Read Khoekhoegowab Numeri 23 Bible Online

Numeri 23 - Khoekhoegowab bible

Numeri 23

¹ǃNubaib ge Bileamma Balaki ǃoa ge mî: Hû altarde nēpa ǂnubiba te, îts hû gomagu tsî hû bairaga nēpa ǁāǁāba te.

²Ob ge Balaka ge dī, Bileammi go ǃhoa khami; o kha ge Balaki tsî Bileammi tsîkha mâ altars hoas ai ǀgui gomab tsî ǀgui bairab tsîkha ge ǁguiba.

³ǃNubaib ge Bileamma Balaki ǃoa ge mî: Hā îts mâ sa khauǁguibas tawa, î ta tita ǃgû, ǀnîsib ge ǃKhūba tita nî ǃoa; tsî ǁîb ga ǂhaiǂhaiba te xū-i, ǁnā-e ta ge tita nî ǂanǂan tsi. ǁGoasib ge ǀgapib ai ge ǃgûǃapa.

⁴Tsî Elob ge Bileamma ǃoao, ob ge ǁîba ǁîb ǃoa ge mî: Hû altarde ǂhomi, tsî ta ge mâ altars hoas ai ǀgui ǁgōb tsî ǀgui bairab tsîkha go ǁguiba.

⁵ǃNubaib ge ǃKhūba mîsa Bileammi di ams ǃnâ ǁgui tsî ge mî: Oa Balaki ǃoa îts ǁnāti ǃhoa.

⁶Tsî ǁîb ǃoab ge ǃhobao, mû, ob ge khauǁguibas âb tawa ge mâ i, ǁîb tsî Moab di gaosagu hoagu ona.

⁷ǃNubaib ge ǂkhoamîs âba tsoatsoa tsî ge mî: Siriaba xub ge Balaki, Moabǁîn di gao-aoba tita go ūhā, ǃhommi aiǂoasǀî ǁgoeba xu, mî raǃâ: Hā îts koma Jakoba ǀâxarexūba te, hā îts Israela ǀao!

⁸Mati ta ǁnâi nî ǀâxare ǁnā-i, Elob ǀâxare tama-e? Tsî mati ta nî ǀao, ǁnā-i ǃKhūb ǀao tama-e?

⁹ǃHaogu di ǀgapiba xu ta ge ǁîsa ra mû, ǃnomde xu ta ge ǁîsa ra ǃgapaǀî; mû, ǁnā ǁaes ge ǀguri nîra ǁan, tsîn ge ǀūben ǀkha ǃgôahe tide.

¹⁰Tari-e nî ǃgôa Jakob di tsaraba? Tsî ǀgaus hakaǁî ǃâs Israels disa? As ti ǀomsa ǁō ǂhanu-aib di ǁōba, tsî ti ǀamsa as ǁîb dis khami ī.

¹¹ǃNubaib ge Balaka Bileammi ǃoa ge mî: Tare xū-ets kha go dī te? Tita ge go ū tsi, ti khākhoenats nî ǀâxarega, tsî mû, sats ge ǁîna go ǀkhaeǃari.

¹²Ob ge ǃeream tsî ge mî: Ti ams ǃnâb ra ǃKhūba ǁgui xūna ǃhoasa ta ǂanbasen tide?

¹³Ob ge Balaka ǁîb ǃoa ge mî: Tita ǀkha ǀkhara ǃkhais tawa sī, ǁîsa xuts nî ǁîba mûs; xawets ge ǀkhâuǀams âb ǀguisa nî mû tsî hoaragase mû bi tide, îts ǁnāpa xu Israela ǀâxarexūba te.

¹⁴Nētib ge ǁîba Sofims di ǃgarob ǃoa ge ū, Pisgab di ǀgapib ai; tsîb ge hû altarde ge ǂnubi, tsîb ge mâ altars hoab ai ǀgui ǁgōb tsî ǀgui bairab tsîkha ge ǁguiba.

