Read Khoekhoegowab Numeri 3 Bible Online

Numeri 3 - Khoekhoegowab bible

Numeri 3

¹Tsî nēdi ge ǃnaedi Aronni tsî Moseb tsîkha dide, ǁnā tsēs ǃKhūb ge ǁîs ai Moseb ǀkha Sinaiǃhommi ai ǃhoasa.

²Tsî nēdi ge ǀondi Aronni ôagu dide: ǂGuroǃnaesabeb Nadab, ǁnās khaoǃgâ Abihub, Eleasari tsî Itamari tsîga.

³Nēdi ge ǀondi Aronni ôagu dide; pristergu hîa ge ǂkhauǀkhāhegu, ǃommi âga ge ǀoaǀoahega, pristersîsenǃâsa gu nî ǃoabase.

⁴Xawe Nadab tsî Abihub tsîkha ge ǃKhūb di ais aiǃâ ge ǁō, ǃhao ǀae-e kha ge Sinaiǃgaroǃhūb ǃnâ ǃKhūb di ais aiǃâ ūhā ǃnubai, tsî kha ge ǀgôana ge ūhâ tama hâ i. O kha ge Eleasari tsî Itamari tsîkha pristersîsenǃâsa ǁîkha îb Aronni aiǃâ gere ǃoaba.

⁵Ob ge ǃKhūba Moseb ǃoa ge mî:

⁶Leviǃhaosa ǀgū kai îts ǁîsa prister Aronni di ais aiǃâ mâi, ǁîba gu nî ǃoabase.

⁷Î gu ǁîb di ǃûisa hî tsî ǀhaohâb hoab di ǃûisa tentoms ǀhûs dis aiǃâ, tabernakeli di ǃoabasa gu nî ǃoabaga;

⁸î gu sîsenūxūn tentoms ǀhûs dis din hoan tsî Israeli ôan di ǃûisa ǃûi, tabernakeli di ǃoabasa gu nî ǃoabaga.

⁹Ots ge satsa Leviǁîga Aronni tsî ǁîb di ôaga nî mā; ǀkhaehe gu hâ, ǁîba gu ǀkhaehe hâ Israeli ôana xu.

¹⁰Xawe Aronni tsî ǁîb di ôagats ge nî mâi, ǁîgu di pristersîsenǃâsa gu nî dīse, tsî ǃhaokhoe-i ga ǀgūse hāo, ǁî-i ge nî ǃgamhe.

¹¹Tsîb ge ǃKhūba Moseb ǃoa ge mî:

¹²Tsî tita, mû, tita ge Leviǁîna Israeli ôan ǁaeguba xu ge ū ǂguroǃnaesabeb ǁgûs ǁhāsa ra ǁkhowa-ammi hoab di amǃnâs ai Israeli ôan ǃnâ, on ge Leviǁîna nî ti.

¹³ǂGuroǃnaesaben hoan ge a ti amaga; ǁnā tsēs, Egipteǃhūb ǃnâ ta ge ǂguroǃnaesabeb hoaba ǁîs ai ge ǂnausa xu ta ge tita ǂguroǃnaesabegu hoaga tita ge khaiba, khoena xu ǀgoan kōse, Israeli ǃnâ; ǁîgu ge nî ti: Tita ge ǃKhūta.

¹⁴Tsîb ge ǃKhūba Sinaiǃgaroǃhūb ǃnâ Moseb ǃoa ge mî:

¹⁵Levib ôaga ǃgôa, ǁîgu îgu di omgu ǃoa, ǁîgu di ǃhaodi ǃoa, aoreb hoab ǀgui ǁkhâb â-ib tsî ǁnāsa ǃnā hâba xu, ǁîgats ge nî ǃgôa.

¹⁶Ob ge Moseba ǁîga ge ǃgôa, ǃKhūb di mîmās ai, ǁîb ge mîmā bi xase.

¹⁷Nēgu ge Levib ôa ge i, ǀondi âgu ǀkha: Gersonni, Kehati tsî Merarib tsîga.

¹⁸Tsî nēra ge ǀonra Levib ôakha dira, ǁîkha di ǃhaodi ǃoa: Libnib tsî Simib tsîkha.

