? Xare ǁnaeti ta ge hâ i, ǁnāti sîsenū tsisa? Ob ge: Hî-î, ti ge mî.

³¹ǃNubaib ge ǃKhūba Bileammi di mûra ge khowa, ob ge ǃKhūb di ǀhomǃgāba daob ǃnâ, ǂgaeǂuihesa gôabab ǃomǁae ūhâse ge mûmâ; ǁnā-amagab ge danas âba ǃgam tsî ais âb ai ge ǁnāǁgôa.

³²ǃNubaib ge ǀhomǃgāb ǃKhūb diba ǁîb ǃoa ge mî: Tare xū-i ǃaromats kha ǁnâi nēsi sa eselsa ǃnona ǃnādi kōse go ǂnau? Mû, tita ge go ǃgûǂoa sa mâǃoasabese, nē daob ge tita xu ra ǁgôa amaga.

³³Xawe esels ge tita mû tsî ǃnona ǃnādi kōse ti ais aiǃâba xu go ǂgō; ti ais aiǃâba xus ga ǂgō tama hâ io, o ta ga ǁkhāti satsa nēsi ǃgam tsî ǁîsa ûitsamase sâu hâ i.

³⁴ǃNubaib ge Bileamma ǃKhūb di ǀhomǃgāb ǃoa ge mî: ǁOre ta go, ǀū ta go i xui-ao, sats daob ǃnâ mâ ǃkhaisa; tsî nēsi sa mûǁae-i ga ǂkhaba io, î ta oa.

³⁵Ob ge ǃKhūb di ǀhomǃgāba Bileammi ǃoa ge mî: ǃGû nē aogu ǀkha; xawets ge ǁnā mîs, tita nî mîba tsis ǀguisa nî ǃhoa. Nētib ge Bileamma Balaki di gaosagu ǀkha ge ǃgû.

³⁶Tsî Balaki ge ǁnâuo, Bileammi ra hā ǃkhaisa, ob ge ǃās Moabǁîn dis, Arnonni di ǀkharib ai ǁgoes, ǀkharib di ǀkhâuǀams tawa hâs kōse ge ǃgûǃoa bi.

³⁷Ob ge Balaka Bileammi ǃoa ge mî: Mû, ǁkhōse ta kha ǁnâi sa ǃoa sī tama hâ, ǂgai tsi ta nîse? Tarexats kha ǁnâi hā te tama hâ? Xare ǂhanuse ǃgôa tsi ǁkhā tama ta hâ tita?

³⁸Ob ge Bileamma Balaki ǃoa ge mî: Mû, tita ge sa ǃoa go hā; xare xū-e mî ǁkhā ta a tita? ǁNā mîs, Elob nî ti ams ǃnâ ǁguis, ǁîs ǀguisa ta nî ǃhoa.

³⁹Ob ge Bileamma Balaki ǀkha ge ǃgû; tsî kha ge Kirjat-Husots tawa ge sī.

⁴⁰ǃNubaib ge Balaka goman tsî gūn tsîna gere ǂā; tsîb ge ǁîn xa Bileammi tsî gaosagu, ǁîb ǀkha hâgu ǃoa ge sî.

⁴¹O i ge ǁgoas ai ge ī, Balaki ge Bileamma ū tsî Baali di ǀgapigu ai ūǃapa ǃkhaisa, ǁnāpa xub nî ǁaes di ǀkhâuǀamsa mûse.