¹⁵ǃNubaib ge ǁîba Balaki ǃoa ge mî: Nēpa mâ sa khauǁguibas tawa, î ta tita ǁnāpa ǁîba ǃoa.

¹⁶Tsî ǃKhūb ge Bileamma ǃoao, ob ge ǁîb di mîsa ams âb ǃnâ ge ǁgui, tsîb ge ǁîba ge mîǀî: Oa Balaki ǃoa îts ǁnāti ǃhoa.

¹⁷Tsî ǁîb tawab ge sīo, mû, ob ge ǁguibas âb tawa ge mâ i tsî Moabǁîn di gaosaga ǁîb tawa. Ob ge Balaka ǁîb ǃoa ge mî: Tare xū-eb go mî ǃKhūba?

¹⁸ǃNubaib ge ǂkhoamîs âba tsoatsoa tsî ge mî: Khâi, Balaktse, îts ǁnâu! ǂŌ sa ǂgaera tiǀî, Sipori ôatse!

¹⁹Elob ge khoe tama hâ, ǂhumib nîga, tsî khoenôa tama hâ, ǃhausenni nîga. Xū-e mî tsîb ǁnâi dī tide? Xū-e ǃhoa tsîb ǁnâi ǁapoǁapo tide?

²⁰Mû, ǀkhae ta nîsa ta go ǃkhōǃoa; tsî ǁîb ra ǀkhae amaga ta ge tita ǁîsa a ǁkhae ǁoa.

²¹ǁÎb ge kōǀî tama hâ Jakob di ǂhanuoǃnâsiba, tsîb ge ǁkhāti kōǀî tama hâ Israeli di ǂkhabasiba. ǃKhūb, ǁîb di Elob ge ǁîb ǀkha hâ, tsî ǀōb gao-aob dib ge ǁîb tawa hâ.

²²Elob ge ǁîna Egipteba xu ge ǂgaeǂguiǂui; ǁîb ge ǃgarogoma-i di ǀgaiba ūhâ.

²³ǃGaidī-i xare-i ge a ǀkhai Jakob ǃoagu, tsî aimûǀgaru-i xare-i ge Israeli ǃoagu a ǀkhai. ǁAeb aib ge Jakoba nî ǂhôahe tsî Israela Elob ra dī xūna.

²⁴Kō, ǁaes ge kaira xammi xase nîra khâi, tsîs ge nîra khuisen ǂkham xammi xase. ǁÎs ge ǁgoe tide, ǀâ xū-i xas nî ǂû tsî ǃgamhe hâ-i di ǀaob xas nî ās kōse.

²⁵ǃNubaib ge Balaka Bileammi ǃoa ge mî: ǀÂxares kas, ǀkhaes kas hoasats ge hî tide.

²⁶Xawe Bileammi ge ǃeream tsî Balaki ǃoa ge mî: Mîba tsi tama ta hâ, mî raǃâ: ǃKhūb ga mî xūn hoana ta ge tita nî dī?

²⁷ǃAruǀîb ge Balaka Bileammi ǃoa ge mî: Hā re, î ta ǀkhara ǃkhais ǃoa ūsī tsi re; ǀnîsi i ge nî ǂhanu ǁnā Elob mûǁae, ǁnāpa xuts nî ǁîna ǀâxarexūba te ǃkhaisa.

²⁸ǃNubaib ge Balaka Bileamma ge ūsī, Peori di ǀgapib, ǃgaroǃhūbǀî ra ǂuib tawa.

²⁹Ob ge Bileamma Balaki ǃoa ge mî: Nēpa hû altarde ǂnubiba te, îts nēpa hû ǁgōgu tsî hû bairagu tsîga ǁāǁā.

³⁰Ob ge Balaka ge dī, Bileammi ge mî xase; tsîb ge mâ altars hoab ai ǀgui ǁgōb tsî ǀgui bairab tsîkha ge ǁguiba.