Read Khoekhoegowab Numeri 24 Bible Online

Numeri 24 - Khoekhoegowab bible

Numeri 24

¹Tsî Bileammi ge mû, ǃKhūb mûǁae i a ǃgâi ǃkhaisa, Israelab ra ǀkhaesa, ob ge nē ǃnās ai ǃgûsī tama, nau ǃnādi aib ge dī xase, ǃgaidīdeb nî ôase, tsîb ge ais âba ǃgaroǃhūbǀî ge ǂnan.

²Tsî Bileammi ge ǃgapakhâi tsî Israela mûo, ǃhaodi âb ī khamib ǁan hâ ǃkhaisa, ob ge Elob di Gagaba ǁîb ai ge hâ i.

³Tsîb ge ǂkhoamîs âba tsoatsoa tsî ge mî: Bileamta, Beori ôata ge ra ǃhoa, ǁnā aota, mûra khowabahe hâ ta ge ra ǃhoa.

⁴Elob mîde ra ǁnâu ta ge ra ǃhoa, Hoaǀgaixab di aisa ra mû ta, ǂgaeǃapahe tsî mûdi â ta ra khowabahe ta.

⁵Matikōse di a ǃgâi sa tentomde, Jakotse, sa ǁanǃkhaide, Israeltse!

⁶ǃĀrogu khami di ge ra khoraǃāsen, ǃhanagu khami ǃāgu amǃgâ, aukoregu khami, ǃKhūb xa ǂgāhe hâga, sederhaidi khami ǁgammi amǃgâ.

⁷ǁGammi ge nîra dâu, emerdi âba xu, tsî ǃkhommi âb ge kai ǁgamgu ǃnâ nîra hâ; tsî gao-aob âb ge Agagi ǃgâ-ai nîra ǀgapi, tsî gaosib âb ge nîra kaikaihe.

⁸Elob ge ǁîba Egipteba xu ge ǂgaeǂguiǂui, ǀgaigu âb ge ǃgarogomab digu khami ī; ǁîb ge ǀūben, ǁîb di khākhoena nîra hapu tsî ǂkhōgu âba nîra khôaǂkhū; tsî ǁîb di ǂāgu ge nîra ǁkhâuhō.

⁹ǃGamsen tsîb ge go ǁgoe xammi khami tsî xams khami, tari-e nî khâi kai bi? Satsa ga ǀkhae-e, a-i ǀkhaehe, tsî satsa ga ǀâxare-e a-i ǀâxarehe!

¹⁰ǃNubaib ge Balaki di ǁaiba ge ǂhubi Bileammiǀî, tsîb ge ge ǁam; tsî Balaki ge Bileammi ǃoa ge mî: Tita ge go ǂgai tsi, ti khākhoenats nî ǀâxarega, xawe kō, ǀnaits ge satsa ǁîna ǃnona ǃnādi kōse hugaǀgui goro ǀkhae.

¹¹Îts ǁnâi nēsi bē sa ǃāsa ǃoa! Tita ge go mî kaise ta nî ǃgôa tsi ǃkhaisa, xawe kō, ǃKhūb ge ǁnā ǃgôasa go ǂkhā tsi.

¹²ǃNubaib ge Bileamma Balaki ǃoa ge mî: Tsî tita ona mîba tama ta hâ sa sîsabegu, tita ǃoats go sîga, mî raǃâ:

¹³Balaki ga ǀhaiǀurib tsî ǃhuniǀurib tsîkha xa ǀoa hâ ommi âba mā te xawe ta ǃKhūb di mîmāsa ǃûǂam ǁoa, ǃgâidī ta nîga, tsūdī ta nîga, ti ǂgaob ǂûba xus a khami; ǃKhūb nî mî xūn, ǁnāna ta ge tita nî ǃhoa.

¹⁴Tsî nēsi kō, tita ge ti ǁaes ǃoa ra ǃgû; hā î ta haisi tsi, tare xū-es nē ǁaesa sa ǁaes tawa nî dī ǃkhaisa ǀuni tsēdi ai.

¹⁵ǃNubaib ge ǂkhoamîs âba tsoatsoa tsî ge mî: Bileamta, Beori ôata ge ra ǃhoa, tsî ǁnā aota mûra khowabahe hâ ta ge ra ǃhoa.

¹⁶Elob mîde ra ǁnâu aota ge ra ǃhoa, tsî ǂans Hoaǀgaixab disa ǂan ta; Hoaǀgaixab di aisa ra mû ta, ǂgaeǃapahe tsî mûdi â ta ra khowabahe ta.

¹⁷Tita ge ǁîba nîra mû, xawe nēsi tama; tita ge ǁîba nî ǃgapaǀî, xawe ǀgūse tama: ǀGamiro-i ge Jakoba xu nîra ǁhai, tsî gaohai-i ge Israela xu nîra ǀkhī; ǁî-i ge Moabǁîn di ǀkhariga nîra ǂnauǂkhū tsî Seti ôan hoana nîra hîǀhuru.

¹⁸Tsî Edommi ge ǀumiǁîsise nîra ī; tsî Seiri ge khākhoen âba ǀumiǁîsise nîra ība; tsî Israeli ge ǀgaisase nîra sîsen.

¹⁹Tsî Jakoba xu ra ǀkhīb ge nîra gaosîsen, tsîb ge ǃādi ǃnâ ǃgau hâna nîra hîkākā.

²⁰Tsî Amalekǁînab ge mûo, ob ge ǂkhoamîs âba tsoatsoa tsî ge mî: Amaleki ge a ǀūben di ǂguro, xawe ǀams âb ge a ǀamo kāǁō.

²¹Tsî Keniǁînab ge mûo, ob ge ǂkhoamîs âba tsoatsoa tsî ge mî: Sa ǁanǃkhais ge a ǁaposa, tsîts ge oms âtsa ǃhaob ai ge ǂnubi.

²²Tsî ti ī xaweb ge Kainna nîra hapuhe, Assuri ǃkhōsase nîra ūbē tsis kōse.

²³ǃAruǀîb ge ǂkhoamîs âba tsoatsoa tsî ge mî: Okha, tari-e nî ûi, Elob ga nē xūna dī ǃnubai?

²⁴Tsî doe-omgu Kitimmi amǃgâb digu ge hā tsî Assura nîra ǁnora tsî Ebera nîra ǁnora; tsî ǁîb on ge nîra kāǁō.

²⁵ǃNubaib ge Bileamma khâi tsî ǃgû tsî ǃās âb ǃoa ge ǁaru; tsî Balaki on ge ǁîb di daoba ge ǃgû.