Read Khoekhoegowab Numeri 28 Bible Online

Numeri 28 - Khoekhoegowab bible

Numeri 28

¹ǃAruǀîb ge ǃKhūba Moseb ǃoa ge mî:

²Mîmā Israeli ôana îts ǁîna mîba: Ti ǁguibas, ti ǂûb ti ǀaeǁguibadi dib, ti ǀnamǀnamsa ǁamaba du ge nî ǂan, tita du mîmâisa ǁaeb ai nî ǁguibase.

³Tsîts ge ǁîna ǃoa nî mî: Nēs ge ǀaeǁguibas, ǃKhūba du nî ǁguibasa: ǀGam ūo ǀgui kurixa ǁkhaokha tsēkorobe, hâhâ ra khauǁguibase.

⁴ǀGui ǁkhaobats ge ǁgoas ai nî ǁāǁā; tsî nau ǁkhaobats ge ǀgam ǃûiǁaekha ǁaegu nî ǁāǁā.

⁵Tsî disiǁî ǃâs ǀgui efa tsampereb disa ǂûǁguibase, hakaǁî ǃâs ǀgui hinni ǂnautsautsauhe hâ olib dib ǀkha ǂnâ-aihe hâsa.

⁶ǁÎs ge hâhâ ra khauǁguibas, Sinaiǃhommi ai ge ǂnûiǂgāhesa, ǀnamǀnamsa ǁamase, ǀaeǁguibas ǃKhūb dis ase.

⁷Tsî ǂnâǁguibas âs ge hakaǁî ǃâs ǀgui hinni disa nî i ǀgui ǁkhaob ama; ǃanusib ǃnâ du ge ǂnâǁguibas ǀgaisa ǂauxûib disa ǃKhūba nî ǁguiba.

⁸Tsî nau ǁkhaoba du ge ǀgam ǃuira ǁaegu nî ǂhomi; ǂûǁguibas khami ǁgoas ai tsî ǂnâǁguibas âs khami du ge ǁîsa nî ǂhomi, ǀaeǁguibas ǀnamǀnamsa ǁamab ǃKhūb dib dis ase.

⁹Xawe sâtsēs ai ǀgam ūo ǀgui kurixa ǁkhaokha tsî ǀgam disiǁî ǃâra tsampereb xa ǂûǁguibas ase, olib ǀkha ǂnâ-aihe hâǃâ ǂnâǁguibas âs ǀkha.

¹⁰Khauǁguibas sâtsēs dis ge ǁîsa, mâ sâtsēs hoas dis, hâhâ ra khauǁguibas tsî ǂnâǁguibas âsa ǃnā hâsa.

¹¹Tsî sado, ǁkhâgu di tsoatsoadi ǃnâ du ge ǃKhūba khauǁguiba-e nî ǁguiba: ǀGam ǂkham ǁgōkha tsî ǀgui bairab tsî hû ūo ǀgui kurixa ǁkhaogu tsîna.

¹²Tsî ǃnona, disiǁî ǃâdi tsampereb dide ǂûǁguibase, olib ǀkha ǂnâ-aihe hâǃâ ǁnā ǀgui ǁgōb tawa; tsî ǀgam, disiǁî ǃâra tsampereb dira ǂûǁguibase, olib ǀkha ǂnâ-aihe hâǃâ, ǁnā ǀgui bairab tawa;

¹³tsî mâb hoab tawa disiǁî ǃâs tsampereb disa ǂûǁguibase, olib ǀkha ǂnâ-aihe hâǃâ, ǁnā ǀgui ǁkhaob tawa: ǁÎs ge khauǁguibasa ǀnamǀnamsa ǁamab ase, ǃKhūb di ǀaeǁguibas ase.

¹⁴Tsî ǂnâǁguibadi ân ge ǀgui hinni di ǃkharese nî ī ǀgui ǁgōb tawa, tsî ǃnonaǁî ǃâs ǀgui hinni disa ǀgui bairab tawa, tsî hakaǁî ǃâs ǀgui hinni ǂauxûib disa ǀgui ǁkhaob tawa; nēs ge khauǁguibas ǂkham ǁkhâb disa, ǁkhâkorobe kurib di ǁkhâgu ǃoa.

