Read Khoekhoegowab Numeri 29 Bible Online

Numeri 29 - Khoekhoegowab bible

Numeri 29

¹ǁNās ǁkhās xase hûǁî ǁkhâb ǃnâ ǂguro tsēs ǁkhâb dis ai du ge ǃanu ǂgaiǀhû-e nî ūhâ; dīxū-i xare-e du ge dī tide. ǁÎs ge ǀōb di tsēse nî ība du.

²ǃNubai du ge khauǁguiba-e ǃKhūba nî ǂhomiba, ǀnamǀnamsa ǁamab ase: ǀGui ǂkham ǁgōb, ǀgui bairab tsî hû ūo ǀgui kurixa ǁkhaogu tsîna;

³tsî ǁîn di ǂûǁguibas tsampereb, olib ǀkha ǂnâ-aihe hâb xa ǃnona disiǁî ǃâde ǁgōb tawa, ǀgam disiǁî ǃâra bairab tawa.

⁴Tsî ǀgui disiǁî ǃâsa ǀgui ǁkhaob tawa, ǁnā hû ǁkhaogu kōse;

⁵Tsî piriba, ǁoreǁguibase, ǂkhîbagusa du nî dībahese;

⁶khauǁguibas ǁkhâb dis ose tsî ǂûǁguibas âs tsî hâhâ ra khauǁguibas tsî ǂûǁguibas âs ǁîn di ǂnâǁguibadi ǀkha ǁîn di dommi ai, ǀnamǀnamsa ǁamase, khauǁguibas ǃKhūb dis ase.

⁷Tsî disiǁî tsēs nē hûǁî ǁkhâb dis ai du ge ǃanu ǂgaiǀhû-e nî ūhâ, tsî du ge sadu di ǀomde nî ǃgamǃgam; sîsen-i xare-e du ge dī tide.

⁸Tsî du ge khauǁguibade ǃKhūba nî ǁguiba, ǀnamǀnamsa ǁamab ase: ǀGui ǂkham ǁgōb, ǀgui bairab tsî hû ǀgui kurixa ǁkhaogu tsîna; ǁîgu ge ūose nî ī.

⁹Tsî ǂûǁguibas ân, tsampereb, olib ǀkha ǂnâ-aihe hâb xa: ǃNona disiǁî ǃâde ǁgōb tawa, ǀgam disiǁî ǃâra bairab tawa,

¹⁰mâb hoab tawa disiǁî ǃâsa ǁkhaob tawa, ǁnā hû ǁkhaogu kōse;

¹¹ǀgui piriba ǁoreǁguibase, ǁoreǁguibas ǂkhîbagudi dis ose, tsî hâhâ ra khauǁguibas tsî ǂûǁguibas, ǂnâǁguibadi ân ǀkha.

¹²ǁNās ǁkhās khami disikoroǀaǁî tsēs ǁnā hûǁî ǁkhâb dis ai du ge ǃanu ǂgaiǀhû-e nî ūhâ: Dīxū-i xare-e du ge dī tide, tsî du ge ǃKhūba hû tsēdi kōse kaitsēsa nî tsēdība.

¹³Tsî du ge khauǁguiba-e nî ǁguiba ǀaeǁguibase, ǀnamǀnamsa ǁamab ǃKhūb dib ase: Disiǃnonaǀa ǂkham ǁgōga, ǀgam bairakha, disihakaǀa ǀgui kurixa ǁkhaoga; ǁîgu ge nî ūo.

¹⁴Tsî ǁîna ǂûǁguibase tsampereb, olib ǀkha ǂnâ-aihe hâb xa, ǃnona disiǁî ǃâde ǀgui ǁgōb tawa, ǁnā disiǃnonaǀa ǁgōgu kōse; ǀgam disiǁî ǃâra ǀgui bairab tawa ǁnā ǀgam bairakha ǁaegu;

¹⁵tsî mâb hoab tawa disiǁî ǃâsa ǀgui ǁkhaob tawa ǁnā disihakaǀa ǁkhaogu kōse.

¹⁶Tsî ǀgui bairaba ǁoreǁguibase, hâhâ ra khauǁguibas ose, ǁîs di ǂûǁguibas tsî ǁîs di ǂnâǁguibas tsîna.

¹⁷ǁNās khaoǃgâ ǀgamǁî tsēs ai: Disiǀgamǀa ǂkham ǁgōga, ǀgam bairakha, disihakaǀa ūo ǀgui kurixa ǁkhaoga;

¹⁸tsî ǁîn di ǂûǁguibas tsî ǁîn di ǂnâǁguibadi tsîn ǁgōgu tawa, bairakha tawa tsî ǁkhaogu tawa ǀgaus ân ǃoa dommi ai;

¹⁹tsî ǀgui piriba ǁoreǁguibase; hâhâ ra khauǁguibas ose tsî ǂûǁguibas ân ǂnâǁguibadi ân ǀkha.

