Read Khoekhoegowab Numeri 32 Bible Online

Numeri 32 - Khoekhoegowab bible

Numeri 32

¹Tsî Rubenni ôan ge ǀgoaxa ge i, tsî Gadi ôan ge kaise ǂgui ǀgoana ge ūhâ i; tsîn ge Jaseri ǃhūb tsî Gileadi ǃhūba sī ge kō, tsî mû, ǃhūb ge ǀgoaǃhū ge i.

²On ge Gadi ôan tsî Rubenni ôan tsîna hā tsî Moseb ǀkha ge ǃhoa, tsî pristeri Eleasari ǃoa tsî ǀhaohâb di ǂamsagu ǃoa, mî raǃâ:

³Atarots, Dibons, Jasers, Nimras, Hesbons, Eleales, Sibmas, Nebos tsî Beons tsîdi,

⁴nē ǃhūb ǂûb hîab ge ǃKhūba Israeli ǀhaohâb di ais aiǃâ ǂnaub, ǁîb ge a ǀgoaǃhū, tsî sa ǃgāda ge ǀgoana ūhâ.

⁵Tsîn ge ǃarulî ge mî: ǀKhomma da ga sa mûǁae hō-o, ab ǁnā ǃhūba sa ǃgāda ǁîsis ase māhe, îts tā Jordanǃāb nauǃanib ǁga doe kai da.

⁶Ob ge Moseba Gadi ôan tsî Rubenni ôan ǃoa ge mî: Sadu di ǃgâsaga ǃkhamǃgû tsî du nî sado nēpa hâ?

⁷Tsî tare xū-i ǃaroma du kha ǁnâi Israeli ôan di ǂgaoba nî khôa, doesīn tidega ǁnā ǃhūb, ǃKhūb ge ǁîna māb ǃoa?

⁸Nēti gu ge sadu di îga ge dī, Kades-Barneasa xu ta ge ǁîga sîo, nē ǃhūba gu nî kōga.

⁹ǃGoaǃnāb Eskoli dib kōse gu ge sī tsî nē ǃhūba mûo, o gu ge Israeli ôan di ǂgaoba ge khôa, ǁnā ǃhūb, ǃKhūb ge ǁîna māb ǃoan ǃgû tidega.

¹⁰ǃNubaib ge ǃKhūb di ǁaiba ǁnātsē ge ǂhubi, tsîb ge nū tsî ge mî:

¹¹Amase gu ge nē khoegu Egipteba xu ge doeǂoaga, ǀgamdisi kurigu â-ib tsî ǁnāsa ǃnā hâba xu, ǁnā ǃhūb, tita ge Abrahammi, Isaki tsî Jakob tsîga nūbaba mû tide! Tita gu ge saohâhâ tama i xui-ao.

¹²Kaleb ǀguib, Jefuneb ôab, Kenisiǁîb, tsî Josuab Nunni ôab tsîkha; ǁîkha ge ǃKhūba saohâhâ xui-ao.

¹³Nētib ge ǃKhūb di ǁaiba ge ǂhubi Israeliǀî, tsîb ge ǁîna ǃgaroǃhūb ǃnâ ge doema kai hakadisi kurigu kōse, ǁnā ǃhaos ǂkhabase ǃKhūb mûǁae ge dīs hoas ge hapuhes kōse.

¹⁴Tsî mû, sadu ge sadu îgu ǃās ǃnâ ge khâi, sadu ǁorexa khoen di ǂnubido, ǃKhūb ǁaib di ǃgamsiba du nî ǀgamǀgamse, Israeliǀî.

¹⁵ǁÎb khaoǃgâba xu du ga ǁnāǁgôao, ob ge ǃaruǀî ǁîna ǃgaroǃhūb ǃnâ nî ǁnāxū; o du ge nē ǁaes hoasa nî hîǀhuru.

¹⁶On ge ǁîb tawa dāǀgū tsî ge mî: Sida ge nēpa sida di ǀgoana ǃharade nî dība tsî sida di ôana ǃāde nî ǂnubiba.

¹⁷Xawe sige ǂûge ge ǂhomisen tsî nî Israeli ôan di ais aiǃâ ǃhae, ǁîn di ǃkhais ǃoa ge nî ūsīns kōse. Tsî sige di ôan ge ǁaposa ǃādi ǃnâ nî hâ, ǃhūb di ǁanaon ǃaroma.

¹⁸Sige ge sige omgu ǃoa oa tide, Israeli ôan nî ǁîba ǀumixūse ūhâs kōse, mâ-i hoa-e ǁî-i di ǀumisa.

¹⁹Sida kom ǁîn ǀkha ǀumi tideo Jordanǃāb nauǃanib ai tsî aiǃâb ǃoa; sida di ǀumis ga sida di kaio, Jordanǃāb nēxaǃanib ai, aiǂoasǀî.

