Read Khoekhoegowab Numeri 26 Bible Online

Numeri 26 - Khoekhoegowab bible

Numeri 26

¹Tsî i ge ge ī, ǁnā ǁōb khaoǃgâ, ob ge ǃKhūba Moseb ǃoa tsî Eleasari, Aronni ôab, pristeri ǃoa ge mî:

²ǃGôakhâi ǀgaus ǀhaohâb Israeli ôan dib hoab disa, ǀgamdisi kurigu â-in tsî ǁnāsa ǃnā hâna xu ǁîn îgu di omgu ǃoa, Israeli ǃnâ toroǂnubis ǃoa ra ǂoan hoana.

³O kha ge Moseb tsî pristeri Eleasari tsîkha ǁîna ge gowaǀî, ǂgādi Moab didi, Jordanǃāb amǃgâ ǁgoedi ai, Jerixos ǀgūse, mî raǃâ:

⁴An ǃgôakhâihe, ǀgamdisi kurigu â-in tsî ǁnāsa ǃnā hâna xu, ǃKhūb ge Moseba mîmā xase, tsî Israeli ôan, Egipteǃhūba xu ge doeǂoana.

⁵Rubenni ge ǂguroǃnaesabeb Israeli diba ge i, Rubenni ôakha ge Henoxi, ǁîba xus ge ǃhaos Henoxǁîn disa a ǀkhīb, tsî Palub ǁîba xun Paluǁîna ge ǀkhīb tsîkha.

⁶Tsî Hesronna xu Hesronǁîn di ǃhaosa, tsî Karmiba xu Karmiǁîn di ǃhaosa.

⁷Nēdi ge ǃhaodi Rubenǁîn dide ge i, tsî ǁîn di ǃgôahe gen ge hakadisiǃnonaǀaǀoadisi tsî hûkaidisiǃnonadisi ge i.

⁸Tsî Palub di ôab ge Elia ge i.

⁹Tsî Eliab di ôagu ge Nemueli, Datanni tsî Abirammi tsîga ge i; nē Datanni tsî Abirammi tsîkha ge ǀhaohâb di ǂgaihesa ge i Koraxi di ǀhûs ǃnâ, Moseb tsî Aronni tsîkha ge ǂnoagu-ūkha, ǃKhūba gu ge ǂnoagu-ūo.

¹⁰Ob ge ǃhūba ams âba khowa tsî Koraxi ǀkha ǁîna ge hapu, ǁnā ǀhû hân ge ǁō-o, ǀaes ge ǀgamkaidisi tsî korodisi khoega hapu ǃnubai, tsîn ge ge sao kai.

¹¹Xawe Koraxi di ôan ge ǁō tama ge i.

¹²Simeonni di ôagu, ǁîgu di ǃhaodi ǃoa: Nemuela xu Nemuelǁîn di ǃhaos; Jaminna xu Jaminǁîn di ǃhaos tsî Jaxinna xu Jaxinǁîn di ǃhaos;

¹³tsî Seraba xu Seraǁîn di ǃhaos; tsî Saula xu Saulǁîn di ǃhaosa.

¹⁴Nēdi ge ǃhaodi Simeonǁîn dide, ǀgamdisiǀgamǀaǀoadisi tsî ǀgamkaidisi.

¹⁵Tsî Gadi di ôagu ǁîgu di ǃhaodi ǃoa: Sefonna xu Sefonǁîn di ǃhaos; tsî Hagiba xu Hagiǁîn di ǃhaos; tsî Suniba xu Suniǁîn di ǃhaos;

¹⁶tsî Osniba xu Osniǁîn di ǃhaos; tsî Eriba xu Eriǁîn di ǃhaos.

¹⁷Aroda xu Arodǁîn di ǃhaos; tsî Areliba xu Areliǁîn di ǃhaosa.

¹⁸Nēdi ge ǃhaodi Gadi ôagu dide ǁîgu di ǃgôahe gen ǃoa: Hakadisiǀoadisi tsî korokaidisi.

¹⁹Judab di ôakha ge Eri tsî Onanni tsîkha ge i; xawe Eri tsî Onanni tsîkha ge Kanaanǃhūb ǃnâ ge ǁō.

²⁰Nēti gu ge Judab di ôaga ge i ǁîgu di ǃhaodi ǃoa: Selaba xu Selaǁîn di ǃhaos; tsî Pereba xu Pereǁîn di ǃhaos; tsî Seraba xu Seraǁîn di ǃhaosa.

²¹Tsî Pereb di ôagu ge: Hesronna xu Hesronǁîn di ǃhaos; tsî Hamula xu Hamulǁîn di ǃhaosa.

²²Nēdi ge ǃhaodi Judab dide ǁîn di ǃgôahe gen ǃoa, hûdisiǃnaniǀaǀoadisi tsî korokaidisi.

