Read Khoekhoegowab Numeri 36 Bible Online

Numeri 36 - Khoekhoegowab bible

Numeri 36

¹Tsî danaǁgûgu, Gileadi ôan di ǃhaos digu, Maxiri ôab, Manaseb ôab, Joseb ôakha di ǃhaora digu ge dāhā tsî Moseb di ais aiǃâ ge ǃhoa tsî ǂamsagu, Israeli ôan di danaǁgûgu di ais aiǃâ,

²tsî ge mî: ǃKhūb ge ti ǃkhūkhoetsa ge mîmā, nē ǃhūbats nî ǂnōgusa xu Israeli di ôana ǀumise mā ǃkhaisa, tsî ti ǃkhūkhoets ge ǃKhūb xa ge mîmāhe, sida ǃgâsab Selofhadi di ǀumisats nî ǁîb di ôade mā ǃkhaisa.

³ǁÎdi ga nau ǃhaodi Israeli ôan didi di ôagu di ǀguib di tara kaio, os ge ǁîs di ǀumisa sida îgu di ǀumisa xu ǂgaeǁnâhe tsî nî ǁnā ǃhaos, ǁîs di kais kas di ǀumise dīǀarohe; nētis nî sida ǀumis di ǂnōgusa ǂgaeǁnâhe.

⁴Tsî Israeli ôan ga dâkuriba ūhâo os ge ǀumis âsa ǁnā ǃhaos, ǁîs di kais kas di ǀumise nî dīǀarohe. Nētis nî ǁîs di ǀumisa sida îgu ǃhaos di ǀumisa xu ǂgaeǁnâhe.

⁵ǃNubaib ge Moseba Israeli ôana ǃKhūb di mîs ǃoa mîmā tsî ge mî: Joseb ôakha di ǃhaos ge ǂhanuse ra ǃhoa.

⁶Nēs ge mîs, ǃKhūb ge Selofhadi ôadi xa mîmāsa, mî raǃâ: A di ǁnāgu, ǁîdi mûǁae a ǃgâigu di tara kai; xawe ǀguise di ge nî ǁîdi îb ǃhaos digu di tara kai.

⁷Nētis ge Israeli ôan di ǀumisa mā-unuhe tide ǃhaosa xu ǃhaosa ǃoa. Israeli ôan ge mâ-i hoa-e ǁî-i îgu ǃhaos di ǀumis tawa nî ǂae xui-ao.

⁸Os ge mâ ǀgôas Israeli di ǃhaodi ǃnâ ǀumisa ga ǀumis hoasa nî ǀguib, ǁîs îb di ǃhaos dib di tara kai, în Israeli ôana ǀumisa ūhâ, mâ-i hoa-e ǁî-i îgu di ǀumisa.

⁹Os ge ǀumisa mā-unuhe tide nē ǃhaosa xu nau ǃhaosa ǃoa; Israeli ôan di ǃhaodi ge mâ-i hoa-e ǁî-i îgu di ǀumis tawa nî ǂae xui-ao.

¹⁰ǃKhūb ge Moseba mîmā xase di ge Selofhadi di ôade ge dī.

¹¹Maxlas, Tirsas, Hoglas, Milkas tsî Noas tsîdi, Selofhadi di ôadi ge ǁîdi ǁnaosagu di ôagu di tara kai xui-ao.

¹²Manaseb, Joseb ôab di ǃhaodi ǃnâ di ge ǁîde ge tara kai; nētis ge ǁîdi di ǀumisa ǁîdi îb di ǃhaos tawa ge hâ.

¹³Nēn ge ǁnā mîmādi tsî ǂhanugu tsîn ǃKhūb ge Israeli ôana Moseb di ǃoabasa xu māna, ǂgādi Moabǁîn didi ai, Jordanǃāb amǃgâ, Jerixos ǀgūse.