Read Khoekhoegowab Numeri 4 Bible Online

Numeri 4 - Khoekhoegowab bible

Numeri 4

¹Tsîb ge ǃKhūba Moseb tsî Aronni tsîkha ǃoa ge mî:

²Ū ǀgaus Kehati ôagu disa Levib ôagu ǁaeguba xu ǁîgu di ǃhaodi ǃoa, ǁîgu îgu di omgu ǃoa.

³ǃNonadisi kurigu â-ib tsî ǁnāsa ǃnā hâba xu korodisi kurigu â-ib kōse; ǁîgu hîa toroǂnubisa ǁkhāba hâgu hoaga, tentoms ǀhûs dis ǃnâ gu nî sîsenna dīse.

⁴Nēs ge ǃoabas Kehati ôagu disa nî i tentoms ǀhûs dis ǃnâ; ǁîs ge a ǃanusin di ǃanusi.

⁵Tsî khoen nî does ka, o gu ge Aronni tsî ǁîb di ôaga hā tsî ǂgāmâiǃkhaib ǃgū-ais diba ūǁnâ tsî nî ǁîb ǀkha ǂgaes ǀhûǀguitimîs disa ǃgū-ai.

⁶Tsî gu ge ǃgū-ais ǃâukhōn xa ge dīhesa ǁîs ai nî ǁgui tsî ǁîs ǂamai sarab ǀhomǂhoase ge dīheba nî ǃā; tsî gu ge ǁîs di tanihaikha nî ǂgā.

⁷Tsî gu ge ǁkhāti ǁgauperegu di tāb ai ǀhomǂhoase ge dīhe saraba nî ǃā, tsî ǁîb ai nî mâi ǃoredi tsî ǀanǀanxapadi tsî ǀgabidi tsî ǃgū-aiǃoredi tsîna; ǁkhātib ge hâhâ ra pereba ǁîb ai nî hâ.

⁸ǁNās khaoǃgâ gu ge skarlakǀapa saraba ǃā ǁîb ai tsî nî ǃâukhōn xa ge dīhe ǃgū-ais ǀkha ǁîba ǃgū-ai; tsî gu ge ǁîb di tanihaikha nî ǂgā.

⁹ǁGoasi gu ge ǀhomǂhoase ge dīhe saraba ū tsî nî ǃamamǀaes di kandelara ǃgū-ai tsî ǁîb di ǃamǀaedi tsî ǁîb di ǁaraǂaoxūdi tsî ǁîb di ǀari-ūxūdi tsî ǁîb di olisoadi tsîn, ǁîn ǀkha gu ǁîba ra ǃoabana.

¹⁰Tsî gu ge ǁîba ǁkhāti sîsenūdan âb hoan ǀkha ǃâukhōn xa ge dīhe ǃgū-ais ǃnâ dī tsî nî ǁîba tanihais ai ǁgui.

¹¹Tsî ǃhuniǀuri-altars ǂamai gu ge ǀhomǂhoase ge dīhe saraba ǃā tsî nî ǁîsa ǃâukhōn xa ge dīhe ǃgū-ais ǀkha ǃgū-ai; tsî gu ge ǁîs di tanihaikha nî ǂgā.

¹²Tsî gu ge ǁkhāti nî ū ǃoabas di sîsenūdan hoan, ǁîn ǀkha gu ǃanusib ǃnâ ra ǃoabana tsî nî ǁîna ǁgui ǀhomǂhoase ge dīhe sarab ǃnâ tsî ǃâukhōn xa ge dīhe ǃgū-ais ǀkha nî ǃgū-ai; tsî gu ge ǁîna tanihais ai nî ǁgui.

¹³Tsî gu ge tsaob altars diba tsoroxū tsî ǁîs ai purpursaraba nî ǃā.

¹⁴Tsî gu ge ǁîs ai nî ǁgui ǁîs di sîsenūdan hoan, ǁîn ǀkha gu ǁîs tawa ra ǃoaban, ǂnomsoadi tsî ferkhegu tsî sîsenbē-ūxūn, altars di sîsenūxūn hoana; tsî gu ge ǁîs ai ǃâukhōn xa ge dīhe ǃgū-aisa nî ǃā; tsî gu ge ǁîs di tanihaikha nî ǂgā.

¹⁵Tsî Aronni tsî ǁîb di ôagu ga ǃanusib tsî ǃanusib di sîsenūdan hoana ǃgū-aitoao, ǁgoeǃkhaib ra ūkhâitoahe hîa, o gu ge Kehati ôaga hā tsî nî tani; xawe gu ge ǃanuba tsâǀkhā tide, ǁō gu tidega. Nēn ge Kehati ôagu nî tentoms ǀhûs dis ǃnâ tanina.

