Read Khoekhoegowab Numeri 35 Bible Online

Numeri 35 - Khoekhoegowab bible

Numeri 35

¹Tsî ǃKhūb ge Moseb ǃoa ge ǃhoa ǂgādi Moabǁîn didi ai, Jordanǃāb amǃgâ Jerixos ǀgūse mî raǃâ:

²Israeli ôana mîmā, în ǁnā ǀumis, ǁîn nî ūhâs xa Leviǁîna ǃāde mā, ǁanǃnân nîga; ǁîdi xōǀkhā du ge Leviǁîna ǃû-aide nî mā, ǁnā ǃādi ǂnamipe ǁgoede.

³Tsî ǁnā ǃāden ge nî ūhâ ǁanǃnân nîga; xawe ǃû-aidi âdi ge ǁîn di ǀgoan, ǁîn di xūn tsî ǁîn di ûitsama xūn hoana hâǃkhaise nî ība.

⁴Tsî ǃû-aidi ǃādi didi, Leviǁîna du nî mādi, ǁîdi ge nî sī ǃās di ǂnubiǂgoaba xu tsî ǃaugab ǃoa ǀguiǀoadisi ǂhâgu kōse.

⁵Tsî du ge nî ǀguiro ǃās di ǃaugaba xu aiǂoasǀî hâ ǁhôas tawa ǀgamǀoadisi ǂhâgu kōse, tsî huriǂoasǀî hâ ǁhôas tawa ǀgamǀoadisi ǂhâgu kōse, tsî ǀapasǀî hâ ǁhôas tawa ǀgamǀoadisi ǂhâgu kōse, îs ǃāsa ǁaegu hâ. ǁÎden ge ǃû-aise, ǃādi dise nî ūhâ.

⁶Tsî ǃādi, Leviǁînats ga mādi ge ǃnani ǃnoraǃā nî ī; ǁîde du ge nî mā, ǃgamao-i nî ǁnāǀî ǁhâse; tsî ǁîde ǃnā hâse du ge ǁîna hakadisiǀgamǀa ǃāde nî mā.

⁷ǃĀdi, Leviǁînats ga mādi hoadi ge hakadisiǁkhaisaǀa ǃā nî ī, ǁîdi di aiǃādi ǀkha.

⁸ǃĀdi, Israeli ôan ūhâna xu du ga mādi, ǁîdi ǃnâ du ge ǁnān ǂguina ūhân xa ǂguide nî ū, tsî ǁnān ǀorona ūhân xa ǀorode; mâ-i hoa-i ge ǁî-i di ǀumis hîa i ra ǀumis ǃoa ǁî-i di ǃādi xa Leviǁîna nî mā.

⁹ǃAruǀîb ge ǃKhūba Moseb ǃoa ge mî:

¹⁰ǃHoa re Israeli ôan ǃoa îts ǁîna mîba: Jordanna-ū du ga Kanaanǃhūb ǃoa ǃgâuo,

¹¹o du ge ǃāde nî ūǂuibasen, ǃnoraǃāse nî ība dude; î-i ǃgamao-i, khoe-e ga ǁgapadommi ai ǃgam-e ǁnāǀî ǁhâ, ti.

¹²Tsî nē ǃādi ge ǁhaiǁhâǃkhaise nî ība du ǀkhao-aoba xu; ǃgamao-i ǁō tidega, ǀhaohâb aiǃâ i nî ǀgoraǃgâs ǃnâ mâ hâ is kōse.

¹³Tsî nē ǃādi, hîa du ga mādi ge ǃnani ǃnoraǃāse nî ība du.

¹⁴Nē ǃādi di ǃnonade du ge Jordanǃāb nēxaǃanib ai nî mā, tsî ǃnona ǃāde du ge Kanaanǃhūb ǃnâ nî mā; ǁîdi ge ǃnoraǃāse nî ī.

¹⁵Nē ǃnani ǃādi ge Israeli ôan tsî ǃhaokhoeb tsî sadu ǁaegu ǁanǀhao hâb tsîna ǁhaiǁhâse nî ība; î-i ǁnā-i, ǀomsa ǁgapadommi ai ga ǂnau-e ǁnāǀî ǁhâ.

¹⁶Xawe ǂnūǀurisîsenūxū-i ǀkha i ga ǁî-e ǂnauo, ǁō i ges kōse o i ge a ǃgamao; nē ǃgamao-i ge ǂanǂansase nî ǃgamhe.

¹⁷Tsî ǃommi di ǀui-i, ǁî-i xa i khoe-e ǁō ǁkhā-i ǀkha i ga ǁî-e ǂnoao, ǁō i ges kōse, o i ge a ǃgamao; nē ǃgamao-i ge ǂanǂansase nî ǃgamhe.