²⁰Ob ge Moseba ǁîn ǃoa ge mî: Nē ǃkhaisa go ga dīo, ǃKhūb di ais aiǃâ go ga ǂhomiseno ǃkhammi ǃoa,

²¹tsî mâb hoab sadu dib ga ǁâtanisen hâse ǃKhūb di ais aiǃâ Jordanǃāb nauǃanib ǃoa ǃgâuo, ǁîb di khākhoenab nî ais âb aiǃâ ūn hâna xu doeǁgaǂuis kōse,

²²tsî ǃhūb nî ǃKhūb ais aiǃâ dāhes kōse; o du ge ǁnās khaoǃgâ oa tsî nî ǀhapio ǃKhūb aiǃâ tsî Israeli aiǃâ, tsî nē ǃhūb ge nî sadu di kai, ǃKhūb di ais aiǃâ.

²³Xawe ǁnāti du ga dī tama io, mû, o du ge ǃKhūb ǃoagu ge ǁore; tsî du ge sadu di ǁoreba nîra hōǃâ, ǁîb ga sado hō-o.

²⁴Sadu di ôana ǃāde ǂnubiba, tsî sadu di gūna ǃharade dība; î du dī, sadu di amsa xu ge ǂoan hoana.

²⁵ǃNubain ge Gadi ôan tsî Rubenni ôan tsîna Moseb ǀkha ǃhoa tsî ge mî: Sa ǃgāda ge nî dī, ti ǀhonkhoets ra mî xase.

²⁶Sida di ôan, sida di taradi, sida ūhâ xūn tsî sida di goman hoan ge ǁnāpa Gileadi di ǃādi ǃnâ nî hâ.

²⁷Xawe sa ǃgāge ge nî ǃgâu, mâb hoab ǂnubisa ǂhomisen hâba, ǃKhūb di ais aiǃâ ǃkhammi ǃoa, ti ǀhonkhoets ge mî xase.

²⁸ǃNubaib ge Moseba ǁîn ǃaroma prister Eleasari tsî Josuab, Nunni ôab, tsî danaǁgûgu Israeli ôan di ǃhaodi digu tsîga ge mîmā.

²⁹Ob ge Moseba ǁîn ǃoa ge mî: Gadi ôan tsî Rubenni ôan ga sadu ǀkha Jordanna ǃgâuo, mâb hoaba torob ǃoa ǁâtanisen hâse, ǃKhūb di ais aiǃâ, tsî ǃhūb ga sadu di ais aiǃâ dāheo, o du ge ǁîna Gileadi di ǃhūba ǁîn dise nî mā;

³⁰xawe ǁâtanisen hâsen ga sadu ǀkha ǃgâu tama io, on ge sadu ǁaegu, Kanaanǃhūb ǃnâ ǁîn di ǂhunuma xūna nî ūhâ.

³¹On ge Gadi ôan tsî Rubenni ôan tsîna ǃeream tsî ge mî: ǃKhūb ge sa ǃgāda ǃoa mîn, ǁîna da ge nî dī.

³²Sida ge ǁâtanisen hâse ǃKhūb di ais aiǃâ Kanaanǃhūb ǃoa nî ǃgâu; xawe a da ǁîsis sida ǀumis disa ūhâ, Jordanǃāb nēxaǃanib ai.

³³Nētib ge Moseba ǁîna Gadi ôan, Rubenni ôan tsî Manaseb, Joseb ôab di ǃkhare ǃhaos tsîna Sihonni, Amorǁîn gao-aob di gaosis, tsî Ogi, Basanni gao-aob di gaosisa ge mā; ǃhūb, ǁîb di ǃādi ǀkha, ǀkharigu ǃnâ, ǃhūb ǂnamipe hâ ǃādi on.

³⁴Tsî Gadi ôan ge ge ǂnubibasen: Dibons, Atarots, Aroers,

³⁵Atrot-Sofans, Jasers, Jogbehas,

³⁶Bet-Nimras tsî Bet-Harans tsîde, ǁaposa ǃāde tsî ǃharadi ona.

³⁷Tsî Rubenni ôan ge ge ǂnubibasen: Hesbons, Eleales, Kirjataims,

³⁸Nebos, Baal-Meons (ǀondi âde ǀkharaǀkharahe hâǃâ) tsî Sibmas tsîde; tsîn ge ǁîn ra ǂnubi ǃādi di ǀonde ge ǂgai-unu.

³⁹Tsî Maxiri, Manaseb ôab di ôan ge Gileadi ǃoa ǃgû tsî ǁîba ū tsî Amorǁîn, ǁîb ǃnâ hâna, ūn hâna xu ge doeǁgaǂui.

⁴⁰Nētib ge Moseba Maxiri, Manaseb ôaba, Gileada ge mā; tsîb ge ǁîb ǃnâ ge ǁan.

⁴¹Tsî Jairi, Manaseb ôab ge ǃgû tsî ǁîn di ǃhaide sī ge ū, tsîb ge ǁîde Havot-Jair, ti ge ǂgai.

⁴²Tsî Nobaxi ge ǃgû tsî Kenatsa sī ge ū, ǁîs di ǃnaga mâ ǃādi ǀkha, tsî ǁîb di ǀons ǃoa Nobax ti ge ǂgai.