Read Khoekhoegowab Numeri 25 Bible Online

Numeri 25 - Khoekhoegowab bible

Numeri 25

¹Tsî Israeli ge Sitims tawa ge hâ, tsî ǁaes ge Moabǁîn di ôadi ǀkha ge ǀaitsoatsoa.

²Tsîn ge ǁaesa elogu ân di ǁguibadi ǃoa ge ǁkhau; os ge ǁaesa ǂû tsî ǁîn di elogu aiǃâ ge ǃhonǁgoa.

³Tsî Israeli ge Baal-Peora ǃgaeǁaeseno, ob ge ǃKhūb di ǁaiba ge ǂhubi Israeliǀî.

⁴Ob ge ǃKhūba Moseb ǃoa ge mî: ǁAes di danakhoegu hoaga ū îts ǁîga ǃKhūba ǂgāmâiba sores ǃoa-ai, ob ge ǃgamsib Elob ǁaib diba Israela xu nî ǁkhaebēhe.

⁵ǃNubaib ge Moseba Israeli di ǂhanuǂhanu-aogu ǃoa ge mî: Ab mâb hoaba ǁîb di khoegu, Baal-Peora ge ǃgaeǁaesenga ǃgam!

⁶Tsî mû, khoeb Israeli ôan dib ge hā tsî Midiaǁîsa ǁîb di ǃgâsagu tawa ge ūhā, Moseb di mûra aiǃâ tsî ǀhaohâb Israeli ôan dib hoab di mûdi aiǃâ, tentoms ǀhûs dis di dao-ams aiǃân ra ā hîa.

⁷Tsî Pinehab, pristeri Eleasari ôab, Aronni ôab, ge mûo, ob ge ǀhaohâb di ǁaeguba xu khâi tsî ǁhâigôaba ǃomǁaeb âb ǃnâ ū,

⁸tsî Israelǁî khoeba ǀai-oms ǃnâ saoǂgâ tsî ǁîra hoara ge ǃkhāǃganu, Israelǁî khoeb tsî ǁnā tarasa ǃnāb âs ǃnâ. ǃNubaib ge ǁōba Israeli ôan ǂamaiba xu ge ǀû.

⁹Tsî ǁnān, ǁōb xa ge ǁōn, ge ǀgamdisihakaǀaǀoadisi ge i.

¹⁰ǃNubaib ge ǃKhūba Moseb ǃoa ge mî:

¹¹Pinehab, pristeri, Eleasari ôab, Aronni ôab, ge ti ǁgôasiba Israela xu go ǁkhaedawa, ti tauǃkhaisab ge tau amaga ǁîn ǁaegu, î ta ga Israeli ôana ti tauxasib ǃnâ tā hapu, ti.

¹²ǁNā-amaga mî: Mû, tita ge ǁîba ti ǃgaeǀhaos ǂkhîb disa ra mā.

¹³Tsîb ge ǁîb tsî ǁîb di surib ǁîb khaoǃgâ nîra hāba nî ūhâ ǃgaeǀhaos ǀamo pristersis disa, ǁîb Elobab ge tauba tsî ǂkhîbagusab go dī amaga Israeli ôan ǂama.

¹⁴Tsî ǀons, ǁnā Israelǁî khoeb hîa ge ǃgamheb, Midiaǁîs ǀkha ge ǃgamheb ge Simri, Salub di ôa ge i, ǁgûsi ommi, Simeonǁîn dib di ǂamsaba.

¹⁵Tsî ǀons ǃgamhe ge Midianǁî taras dis ge Kosbi ge i, Suri, danakhoeb, Midianǁî ǁgûsi ommi dib di ôasa.

¹⁶ǃAruǀîb ge ǃKhūba Moseb ǃoa ge mî:

¹⁷Khākhoesise sîsenū Midiaǁîna îts ǁîna ǂnaukākā!

¹⁸ǁÎn ge khākhoexaǃnâse sado goro sîsenū xuige ǁnā gāxaǃnâsigu hîan ge gāxaǃnâsise sadu ǃoagu ǂâiǂuigu ǀkha Peori di ǃkhais ǃnâ, Kosbis di ǃkhais ǃnâ, Midiaǁî ǂamsab di ôas, ǁîn di ǃgâsas, hîa go ǃgamhes ǁōb di tsēs ai, Peori di ǃkhais ǃaroma.