Read Khoekhoegowab Numeri 31 Bible Online

Numeri 31 - Khoekhoegowab bible

Numeri 31

²Israeli ôana ǀkhaoba Midiaǁîn tawa; ǁnās khaoǃgâts ge nîra ǀhaoǀhaohe ǁaedi âts tawa.

³Ob ge Moseba ǁaes ǀkha ǃhoa tsî ge mî: Sado xu a gu aoga ǂhomisen ǃkhammi ǃoa, î gu Midiaǁîna mâǃoa, ǃKhūb di ǀkhaosa gu nî ǀkhaose, Midiaǁîn tawa.

⁴Mâ ǃhaos hoas Israeli ǃhaodi hoadi dis xa du ge ǀguiǀoadisiga ǃkhammi ǃoa nî sî.

⁵Nēti gu ge Israeli di ǀoadisiga xu mâ ǃhaos hoasa xu ǀguiǀoadisiga ge māǁnâhe: Disiǀgamǀaǀoadisigu ǃkhammi ǁga ǁâtanisen hâga.

⁶Ob ge Moseba ǁîga ǃkhammi ǃoa ge sî, ǀguiǀoadisiga mâ ǃhaos hoasa xu, ǁîgu tsî Pinehab, Eleasari ôab pristeri tsîga ǃkhammi ǃoa, ǃanu soadi ǀkha tsî ǀgapadadi ǀōb dide ǁîb ǃomǁae.

⁷O gu ge ge ǃkham Midiaǁîn ǃoagu, ǃKhūb ge Moseba mîmā xase, tsî gu ge aoreb hoaba ge ǃgam.

⁸Tsî gu ge ǁnān ǃgamhe hân ǃgâ-ai Midianni di gao-aoga ge ǃgam: Evib, Rekemmi, Suri, Huri tsî Rebab tsîga, koro gao-aogu Midianni diga; tsî gu ge ǁkhāti gôab ǀkha Bileammi, Beori ôaba ge ǃgam.

⁹Xawe Israeli ôan ge Midiaǁî taradi tsî ǀgôan âde ge ǃkhō; tsî gu ge ǁkhāti ǁîn di goman hoan tsî ǁîn di ǀgoan hoan tsî ūn hâ xūn hoana ge ǀâ.

¹⁰ǃAruǀî gu ge ǁîn di ǃādi hoade ǁanǃkhaidi ân ǀkha tsî ǁîn di ǁaposa hâǃkhaidi hoade ǀaes ǀkha ge khauǃkhū.

¹¹Tsî gu ge ǃnarixūn hoan tsî ǁkhâuǁnâxūn hoana ge ū, khoena xu ǀgoan kōse.

¹²ǁNās khaoǃgâ gu ge ǃkhōsan tsî ǁkhâuǁnâxūn tsî ǃnarixūn tsîna Moseb ǃoa tsî Eleasari pristeri ǃoa tsî Israeli ôan di ǀhaohâb ǃoa ǁgoeǃkhais ǃnâ ge ūhā, ǂgādi Moab didi ai, Jordanǃāb amǃgâ, Jerixos ǀgūse.

¹³O gu ge Moseb tsî pristeri Eleasari tsî ǀhaohâb di ǂamsagu hoaga ǁîga ge ǃgûǃoa, ǁgoeǃkhais ǃaugab kōse.

¹⁴Ob ge Moseba kaise ge ǁaixa ǂnubis di mîmā-aogu tsî ǀoadisigu di danakhoegu tsî kaidisigu di danakhoegu, ǁnā torob di ǃkhamma xu go hāgu ǂama.

¹⁵Ob ge Moseba ǁîgu ǃoa ge mî: Taradi hoade go ǁnâi go ûi kai?

¹⁶Kō, nēdi ge ǁîdi, Bileammi di ǀapesa xu Israeli di ôana go ǃûǂam kaide ǃKhūb ǃoagu, Peori di ǃkhais ǃnâ; ǁî ǃkhaisa xub ge nē ǁōba go hā ǃKhūb di ǀhaohâb ǃnâ.

¹⁷Î go ǁnâi ǀgôaron ǃnâ hâ aoregu hoaga ǃgam; î go ǃgam mâ taras hoas, aob di ǁgoeǀkhāsa xu aoba ǂan hâsa.

