Read Khoekhoegowab Numeri 34 Bible Online

Numeri 34 - Khoekhoegowab bible

Numeri 34

¹ǃAruǀîb ge ǃKhūba Moseb ǃoa ge mî:

²Mîmā Israeli ôana îts ǁîn ǃoa mî: Kanaanǃhūb ǃnâ du ga ǂgâo, ob ge ǁnā ǃhūba ǀumise nî ība du, Kanaanǃhūb ǀkharigu âb ǃnâ.

³Tsî ǃkhawagas ǁhôas ge nî ība du ǃgaroǃhūb Sinna xu Edommi ǃnamkha-ū; tsî ǃkhawagas ǀkharib ge nî ība du ǂŌxahurib di ǀamsa xu aiǂoasǀî.

⁴Tsî nē ǀkharib ge nî ība du ǃkhawagasa xu Akrabimmi di ǃapadaob kōse tsî nî ǃganu Sinni ǃoa; tsî ǃgûǂoadi âb ge nî ī ǃkhawagasa xu Kades-Barneas ǁga; tsîb ge nî ǂoa Hasar-Adars ǃoa tsî nî ǃganu Asmonni ǁga.

⁵ǃAruǀîb ge nē ǀkhariba nî īǂnami Asmonna xu Egipteb di ǃāb ǃoa, tsî ǃgûǂoadi âb ge huribǀî nî ī.

⁶ǀKharib huriǂoas dib xasa, ǁnāpab ge Kaihuriba ǀkharise nî ība du; ǁîb ge sadu di ǀkharise nî ī huriǂoasǀî.

⁷ǃAruǀîb ge ǀkharib ǀapas diba nēti nî ība du: Kaihuriba xu du ge Horǃhomma nî xoamâibasen.

⁸Horǃhomma xu du ge nî xoamâibasen Hamats tawats ra sīs kōse; tsî ǃgûǂoadi nē ǀkharib didi ge Sedads ǃoa nî ī.

⁹Tsî nē ǀkharib ge nî ǂoa Sifrons ǁga, tsî ǃgûǂoadi âb ge Hasar-Enans tawa nî ī. Nēn ge ǀapas di ǀkharise nî ība du.

¹⁰ǃAruǀî du ge ǀkharise aiǂoasǀî nî xoamâibasen Hasar-Enansa xu Sefams kōse.

¹¹Tsî nē ǀkharib ge nî ǁgôa Sefamsa xu Riblas ǃoa, Ains di aiǂoasǀî; ǁnās khaoǃgâb ge nē ǀkhariba ǁgôa tsî nî ī Kinerethurib di amǃgâba-ū aiǂoasǀî.

¹²ǃAruǀîb ge nē ǀkhariba Jordanna-ū nî ǁgôa tsî ǃgûǂoadi âb ge ǂŌxahurib tawa nî ī. Nētib ge ǃhūba nî ība du ǀkharib âb ǀkha ǁîb ǂnamipe.

¹³Tsî Moseb ge Israeli ôana mîmā tsî ge mî: Nēb ge ǁnā ǃhūb, ǂnōgus ǀkha du ǀumise nî ūb, ǃKhūb ge khoese ǃhaodi tsî ǃkhare ǃhaos Manaseb disab nî māhe ǃkhaisa ge mîmāba.

¹⁴ǃHaos Rubenni ôan dis ǁîn îgu di ommi ǃoa tsî ǃhaos Gadi ôan dis ǁîn îgu di ommi ǃoa, ǁîna ge go hō xui-ao; tsî ǁkhāti Manaseb di ǃkhare ǃhaos ge ǁîs di ǀumisa go hō.

¹⁵ǀGam ǃhaora tsî ǃkhare ǃhaos tsîn, ǁîn ge ǀumis âna Jerixos tawa Jordanǃāb nēxaǀkhāb ai ge hō.

¹⁶ǃAruǀîb ge ǃKhūba Moseb ǃoa ge mî:

¹⁷Nēra ge ǀonra ǁnā aokha, sado ǁnā ǃhūba nî ǀgoraǂuikha dira: Eleasari, pristeri, tsî Josuab, Nunni ôab tsîkha.

¹⁸ǁÎkha tawa du ge mâ ǃhaos hoasa xu ǀgui ǂamsaba nî ū, ǃhūbab nî ǀumise ǀgoraǂuise.

¹⁹Tsî nēdi ge ǀondi ǁnā aogu dide: Judab di ǃhaosa xu Kaleb, Jefuneb ôab.

²⁰Tsî Simeonni ôan di ǃhaosa xu Semueli, Amihudi ôab.

²¹Tsî Benjaminni ôan di ǃhaosa xu Elidadi, Kislonni ôab.

²²Tsî Danni ôan di ǃhaosa xu ǂamsab Bukib, Joglib ôab.

²³Tsî Joseb di ôakha xa: Manaseb ôan di ǃhaosa xu ǂamsab Hanieli, Efodi ôab.

²⁴Tsî Efraimmi ôan di ǃhaosa xu ǂamsab Kemueli, Siftanni ôab.

²⁵Tsî Sebulonni ôan di ǃhaosa xu ǂamsab Elisafanni, Parnaxi ôab.

²⁶Tsî Isaskari ôan di ǃhaosa xu ǂamsab Paltieli, Asanni ôab.

²⁷Tsî Aseri ôan di ǃhaosa xu ǂamsab Ahihudi, Selomib ôab.

²⁸Tsî Naftalib ôan di ǃhaosa xu ǂamsab Pedaheli, Amihudi ôab.

²⁹Nēgu ge ǁîgu, ǃKhūb ge mîmāga, Israeli ôana gu nî ǀumide ǀgoraǂuisa, Kanaanǃhūb ǃnâ.