¹⁶Tsî mûǂams Eleasari, Aronni ôab, pristeri dis ge olib ǃamamǀaes dib tsî ǃgâise ra mâ ǀanǀanxūn tsî hâhâ ra ǂûǁguibas tsî ǂkhau-olib ǂama nî ī; mûǂams tabernakeli hoab dis tsî ǁîb ǃnâ hân hoan dis ǃanusib ǂama tsî sîsenūdan âb ǂama.

¹⁷Tsî ǃKhūb ge Moseb tsî Aronni tsîkha ǃoa ge mî:

¹⁸ǃHaos Kehatiǁîn disa kho ge Leviǁîn ǁaeguba xu ǁōǂoa kai tide;

¹⁹xawe kho ge nēsa ǁîna nî dī, în ûi în tā ǁō, ǃanusin di ǃanusi-en ga ǀgūo: Aronni tsî ǁîb di ôagu ge hā tsî nî ǁîga mâi, mâb hoab ǁîb di sîsenni tawa tsî ǁîb di tanis tawa;

²⁰xawe gu ge ǂgâ tide, kō nîse, ǃanub ra ǃgū-aihe hîa, ǁō gu tidega.

²¹Tsî ǃKhūb ge Moseb ǃoa ge mî:

²²Îts ǁkhāti ūǃoa ǀgaus Gersonni ôagu disa ǁîgu îgu di omgu ǃoa, ǁîgu di ǃhaodi ǃoa.

²³ǁÎgats ge ǃnonadisi kurigu â-ib tsî ǁnāsa ǃnā hâba xu korodisi kurigu â-ib kōse nî ǃgôa, ǃkhamsa ǁkhā hâgu hoaga, ǃoabasab nî ǃoabaga, tentoms ǀhûs dis ǃnâ.

²⁴Nēs ge ǃoabasa nî i Gersonni ǃhaodi disa, ǃoabas tsî tanis tawa.

²⁵ǁÎgu ge nî tani tabernakeli di îǂgoade tsî tentoms ǀhûs dis, ǁnās ge ǁîs di ǃgū-aisa tsî ǃâukhōǂganais, ǀgapise hâsa, tsî tentoms ǀhûs dis di dao-ams di aisa;

²⁶tsî ai-ommi di ǂgāmâiǃkhaiga, tsî ai-ommi ǁāb di dao-ams di aisa, tabernakeli tawa hâs tsî altars ǂnamipe hâsa; tsî ǁîb di tsurigu, tsî ǁîgu ǃoabas di sîsenūdan hoana tsî dīhesa anu hân hoana, î gu ǃoaba.

²⁷ǃOabas hoas Gersonni ôagu dis, ǁîgu di tanis hoas ǃnâ, tsî ǁîgu di ǃoabas hoas ǃnâ, ǁîs ge nî ī Aronni tsî ǁîb ôagu di mîmās ǃoa; tsî sakho ge ǁîgu di tanidi hoade ǁîga nî ǁgui-ai.

²⁸Nēs ge ǃoabas Gersonni ôagu di ǃhaodi disa tentoms ǀhûs dis ǃnâ; tsî ǁîgu di ǃûis ge Itamari, Aronni ôab, pristeri di ǃommi ǃnâ nî hâ.

²⁹Tsî Merarib ôagu xasa, ǁîgats ge ǁîgu di ǃhaodi ǃoa, ǁîgu îgu di omgu ǃoa nî ǃgôa.

³⁰ǁÎgats ge nî ǃgôa ǃnonadisi kurigu â-ib tsî ǁnāsa ǃnā hâba xu korodisi kurigu â-ib kōse ǃkhamsa ǁkhā hâgu hoaga, ǃoabas tentoms ǀhûs dis disa nî ǃoabase.

³¹Nēs ge ǃkhōǀgaipes ǁîgu tanis dise nî ī, ǁîgu ǃoabas hoas disa tentoms ǀhûs dis ǃnâ: Omǀgaub tabernakeli dib tsî ǁîb di ǃnâkeǃkhâbehaigu tsî ǃnâkeǃkhâbeǃnaogu tabernakeli digu tsî ǁîb di daoǁkhaegu tsî ǁîb di ǂkhâǃnâhaigu tsî ǁîb di ǂaidi;

³²tsî ai-ommi ǂnamipe hâ ǂkhâǃnâhaigu tsî ǁîb di ǂaidi tsî ǁîb di ǂgāǀurigu tsî ǁîb di tsurigu tsîn ǁîgu di sîsenūdan hoan ǀkha tsî ǁîgu di ǃoabas hoas ǀkha, tsî sîsenūdan ǁîgu nî ǃûi tsî tanin, ǁînats ge ǀondi ǀkha nî ǃgôa.