¹⁸Xawe tarare ǀgôadi, aob di ǁgoeǀkhāsa a ǀūde, ǁîde go ûi kaibasen.

¹⁹Î go sago ǁgoeǃkhais ǃauga ǁgoe, hû tsēdi kōse, mâb hoab khoe-e ge ǃgammi tsî mâb hoab, ǃgamhe hâ-e ge tsâǀkhāb, ǁîba go ge ǃnonaǁî tsēs ai tsî hûǁî tsēs ai nî ǁoreo kai, hoadu, sago tsî sago di ǃkhōsan tsîdo.

²⁰Î go ǁkhāti saran hoan tsî khōn ǀkha dīhe hâ xūn hoan tsî piriǀûn ǀkha dīhe hân hoan tsî hain ǀkha dīhe hân hoana ǁoreo kai.

²¹Ob ge pristeri Eleasara toro-aogu, torob ǃoa ge hâ igu ǃoa ge mî: Nēs ge ǂnûiǂgās ǁnā ǂhanub, ǃKhūb ge Moseba mîmāb disa.

²²ǃHuniǀurib, ǀhaiǀurib, ǂaib, ǂnūǀurib, tin-i tsî ǂgoaǀurib ǀguib,

²³mâ xū-i hoa-i, ǀaesa ga tani-i, ǁî-e go ge ǀaesa nî ǃganu kai, ǃanu i nîs kōse! Tsî ti ī xawe i ge khōsens ǁgam-i ǀkha nî ǁoreo kaihe; xawe ǀaesa ga tani tama i-i hoa-e go ge ǁgammi ǃnâ nî ǃkharu kai.

²⁴Î go ǁkhāti sago di sarana ǁā hûǁî tsēs ai, ǃanu go nîse; tsî ǁnās khaoǃgâ hā ǁgoeǃkhais ǃnâ.

²⁵ǃAruǀîb ge ǃKhūba Moseb ǃoa ge mî:

²⁶ǃGôakhâi go ǀgaus ūhe hâ ǁkhâuǁnâxūn disa, khoen tsî ǀgoan tsîn disa, sats tsî pristeri Eleasari tsî danaǁgûgu ǀhaohâb digu tsîgo.

²⁷Î go ǁkhâuǁnâxūna ǀgam ǃâra ǃnâ ǀgora ǁnāgu, ǃkhamma go tsoatsoa tsî torob ǃoa ǂoagu tsî ǀhaohâb ǁaegu.

²⁸ǁNās khaoǃgâ go ge ǃKhūba ǁguiba-e nî ǂgaoǀkhāba ǁnā toro-aogu, torob ǃoa go ǂoa hâ igu xa: ǀGui ǀomsa korokaidiside xu, khoena xus kao, gomana xus kao, eselna xus kao, gūna xus kao.

²⁹ǁÎn di ǃkhareba xu go ge ǁî-e ū tsî nî prister Eleasara mā, ǃKhūb di ǁguibase;

³⁰xawe Israeli ôan di ǃkhareba xu go ge ǀgui ǃâsa nî ǃkhōǂui, khoena xus kas, gomana xus kas, eselna xus kas, gūna xus kas tsî ǀgoaǃnôan hoana xus kas hoasa, tsîts ge ǁîna Leviǁîgu, ǃKhūb tabernakeli di ǃûisa ra ǃûiga nî mā.

³¹O kha ge Moseb tsî pristeri Eleasari tsîkha ge dī, ǃKhūb ge Moseba mîmā xase.

³²Tsî ǁkhâuǁnâxūn ǁnān, toroǁaes ge ǃnarin xa ge ǃgaun ge ǃnanikaidisihûdisikoroǀaǀoadisi gū ge i;

³³tsî hûdisiǀgamǀaǀoadisi goman,

³⁴tsî ǃnanidisiǀguiǀaǀoadisi eseln,

³⁵tsî khoen di ǀomdi, ǁnā taradi, aob di ǁgoeǀkhāsa ǀū ge idi, ǁnā ǀomdi hoadi ge ǃnonadisiǀgamǀaǀoadisi ge i.