²³Isaskari di ôaga ǁîgu di ǃhaodi ǃoa: Tolaba xu Tolaǁîn di ǃhaos; tsî Puwaba xu Puwaǁîn di ǃhaos;

²⁴Jasuba xu Jasuǁîn di ǃhaos, tsî Simronna xu Simronǁîn di ǃhaosa.

²⁵Nēdi ge ǃhaodi Isaskari dide ǁîn di ǃgôahe gen ǃoa, ǃnanidisihakaǀaǀoadisi tsî ǃnonakaidisi.

²⁶Tsî Sebulonni di ôaga ǁîgu di ǃhaodi ǃoa: Sereda xu Seredǁîn di ǃhaos; tsî Elonna xu Elonǁîn di ǃhaos; tsî Jahleela xu Jahleelǁîn di ǃhaosa.

²⁷Nēdi ge ǃhaodi Sebulonǁîn dide, ǁîn di ǃgôahe gen ǃoa, ǃnanidisiǀoadisi tsî korokaidisi.

²⁸Joseb di ôakha ge ǁîkha di ǃhaodi ǃoa Manaseb tsî Efraimmi tsîkha ge i.

²⁹Manaseb di ôagu ge: Maxira xus ge ǃhaos, Maxirǁîn disa ge ǀkhī; Maxiri ge Gileada ge hō; Gileada xus ge Gileadǁîn ǃhaosa ge ǀkhī.

³⁰Nēgu ge Gileadi di ôaga: Iesera xu Ieserǁîn di ǃhaos; tsî Heleka xu Helekǁîn di ǃhaosa.

³¹Tsî Asriela xu Asrielǁîn di ǃhaos; tsî Sexemma xu Sexemǁîn di ǃhaosa.

³²Tsî Semidaba xu Semidaǁîn di ǃhaos; tsî Hefera xu Heferǁîn di ǃhaosa.

³³Xawe Selofhadi, Heferi ôab ge ǀgôaga ūhâ tama tsî ǀgôadi ǀguide ge ūhâ i; tsî Selofhadi ôadi ge Maxlas, Noas, Hoglas, Milkas tsî Tirsas tsîde ge i.

³⁴Nēdi ge ǃhaodi Manaseb dide; tsî ǃgôahe gen ge korodisiǀgamǀaǀoadisi tsî hûkaidisi ge i.

³⁵Nēgu ge Efraimmi di ôaga ǁîgu di ǃhaodi ǃoa: Sutelaxa xu, Sutelaxǁîn di ǃhaos; Bexera xu Bexerǁîn di ǃhaos; Tahanna xu Tahanǁîn di ǃhaosa.

³⁶Tsî nēgu ge Sutelaxi di ôaga: Eranna xu Eranǁîn di ǃhaosa.

³⁷Nēdi ge ǃhaodi Efraimmi ôagu dide ǁîgu di ǃgôahe gen ǃoa, ǃnonadisiǀgamǀaǀoadisi tsî korokaidisi. Nēgu ge Joseb di ôaga ǁîgu di ǃhaodi ǃoa.

³⁸Benjaminni di ôagu, ǁîgu di ǃhaodi ǃoa: Belaba xu Belaǁîn di ǃhaos; Asbela xu Asbelǁîn di ǃhaos; tsî Ahiramma xu Ahiramǁîn di ǃhaos;

³⁹Sufamma xu Sufamǁîn di ǃhaos; Hufamma xu Hufamǁîn di ǃhaosa.

⁴⁰Tsî Belab di ôakha ge Ardi tsî Naamanni tsîkha ge i; Arda xu Ardǁîn di ǃhaos tsî Naamanna xu Naamanǁîn di ǃhaosa ge ǀkhī.

⁴¹Nēgu ge Benjaminni di ôaga ǁîgu di ǃhaodi ǃoa; tsî ǁîgu di ǃgôahe gen ge hakadisikoroǀaǀoadisi tsî ǃnanikaidisi ge i.

⁴²Nēgu ge Danni di ôaga ǁîgu di ǃhaodi ǃoa: Suhamma xu Suhamǁîn di ǃhaos: Nēdi ge Danni di ǃhaode ǁîn di ǃhaodi ǃoa.

⁴³Suhamǁîn di ǃhaodi hoadi ge ǁîn di ǃgôahe gen ǃoa ǃnanidisihakaǀaǀoadisi tsî hakakaidisi ge i.

⁴⁴Aseri di ôaga ǁîgu di ǃhaodi ǃoa: Jimnaba xu Jimnaǁîn di ǃhaos; Jisviba xu, Jisviǁîn di ǃhaos; Beriaba xu Beriaǁîn di ǃhaos.