³³Nēs ge ǃoabas Merarib ôagu di ǃhaodi disa, ǁîgu di ǃoabas hoas ǃoa tentoms ǀhûs dis ǃnâ Itamari, Aronni ôab, pristeri di ǃommi ǃnâ.

³⁴O gu ge Moseb tsî Aronni tsî ǀhaohâb di ǂamsagu tsîga Kehati ôaga ge ǃgôa, ǁîgu di ǃhaodi ǃoa tsî ǁîgu îgu di omgu ǃoa.

³⁵ǃNonadisi kurigu â-ib tsî ǁnāsa ǃnā hâba xu korodisi kurigu â-ib kōse ǃkhamsa ǁkhā hâgu hoaga, ǃoaba gu nîse tentoms ǀhûs dis ǃnâ;

³⁶ǁîgu di ǃgôahe hâgu ge ǁîgu di ǃhaodi ǃoa ǀgamǀoadisihûkaidisi tsî korodisi ge i.

³⁷Nēgu ge ǃgôahe hâgu, Kehatiǁîn digu, tentoms ǀhûs dis ǃnâ ra ǃoabagu hoagu, Moseb tsî Aronni tsîkha xa ge ǃgôahe ga, ǃKhūb di mîmās ǃoa, Moseb ǃomma xu.

³⁸ǁNās ǁkhās xase Gersonni ôagu di ǃgôahe hâgu ǁîgu di ǃhaodi ǃoa tsî ǁîgu îgu di omgu ǃoa.

³⁹ǃNonadisi kurigu â-ib tsî ǁnāsa ǃnā hâba xu korodisi kurigu â-ib kōse, ǃkhamsa ǁkhā hâgu hoaga, ǃoaba gu nîga tentoms ǀhûs dis ǃnâ;

⁴⁰ǁîgu di ǃgôahe hâgu ge ǃhaodi âgu ǃoa tsî ǁîgu îgu di omgu ǃoa ǀgamǀoadisiǃnanikaidisi tsî ǃnonadisi ge i.

⁴¹Nēgu ge ǃgôahe hâgu Gersonni ôagu ǃhaodi diga, tentoms ǀhûs dis ǃnâ gere ǃoabaga, Moseb tsî Aronni tsîkha xa ge ǃgôahe ga ǃKhūb di mîmās ǃoa.

⁴²Tsî ǃgôahe hâgu Merarib ôagu di ǃhaodi digu ǁîgu di ǃhaodi ǃoa tsî ǁîgu îgu di omgu ǃoa:

⁴³ǃNonadisi kurigu â-ib tsî ǁnāsa ǃnâ hâba xu korodisi kurigu â-ib kōse ǃkhamsa ǁkhā hâgu hoagu, ǃoaba nîga tentoms ǀhûs dis ǃnâ.

⁴⁴ǁÎgu di ǃgôahe hâgu ge ǃhaodi âgu ǃoa ǃnonaǀoadisi tsî ǀgamkaidisi ge i.

⁴⁵Nēgu ge ǃgôahe hâgu Merarib ôagu di ǃhaodi diga, Moseb tsî Aronni tsîkha xa ge ǃgôahega, ǃKhūb di mîmās ǃoa Moseb ǃomma xu.

⁴⁶Tsî ǃgôahe hâgu Leviǁî ǃhaos digu, Moseb tsî Aronni tsî Israels ǂamsagu tsîgu xa ge ǃgôahega, ǁîgu di ǃhaodi ǃoa, tsî ǁîgu îgu di omgu ǃoa:

⁴⁷ǃNonadisi kurigu â-ib tsî ǁnāsa ǃnā hâba xu korodisi kurigu â-ib kōse, ǃoabas di sîsenni tsî tanis di sîsenna dīsa ǁkhā hâb hoab tentoms ǀhûs dis ǃnâ nî ǃoabaga,

⁴⁸ǁîgu di ǃgôahe hâgu ge ǁkhaisaǀoadisikorokaidisi tsî ǁkhaisadisi ge i.

⁴⁹ǃKhūb di mîmās ǃoa gu ge ge ǃgôahe Moseb di ǃomma xu, mâb hoaba ǁîb di ǃoabasa ǃoa tsî ǁîb di tanisa ǃoa; tsî ǁîgu ǃgôahe ge gu ge nēga, ǃKhūb ge Moseba mîmās xase.