³⁶Tsî ǀgui ǃkhareb torob ǃoa ǃgûǂoa hâ ge igu dib di ǀgaus ge ǃnonakaidisiǃnonadisihûǀaǀoadisi tsî korokaidisi gū ge i.

³⁷Tsî ǁguibas ǃKhūb dis ge ǃnanikaidisihûdisikoroǀa ge i.

³⁸Tsî goman ge ǃnonadisiǃnaniǀaǀoadisi ge i; tsî ǁîn xas ge ǃKhūb di ǁguibasa hûdisiǀgamǀa ge i.

³⁹Tsî eseln ge ǃnonadisiǀoadisi tsî korokaidisi ge i; tsî ǁîn xas ge ǃKhūb di ǁguibasa ǃnanidisiǀguiǀa ge i.

⁴⁰Tsî khoen di ǀomdi ge disiǃnaniǀaǀoadisi ge i; tsî ǁîdi xas ge ǃKhūb di ǁguibasa ǃnonadisiǀgamǀa ǀomde ge i.

⁴¹Tsî Moseb ge Eleasari pristera ǁguibas, ǃKhūb ge ǃkhōkhâibahesa ge mā, ǃKhūb ge Moseba mîmā xase.

⁴²Tsî Israeli ôan di ǃkhareb, Moseb ge ǀgorab, aogu hîa gere ǃkhamgu xa,

⁴³tsî ǀgui ǃkhareb ǀhûs dib, ge gūn xa ǃnonakaidisiǃnonadisihûǀaǀoadisi tsî korokaidisi ge i;

⁴⁴tsî goman ge ǃnonadisiǃnaniǀaǀoadisi ge i;

⁴⁵tsî eseln ǃnonadisiǀoadisi tsî korokaidisi;

⁴⁶tsî khoen di ǀomde disiǃnaniǀaǀoadisi.

⁴⁷ǁNā ǃkhareb Israeli ôan dib xab ge Moseba ǀgui-e ge ūǂui, korodisi khoen tsî ǀgoan tsîna xu; tsîb ge ǁîna Leviǁîgu, ǃKhūb tabernakeli di ǃûisa ra ǃûiga ge mā, ǃKhūb ge Moseba mîmā xase.

⁴⁸ǃNubai gu ge mîmā-aogu, ǂnubis di ǀoadisigu ǂama hâgu ǀoadisigu di danakhoegu, kaidisigu di danakhoega ge dāhā;

⁴⁹tsî gu ge Moseb ǃoa ge mî: Sa ǃgāge ge ǀgaus toro-aogu disa go ǃgôakhâi, sige ǃomǁae ge hâ isa, tsî sige xab ge ǀgui khoeb xaweba ǀkhai tama hâ.

⁵⁰ǁNā-amaga ge ge sige ǃKhūba ǁguibasa go ūhāba, mâb hoaba hōb go khami: ǃHuniǀurisoa-i kas, ǁkhami-i kas, ǀkhunuǂnûida-i kas, ǃganu-i kas, ǃhororosen hâ ǃgaesen-i kas hoasa, sige ǀomde ge nî ǀûbagusa dībase, ǃKhūb di ais aiǃâ.

⁵¹Nēti kha ge Moseb tsî Eleasari pristeri tsîkha ǁîgu xa ǃhuniǀuriba ge ū, ǃgâise ge dīhe hâ i soadi hoade.

⁵²Tsî ǁguibas di ǃhuniǀurib hoab, ǃKhūba gu ge ǁguibab ge disiǃnaniǀaǀoadisihûkaidisi tsî korodisi sekel ge i, ǀoadisigu di danakhoegu xa tsî kaidisigu di danakhoegu xa.

⁵³Tsî toro-aogu xasa: Mâb hoab ge ǁî-aitsama ge ǀâbasen.

⁵⁴Nēti kha ge Moseb tsî prister Eleasari tsîkha ǃhuniǀuriba ge ū ǀoadisigu di danakhoega xu tsî kaidisigu diga xu, tsî kha ge ǁîba tentoms ǀhûs dis ǃnâ ge ūǂgā, Israeli ôan di ǂâiǂâisenxūse, ǃKhūb di ais aiǃâ.