¹⁹Tsî Kehati ôagu ǁîgu di ǃhaodi ǃoa: Amrammi, Jitshari, Hebronni tsî Usieli tsîga.

²⁰Tsî Merarib ôakha ǁîkha di ǃhaodi ǃoa: Maxlib tsî Musib tsîkha; nēdi ge ǃhaodi Leviǁîn dide, ǁîgu di omgu ǃoa.

²¹Gersonna xus ge ǃhaos Libniǁîn disa ge ǀkhī, tsî ǃhaos Simiǁîn disa; nēdi ge ǃhaodi Gersonǁîn dide.

²²ǁÎn di ǃgôahe gen di ǀgaus ge aoreb hoab ǀgui ǁkhâb â-ib tsî ǁnāsa ǃnā hâba xu; ǁîn di ǃgôahe gen ge hûǀoadisi tsî korokaidisi ge i.

²³ǃHaodi Gersonǁîn didi ge tabernakeli khaoǃgâ nî ǁgoe, huriǂoasǀî.

²⁴Tsî ǁgûsi-ommi, Gersonǁîn dib di ǂamsab ge Eljasab, Laeli ôa nî i.

²⁵Tsî ǃûis Gersonni ôagu dis, tentoms ǀhûs dis ǃnâ gu nî dīs ge tabernakeli tsî tentoms di nî i, ǁîs di ǃgū-ais tsî ǁnā ǃgū-ais tentoms ǀhûs dis di dao-ams tawa hâs;

²⁶tsî ǂgāǃkhaidi ai-oms didi tsî ǃgū-ais ai-ommi di dao-ams dis tsîdi tabernakeli tawa tsî altars ǂnamipe hâde; tsî ǁîb di tsurigu ǃoabas âb hoasa anuba hâgu on.

²⁷Tsî Kehata xus ge ǃhaos Amramǁîn disa hâ, tsî ǃhaos Jitsharǁîn dis tsî ǃhaos Hebronǁîn dis tsî ǃhaos Usielǁîn dis tsîna; nēdi ge ǃhaodi Kehatǁîn dide.

²⁸ǀGaus aoregu hoagu dis ǃnân ge ǀgui ǁkhâb â-ib tsî ǁnāsa ǃnā hâba xu ǁkhaisaǀoadisi tsî ǃnanikaidisi ge i, ǃanusib di ǃûisa ra ǃûina.

²⁹ǃHaodi Kehati ôagu didi ge nî ǁgoe tabernakeli xōǀkhā, ǃkhawagasǀî.

³⁰Tsî ǁgûsi ommi Kehatǁî ǃhaodi dib di ǂamsab ge nî Elisafan, Usieli ôaba.

³¹ǁÎgu di ǃûis ge nî ǂgaes di tsî tāb di tsî kandelari di tsî altars di tsî sîsenūdan ǃanusib din, ǁîn ǀkha gu ra pristerga sîsenna dīn di tsî ǃgū-ais tsî ǁîs di ǃoabasa anuba hân di.

³²Tsî ǂamsab Leviǁîǂamsagu dib ge Eleasari, Aronni ôa, prister nî i; tsîb ge nî mûǂam ǁnān, ǃanusib di ǃûisa ra ǃûin ǂama.

³³Tsî Merariba xus ge ǃhaos Maxliǁîn disa hâ, tsî ǃhaos Musib dis tsîra; nēra ge ǃhaora Merarib dira.

³⁴Tsî ǁîra di ǃgôahe gen di ǀgaus ǃnân ge ǀgui ǁkhâb â-ib tsî ǁnāsa ǃnā hâba xu ǃnaniǀoadisi tsî ǀgamkaidisi ge i.

³⁵Tsî ǁgûsi ommi Merari ǃhaora dib di ǂamsab ge nî Suriel, Abigaili ôaba; ǁîn ge nî ǁgoe tabernakeli xōǀkhā, ǀapasǀî.