⁴⁵Beriab di ôaga xu: Hebera xu Heberǁîn di ǃhaos: Malkieba xu Malkieǁîn di ǃhaosa.

⁴⁶Tsî ǀons Aseri ôas dis ge Serax ge i.

⁴⁷Nēdi ge ǃhaodi Aseri ôagu dide ǁîgu di ǃgôahe gen ǃoa, korodisiǃnonaǀaǀoadisi tsî hakakaidisi.

⁴⁸Naftalib ôagu, ǁîgu di ǃhaodi ǃoa: Jaxseela xu Jaxseelǁîn di ǃhaos; tsî Guniba xu Guniǁîn di ǃhaos.

⁴⁹Jesera xu Jeserǁîn di ǃhaos; Silemma xu Silemǁîn di ǃhaosa.

⁵⁰Nēdi ge ǃhaodi Naftalib dide ǁîn di ǃhaodi ǃoa; tsî ǃgôahe gen ge hakadisikoroǀaǀoadisi tsî hakakaidisi ge i.

⁵¹Nēn ge ǃgôahe gen Israeli ôagu dina: ǃNanikaidisi tsî ǀguiǀoadisihûkaidisi tsî ǃnonadisi.

⁵²Tsîb ge ǃKhūba Moseb ǃoa ge mî:

⁵³Nēnab ge ǃhūba nî ǀgoraǂuihe ǀumise, ǀondi di ǀgaus ǃoa.

⁵⁴ǁNān hîa ǂguin di ǀumis ge nî kai, tsî ǁnān hîa ǀoron di ǀumis ge nî ǂkhari; mâb hoab ge ǁîb di ǃgôahe gen ǃoa ǀumis âba nî māhe.

⁵⁵Xawe ǃhūb ge ǂnōgus ǀkha nî ǀgoraǂuihe; ǃhaodi ǁîn îgu didi di ǀomdi ǃoan ge nî ǀumi.

⁵⁶Mâ-i hoa-i di ǀumis ge ǂnōgus ǃoa nî ǀgorahe, ǂguin tsî ǀoron tsîn ǁaegu.

⁵⁷Tsî nēn ge ǃgôahe gen Levib dina ǁîn di ǃhaodi ǃoa: Gersonna xu Gersonǁîn di ǃhaos; Kehata xu Kehatǁîn di ǃhaos; Merariba xu Merariǁîn di ǃhaosa.

⁵⁸Nēdi ge Levib di ǃhaode: ǃHaos Libniǁîn dis, ǃhaos Hebronǁîn dis, ǃhaos Maxliǁîn dis, ǃhaos Musiǁîn dis, ǃhaos Koraxǁîn dis. Tsî Kehati ge Amramma ge hō.

⁵⁹Tsî ǀons Amrammi taras dis ge Joxebed ge i, Levib ôas, Levib di taras ge Egipteb ǃnâ ǁorasa; tsîs ge ǁîsa Amramma, Aronni tsî Moseb tsî Miriams ǁîkha di ǃgâsas tsîna ge ǁoraba.

⁶⁰Tsî Aronni ge ge ǁorabahe Nadab tsî Abihub, Eleasari tsî Itamari tsîga.

⁶¹Tsî Nadab tsî Abihub tsîkha ge ge ǁō, ǃhao ǀaesa kha ge ǃKhūb di ais aiǃâ ūhā ǃnubai.

⁶²Tsî ǃgôahe gen ge ǀgamdisiǃnonaǀaǀoadisi ge i, aoregu hoagu, ǀgui ǁkhâb â-ib tsî ǁnāsa ǃnā hâba xu; ǁîgu ge Israeli ôan ǀkha ǃgôahe tama ge i, ǀumi-i xare-e gu ge māhe tama hâ i xui-ao Israeli ôan ǃnâ.

⁶³Nēn ge ǃgôahe gen Moseb tsî Eleasari, pristeri, tsîkha ge Israeli ôan xa ǃgôana, ǂgādi Moab didi ai, Jordanǃāb amǃgâ, Jerixos ǀgūse.

⁶⁴Tsî nēn ǃnâ i ge khoe-i xare-i Moseb tsî prister Aronni tsîkha xa ge ǃgôahen di-e hâ tama ge hâ i, Israeli ôana kha ge ǁîkha ǃgaroǃhūb Sinaib ǃnâ ǃgôa ǃnubai.

⁶⁵ǃKhūb ge ǁîn xa mî xui-ao, ǃgaroǃhūb ǃnân ǂanǂansase nîra ǁō ǃkhaisa; tsî ǁîn xa i ge ǀgui-i xare-e ǃgau tama ge i, Kaleb, Jefuneb ôab tsî Josuab, Nunni ôab tsîkha ǀguikha.