Read Khoekhoegowab Numeri 30 Bible Online

Numeri 30 - Khoekhoegowab bible

Numeri 30

¹Tsî Moseb ge Israeli ôan ǀkha ge ǃhoa, ǃKhūb ge Moseba mîmān hoan ǃoa.

²Tsî Moseb ge danakhoegu Israels di ǃhaodi digu ǃoa ǃhoa tsî ge mî: Nēs ge ǃkhais, ǃKhūb ge mîmāsa:

³Khoeb ga ǃKhūba mîmâi-e mîmâibao, nū-eb ga nūo, ǀoms âbab ga ǃgaeǀhao-i ǀkha ǃgaeǀhao-o, ob ge mîs âba ǀuriǀuri tide; ǁîb di amsa xu ge ǂoan hoan ǃoa ab dī.

⁴Xawe taras ga ǃKhūba mîmâi-e mîmâiba tsî ǃgaeǀhao-i ǀkha ǃgaeǀhaoseno, ǁgûb di ommi ǃnâ, ǂkhamsis âs ǃnâ;

⁵tsî ǁgûb ga mîmâis âs tsî ǃgaeǀhaosens âs, ǁîs ǀkhas ge ǀoms âsa ǃgaeǀhaosa ǁnâuo, tsî ǁgûb ga ǁîsǀî ǃnō-o, o di ge ǁîs di mîmâidi hoade nî mâhō, os ge ǃgaeǀhaosens âs hoas, ǁîs ǀkhas ge ǀoms âsa ǃgaeǀhaosa nî mâǁapo.

⁶Xawe ǁgûb ga ǁîsa ǁnâub ra tsēs ai khôao, o di ge mîmâidi hoadi tsî ǁîs di ǃgaeǀhaodi, ǁîdi ǀkhas ge ǀoms âsa ǃgaeǀhaode mâhō tide; tsî ǃKhūb ge ǁîsa nî ǀûba si, ǁgûb ge ǁîde ge khôa kai si amaga.

⁷Tsî aobas ga ūhâ tsî ǁîs di mîmâidi ga ǁîs ai hâo, ǁîs amǁgaugu ǀkhas ge ǂoa kai xū-i, ǁî-i ǀkhas ge ǀoms âsa ǃgaeǀhao-i;

⁸tsî aob âs ga ǁîsa ǁnâu tsîb ga ǁnâub ra tsēs ai ǁîsǀî ǃnō-o, o di ge ǁîs di mîmâide nî mâǁapo, o di ge ǁîs di ǃgaeǀhaodi, ǁîdi ǀkhas ge ǀoms âsa ǃgaeǀhaode nî mâhō.

⁹Xawe aob âs ga ǁnâub ra tsēs ai ǁîde khôao tsîb ga ǁnā mîmâis, ǁîs ai hâsa ǁauǁauo, tsî amǁgaugu âs ge ǂoa kai xū-i on ǁî-i ǀkhas ge ǀoms âsa ǃgaeǀhao-i, ob ge ǃKhūba ǁnā-e nî ǀûba si.

¹⁰Tsî ǃoataras kas, ǂhāxuhe hâs kas di mîmâi-i xasa: ǁÎs di ǀomsas ga ǃgaeǀhao-ū xū-i hoa-i ge nî mâhō ǁîs ai.

¹¹Xawe aob âs di ommi ǃnâs ga mîmâi-e dīo, nū-i ǀkhas ga ǀoms âsa ǃgaeǀhao-o,

¹²xawe aob âs ga ǁnâu, xaweb ga ǁîsǀî ǃnō-o, ǁî-e khôa tamase, o di ge ǁîs di mîmâidi hoade nî mâǁapo tsî ǃgaeǀhaosens, ǁîs ǀkhas ge ǀoms âsa ǃgaeǀhaos hoas ge nî mâǁapo.

¹³Xawe aob âs ga ǁnā xūna dīǁauǁauǃario, ǁnâub ra tsēs ai, o i ge amǁgaugu âsa xu ge ǂoa xū-i hoa-i, tamas ka io mîmâis âs hoas, tamas ka io ǀoms âs di ǃgaeǀhaosa mâhō tide; ǁîs di aob ge ǁîna ge dīǁauǁau amaga, ob ge ǃKhūba ǁîsa nî ǀûba.

¹⁴Mâ mîmâi-i hoa-i, tsî mâ nū-i ǃgaeǀhaos di-i hoa-i, ǀoms nî ǃgamǃgamsense ra nūhe-i, ǁnā-eb ge aob âsa ǁapoǁapo, tamas ka io nî ǁauǁau.

¹⁵Tsî aob âs ga tsēsa xu tsēsa ǃoa ǁîsa xu ǃnōǃario, ob ge ǁîs di mîmâidi hoadi kas, ǁîs di ǃgaeǀhaosendi, ǁîs ai hâdi hoadi kasa ra ǁapoǁapo; ǁîb ge ǁîna ge ǁapoǁapo, ǁîsa xub ge ǁnâub ra tsēs ai ǃnōǃari amaga.

¹⁶Tsî ǁîdeb ga dīǁauǁautoao, ǁnâub ges khaoǃgâ, ob ge ǂhanuoǃnâsib âsa nîra tani.

¹⁷Nēdi ge ǁnā ǂnûiǂgādi, ǃKhūb ge Moseba mîmāde, aob tsî taras âb tsîra ǁaegu, ǁgûb tsî ǀgôas âb, ǂkhamsis âs ǃnâ ǁgûb di ommi ǃnâ hâs tsîra ǁaegu.