Read Khoekhoegowab Numeri 27 Bible Online

Numeri 27 - Khoekhoegowab bible

Numeri 27

¹ǃNubai di ge ǀgôadi Selofhadi didi, Heferi ôab, Gileadi ôab, Maxiri ôab, Manasseb ôab, Manasseb di ǃhaodi ǃnâ, Joseb ôab didi; tsî nēdi ge ǁîb di ôade: Maxlas, Noas, Hoglas, Milkas tsî Tirsas tsîde.

²Tsî di ge Moseb di ais aiǃâ ge mâ, tsî Eleasari, pristeri, di ais aiǃâ, tsî ǂamsagu di ais aiǃâ, tsî ǀhaohâb di ais aiǃâ, tentoms ǀhûs dis di dao-ams tawa, mî raǃâ:

³Sise îb ge ǃgaroǃhūb ǃnâ ge ǁō, tsîb ge hâ tama ge hâ i ǀhûs ǁnān, ǃKhūb ǃoagu ge ǀhûn dis ǃnâ, Koraxi di ǀhûs ǃnâ; tsîb ge ǁoreb âb ǃnâ ge ǁō tsî ǀgôaga ūhâ tama ge hâ i.

⁴Tarexas kha ǁnâi sise îb di ǀonsa ǁîb ǃhaos di ǁaeguba xu nî ūbēhe, aore ǀgôa-eb ūhâ tama amaga? Sise ǁnâi mā re ūhâse nî xū-e, sise îb di ǃgâsagu ǁaegu.

⁵Ob ge Moseba ǁîdi di ǂhanu ǃkhaisa ǃKhūb tawa ge ūsī.

⁶Ob ge ǃKhūba Moseb ǃoa ge mî:

⁷ǀGôadi Selofhadi didi ge ǂhanuse ra ǃhoa: Sats ge ǁîde ūhâ di nî xū-e ǀumise nî mā, ǁgûb di ǃgâsagu ǁaegu; tsîts ge ǀumis ǁgûb disa ǁîdi ǃoa nî hā kai.

⁸Tsîs ge Israeli ôan ǀkha ǃhoa tsî nî mî: Khoeb ga ǁō tsîb ga aore ǀgôa-e ūhâ tama io, ots ge ǀumis âba ǁîb di ôas ǃoa nî hā kai.

⁹Tsî ǀgôasab ga ūhâ tama io, ots ge ǀumis âba ǃgâsagu âba nî mā.

¹⁰Tsî ǃgâsagab ga ūhâ tama io, ots ge ǀumis âba ǁîb îb di ǃgâsaga nî mā.

¹¹Tsî ǁîb di îb ga ǁkhāti ǃgâsaga ūhâ tama io, ots ge ǀumis âba ǁîb a ǀgū khoe-i, ǃhaos âb ǃnâ hoan ǃgâ-ai ǁîb tawa ǀgū khoe-e nî mā, ǀumise i nî ǁîsa ūhâga. Nēs ge Israeli ôana ǂhanub di ǂnûiǂgāse nî ība, ǃKhūb ge Moseba mîmā xase.

¹²ǁNās khaoǃgâb ge ǃKhūba Moseb ǃoa ge mî: ǃApa nē ǃhommi Abarimmi ai îts kō ǁnā ǃhūb, Israeli ôana ta ge māba.

¹³Tsî ǁîbats ga mûo, ots ge sa ǁaedi tawa nî ǀhaoǀhaohe, sats on, Aronni sa ǃgâsab ge ǀhaoǀhaohe xase,

¹⁴Ti amsa kho ge mâǃoa xui-ao ǃgaroǃhūb Sinni ǃnâ, ǀhaohâb di ǂnoagus ǃnâ, tita kho nî khaise ǁgamgu tawa ǁîn di mûdi aiǃâ. Nēgu ge Meribas di ǁgamga, Kades diga, ǃgaroǃhūb Sinni ǃnâ.

¹⁵ǃNubaib ge Moseba ǃKhūb ǃoa ge mî:

¹⁶Ab ǃKhūb, ǁgans hoas di gagadi di Eloba khoeba mâi nē ǀhaohâb ǂama,

¹⁷ǁîn di ais aiǃâ nî ǂoab tsî ǁîn di ais aiǃâ nî ǂgâb, tsî ǁîna nî ǂgaeǂguiǂuib tsî ǁîna nî ǂgaeǂguiǂgâba, îb ǀhaohâb ǃKhūb diba tā gūn hîa ǃûi-ao-e ūhâ taman axase ī.

¹⁸ǃNubaib ge ǃKhūba Moseb ǃoa ge mî: Ū Josuab, Nunni ôab, aob hîab Gagaba ǁîb ǃnâ hâba îts sa ǃomma ǁîb ai ǁgui.

¹⁹Îts ǁîba pristeri, Eleasari di ais aiǃâ mâi tsî ǀhaohâb hoab di ais aiǃâ, îts ǁîba mîmāsa mā ǁîn di mûdi aiǃâ,

²⁰îts ǁîba ǂkhaisib âts xa ǁgui-ai, îb Israeli di ǀhaohâb hoaba ǁnâuǀnam bi.

²¹Tsîb ge prister Eleasari di ais aiǃâ nî mâ, ǁnāb, ǁîba nî ǀapeǂganbaba, Urims di dommi ai ǃKhūb di ais aiǃâ: ǁÎb di ams ǃoan ge nî ǃgûǂoa, tsî ǁîb di ams ǃoan ge nî ǃgûǂgâ, ǁîb tsî Israeli ôan hoan ǁîb ǀkha tsî ǀhaohâb hoaba.

²²Ob ge Moseba ge dī, ǃKhūb ge mîmā bi xase: Ob ge Josuaba ū tsî Eleasari, pristeri di ais aiǃâ ge mâi bi tsî ǀhaohâb hoab di ais aiǃâ,

²³tsîb ge ǃomkha âba ǁîb ai ǁgui tsî mîmāsa ge mā bi, ǃKhūb ge Moseb di ǃoabasa xu mîmā khami.