²⁰Tsî ǃnonaǁî tsēs ai disiǀguiǀa ǁgōga, ǀgam bairakha, disihakaǀa ūo ǀgui kurixa ǁkhaoga;

²¹tsî ǁîn di ǂûǁguibade tsî ǁîn di ǂnâǁguibade ǁgōgu tawa, bairakha tawa tsî ǁkhaogu tsîn tawa, ǁîn di ǀgaus ǃoa dommi ai;

²²tsî ǀgui piriba ǁoreǁguibase; hâhâ ra khauǁguibas ose, tsî ǂûǁguibas âs tsî ǂnâǁguibas âsa.

²³ǃAruǀî hakaǁî tsēs ai, disi ǁgōga, ǀgam bairakha, disihakaǀa ūo ǀgui kurixa ǁkhaoga;

²⁴ǁîn di ǂûǁguibas tsî ǁîn di ǂnâǁguibadi tsîn ǁgōgu tawa, bairakha tawa tsî ǁkhaogu tawa, ǀgaus ân ǃoa dommi ai;

²⁵tsî ǀgui piriba ǁoreǁguibase, hâhâ ra khauǁguibas ose, ǂûǁguibas âs tsî ǂnâǁguibas âs tsîna.

²⁶Tsî koroǁî tsēs ai khoese ǁgōgu, ǀgam bairakha tsî disihakaǀa ūo ǀgui kurixa ǁkhaoga;

²⁷tsî ǁîn di ǂûǁguibas tsî ǁîn di ǂnâǁguibadi tsîn ǁgōgu tawa, bairakha tawa tsî ǁkhaogu tawa, ǀgaus ân ǃoa dommi ai;

²⁸tsî ǀgui piriba ǁoreǁguibase, hâhâ ra khauǁguibas ose tsî ǂûǁguibas âs tsî ǂnâǁguibas âs tsîna.

²⁹ǁNās khaoǃgâ, ǃnaniǁî tsēs ai, ǁkhaisa ǁgōga, ǀgam bairakha, disihakaǀa ūo ǀgui kurixa ǁkhaoga;

³⁰tsî ǁîn di ǂûǁguibasa tsî ǁîn di ǂnâǁguibade ǁgōgu tawa, bairakha tawa tsî ǁkhaogu tawa, ǀgaus ân ǃoa dommi ai;

³¹tsî ǀgui piriba ǁoreǁguibase, hâhâ ra khauǁguibas ose, ǁîs di ǂûǁguibas tsî ǁîs di ǂnâǁguibadi tsîna.

³²Tsî hûǁî tsēs ai, hû ǁgōga, ǀgam bairakha, disihakaǀa ūo ǀgui kurixa ǁkhaoga;

³³tsî ǁîn di ǂûǁguibasa tsî ǁîn di ǂnâǁguibade ǁgōgu tawa, bairakha tawa tsî ǁkhaogu tawa, ǀgaus ân ǃoa dommi ai;

³⁴tsî ǀgui piriba ǁoreǁguibase, hâhâ ra khauǁguibas ose, ǂûǁguibas âs tsî ǂnâǁguibas âs tsîna.

³⁵ǁKhaisaǁî tsēs ai du ge ǃkhâitsē-e nî ūhâ; dīxū-i xare-e du ge dī tide,

³⁶tsî du ge khauǁguiba-e nî ǁguiba ǀaeǁguibase, ǃKhūb di ǀnamǀnamsa ǁamab ase: ǀGui ǁgōb, ǀgui bairab tsî hû ūo ǀgui kurixa ǁkhaoga,

³⁷ǁîn di ǂûǁguibase tsî ǁîn di ǂnâǁguibade ǁgōb tawa, bairab tawa tsî ǁkhaogu tawa, ǀgaus ân ǃoa dommi ai;

³⁸tsî ǀgui piriba ǁoreǁguibase, hâhâ ra khauǁguibas ose tsî ǂûǁguibas âs tsî ǂnâǁguibas âs tsîna.

³⁹Nē xūna du ge ǃKhūba nî dība sadu di mîmâisa kai ǁaegu ai; sadu di mîmâidi tsî māsenxa ǁguibadi ose khauǁguibadi âdu ǀkha, tsî ǂûǁguibadi âdu ǀkha tsî ǂnâǁguibadi âdu ǀkha tsî ganganǁguibadi âdu ǀkha.