¹⁵ǁÎn xōǀkhāb ge ǀgui piriba ǁoreǁguibase ǃKhūba nî ǂhomibahe, hâhâ ra khauǁguibas ǃnâ hâǃâ, ǂnâǁguibas âs ǀkha.

¹⁶Tsî ǂguro ǁkhâb ǃnâ, disihakaǀaǁî tsēs ǁkhâb dis aib ge Pasxaba ǃKhūba hâba.

¹⁷Tsî disikoroǀaǁî tsēs ǁkhā ǁkhâb dis ais ge kaitsēsa nî hâ; on ge ǀkhuruoǃnâ perena nî ǂûhe, hû tsēdi kōse.

¹⁸ǂGuro tsēs ai i ge ǃanu ǂgaiǀhû-e nî hâ: O du ge dīxū-i xare-e dī tide.

¹⁹Tsî du ge ǀaeǁguiba-e ǃKhūba nî ǁguiba khauǁguibase: ǀGam ǂkham ǁgōkha tsî ǀgui bairab tsî ǁîn tawa hû ǀgui kurixa ǁkhaoga; ūose gu ge nî i.

²⁰Tsî ǁîn di ǂûǁguibas ge tsampere nî i, olib ǀkha ǂnâ-aihe hâsa; ǃnona disiǁî ǃâde ǀgui ǁgōb tawa, tsî ǀgam disiǁî ǃâra ǀgui bairab tawa du ge nî ǁāǁā.

²¹Mâb hoab tawa du ge disiǁî ǃâ-e nî ǂhomi ǀgui ǁkhaob tawa ǁnā hû ǁkhaogu kōse.

²²ǁNās khaoǃgâ ǀgui piriba ǁoreǁguibase, ǂkhîbagusa du nî dībahega.

²³ǁGoakhauǁguibas, hîa hâhâ ra khauǁguibas xōǀkhā du ge nē xūna nî ǁāǁā.

²⁴Saogubes ai du ge nē xūna tsēa nî dī hû tsēdi kōse, ǀaeǁguibas di ǂûba du ge nî ǁāǁāba, ǃKhūba ǀnamǀnamsa ǁamab ase; hâhâ ra khauǁguibas ǃnā hâses ge nî ǂhomihe ǂnâǁguibas âs ǀkha.

²⁵Tsî hûǁî tsēs ai du ge ǃanu ǂgaiǀhû-e nî ūhâ; o du ge dīxū-i xare-e dī tide.

²⁶ǁNās ǁkhās xase ǂgurosaben di tsēs ai, ǀasa ǂûǁguiba-e du ga ǃKhūba ǁguibao, sadu di wekhegu ǃoa, o du ge ǃanu ǂgaiǀhû-e nî ūhâ; o du ge dīxū-i xare-e dī tide.

²⁷ǃNubai du ge ǃKhūba khauǁguiba-e nî ǁguiba ǀnamǀnamsa ǁamab ase: ǀGam ǂkham ǁgōkha, ǀgui bairab tsî hû ǀgui kurixa ǁkhaogu tsîna;

²⁸tsî ǁîn di ǂûǁguibasa tsampereb, olib ǀkha ǂnâ-aihe hâb xa, ǃnona disiǁî ǃâde ǀgui ǁgōb tawa, ǀgam disiǁî ǃâra ǀgui bairab tawa;

²⁹mâb hoab tawa disiǁî ǃâsa ǀgui ǁkhaob tawa, ǁnā hû ǁkhaogu kōse;

³⁰ǀgui piriba, ǂkhîbagusa du nî dībahese.

³¹Hâhâ ra khauǁguibas tsî ǂûǁguibas âs ose du ge ǁîna nî ǁāǁā: ǁÎn ge nî ūo ǂnâǁguibadi ân ǀkha.