¹⁸Tsî haixū-i ǃommi di-i, ǁî-i xa i khoe-e ǁō ǁkhā-i ǀkha i ga ǁî-e ǂnauo, ǁō i ges kōse, o i ge a ǃgamao; nē ǃgamao-i ge ǂanǂansase nî ǃgamhe.

¹⁹ǀKhao-aob ǀaob dib ge ǃgamaoba nî ǃgam; ǁîbab ga ǃoao, ob ge nî ǃgam bi.

²⁰Tsî ǁkhanna xub ga ǂhā bio, ǂanapegab ga ao bio, ǁōb ges kōse,

²¹khāǂgaosiba xub ga ǃommi ǀkha ǂnau bio, ǁōb ges kōse, ob ge ǃgamaoba ǂanǂansase nî ǃgamhe, ǃgamaob a ǁî; ǀkhao-aob ǀaob dib ge ǁîba nî ǃgam, ǃoa bib kao.

²²Xawe ǃhaedāhesa xub ga khāǂgaosi-i ose ǂhā bio, ǀnî sîsenūxū-eb ga ǂâibasen tama hâse ǁîb ai ao-o,

²³ǃnapetamaseb ga ǀui-i, ǁî-i xa i khoe-e ǁō ǁkhā-i ǀkha ao-o, tsî i ga ǁîb ai ǁnāo, ǁōb nîse, ǁîb khākhoe tamab a hîa, ǁîb di ǂkhaba-eb ôa tama hâ hîa,

²⁴ob ge ǀhaohâba ǂnau-aob tsî ǀaob di ǀkhao-aob tsîkha ǁaegu nî ǀgoraǃgâ, nē ǂhanugu ǂûgu ǃoa.

²⁵Tsî ǀhaohâb ge ǃgamaoba ǀaob di ǀkhao-aob di ǃomǁaeba xu nî ore, tsî ǀhaohâb ge ǁîba ǁnā ǃnoraǃās, ǁîs ǃoab go ǁhâs ǃoa nî oa kai; ob ge ǁîs ǃnâ nî hâ, ǀgapipristeri di ǁōb kōse, ǃanu olib ǀkha ge ǂkhauǀkhāheba.

²⁶Xawe ǃgamaob ga ǂkhariroses ka xawe ǂoao, ǁîb di ǃnoraǃās, ǁîs ǃoab ge ǁhâs di ǀkhariba xu

²⁷tsî ǀaob di ǀkhao-aob ga ǁîb di ǃnoraǃās di ǀkharib ai hō bi, ǁnā ǀaob di ǀkhao-aob ga ǃgamaoba ǃgam xawes ge ǁîsa ǀaob di ǀhapise ība bi tide,

²⁸ǁîb ga ǃnoraǃās âb ǃnâ hâ hâ i xui-ao; ǀgapipristeri di ǁōb khaoǃgâb ge ǃgamaoba nî oa, ūb hâ ǃhūb ǃoa.

²⁹Tsî nē xūn ge ǂhanub di ǂnûiǂgāse nî ība du sadu di ǃhaodi tawa, sadu di ǁanǃkhaidi hoadi tawa.

³⁰Mâ-i, ǀomsa ga ǂnau-i hoa-i xasa: ǀHûǀguitimî-aogu di ams ǃoa ab ǃgamaoba ǃgamhe; xawe ǀgui ǀhûǀguitimî-ao-i ǀgui-i ge ǀoms ǃoagu ǃkhō-am tide, ǁōs nîga.

³¹Tsî du ge ǃgamaob hîa ǁōba anu hâb di ǀomsa ǂkhîbaguxū-e ūba tide; ǁîb ǂanǂansase nî ǃgamhe xui-ao.

³²ǁKhāti du ge ǁnāb hîa ǃnoraǃās âb ǃoa ge ǁhâba, ǂkhîbaguxū-e ūba tide, oa tsîb nî ǁkhawa ǁanga ǁnā ǃhūb ǃnâ, ǀgapipristeri di ǁōb kōse.

³³Nēti du ge ǁnā ǃhūb, ǁîb ǃnâ du ǁan hâba, ǀuriǀuri tide; ǀaob ǃhūba ra ǀuriǀuri amaga; tsî ǃhūb ge ǁnā ǀaob, ǁîb ǃnâ ǂnâxūhe hâb ǂama ǀnî ǂkhîbagu-e dībahe tide, ǁnāb, ǀaoba ge ǂnâxūb di ǀaob ǀguib ǀkha.

³⁴Tā ǁnâi ǃhūba ǀuriǀuri, ǁîb ǃnâ du sī nî ǁanna, ǁîb ǁaegub ǃnâ ta tita nî ǁanna: Tita ge ǃKhūta, Israeli ôan ǁaegu ǁan hâ ta xuige.