³⁶Tsî Merarib ôagu di ǃûidi mûǂams ge nî tabernakeli ǃnâǃkhâbe ǃnaogu di tsî daoǁkhaedi di tsî ǁîb ǂkhâǃnâhaigu di tsî ǁîb ǂaidi di tsî ǁîb di ǃoabasa anuba hân di;

³⁷tsî ǂkhâǃnâhaigu ai-ommi ǂnamipeb digu di tsî ǁîb ǂgāǀuridi di tsî ǁîb tsurigu dise nî i.

³⁸Tsî ǁnāgu tabernakeli aiǃâ nî ǁgoegu, aiǂoasǀî, tentoms ǀhûs dis aiǃâ, sores ra ǁhai ǀkhāb ai: ǁÎgu ge Moseb tsî Aronni tsî ǁîb di ôaga nî i, ǃanusiba ra ǃûiǃâ, Israeli ôan ǃûis di amǃnâs ai; tsî khoe-i hîa ga ǀgū-i, ǁî-i ge nî ǃgamhe.

³⁹ǃGôahe gen hoan Leviǁîn din, Moseb tsî Aronni tsîkha ǃKhūb di mîmās ai ge ǃgôan, ǁîn di ǃhaodi ǃnâ, aoreb hoab ǀgui ǁkhâb â-ib tsî ǁnāsa ǃnā hâba xu: ǁÎn ge ǀgamdisiǀgamǀaǀoadisi ge i.

⁴⁰Tsî ǃKhūb ge Moseb ǃoa ge mî: ǂGuroǃnaesabegu hoaga ǃgôa, aoreb hoaba Israeli ôan ǃnâ ǀgui ǁkhâb â-ib tsî ǁnāsa ǃnā hâba xu, îts ǃgôakhâi ǁîgu ǀondi di ǀgausa.

⁴¹Tsîts ge Leviǁîga tita nî ūba, Israeli ôan di ǂguroǃnaesabegu di amǃnâs ai tsî Leviǁîn di ǀgoana Israeli ôan di ǂguroǃnaesabegu amǃnâs ai. Tita ge ǃKhūta.

⁴²Ob ge Moseba ǃKhūb ge mîmā bi xase Israeli ôan ǃnâ hâ ǂguroǃnaesabegu hoaga ge ǃgôa.

⁴³Tsî ǂguroǃnaesabegu hoagu, hîa aore ge igu ge ǀondi di ǀgaus ǃnâ ǀgui ǁkhâb â-ib tsî ǁnāsa ǃnā hâba xu ǁîn di ǃgôahe gen ǃoa ǀgamdisiǀgamǀaǀoadisi tsî ǀgamkaidisi hûdisiǃnonaǀa ge i.

⁴⁴Tsî ǃKhūb ge Moseb ǃoa ge mî:

⁴⁵Leviǁîga ū Israeli ôan ǃnâ hâ ǂguroǃnaesabegu hoagu di amǃnâs ai tsî Leviǁîgu di ǀgoana ǁîn ǀgoan di amǃnâs ai: Leviǁîn ge nî ti: Tita ge ǃKhūta.

⁴⁶Tsî ǀgamkaidisi hûdisiǃnonaǀagu, hîa nî orehegu, Israeli ôan di ǂguroǃnaesabegu, Leviǁîga ǃnā hâgu xasa.

⁴⁷Mâ danas hoas ǃaromats ge koro sekelde nî ū; ǃanusib di sekels ǃoats ge ǁîde nî ū; ǁnā sekels ge a ǀgamdisi gera.

⁴⁸Tsîts ge nē mariba Aronni tsî ǁîb di ôaga nî mā, ǁîgu hîa ge orehegu, ǀgausa ǃnā hâgu di mariba.

⁴⁹ǃNubaib ge Moseba ǁnā oremarib, ǁîgu hîa Leviǁîgu xa orehe nîga ǃnā hâgu diba ge ū;

⁵⁰ǂguroǃnaesabegu Israeli ôan digu xab ge ǁnā mariba ge ū ǀguiǀoadisi tsî ǃnonakaidisiǃnanidisikoroǀa sekelde ǃanusib di sekels ǃoa.

⁵¹Tsî Moseb ge ǁnā marib orehesagu diba Aronni tsî ǁîb di ôaga ge mā ǃKhūb di mîmās ǃoa, ǃKhūb ge Moseba mîmā xase.