Read Khoekhoegowab Numeri 5 Bible Online

Numeri 5 - Khoekhoegowab bible

Numeri 5

¹Tsîb ge ǃKhūba Moseb ǃoa ge mî:

²Israeli ôana mîmā, în ǁgoeǃkhaisa xu sîbē ǃomamaxan hoan, tsî ǂnâ ran hoan, tsî ǁō hâ-i xa a ǀurisan hoana.

³Aoreba xu tarares kōsets ge ǁîna nî sîbē; ǁgoeǃkhaisa xuts ge ǃaugab kōse nî sîbē in, în ǁgoeǃkhais ân, ǁîs ǁaegu ta ǁan hâsa tā ǀuriǀuri.

⁴On ge Israeli ôana ǁnāti ge dī tsî ǁgoeǃkhais ǃaugab kōse ǁîga ge sî; ǃKhūb ge Moseb ǀkha ǃhoas ǁkhās xasen ge Israeli ôana gere dī.

⁵ǃAruǀîb ge ǃKhūba Moseb ǃoa ge mî:

⁶ǃHoa Israeli ôan ǃoa: Aob kas, taras kas ga khoesi ǁoren xa ǀgui-e dī tsî ǃûǂam-i ǀkha ǃKhūb ǃoagu ǃûǂamo, os ge ǁnā ǀomsa a ǀhapixa.

⁷On ge ǁoren ge ǁoreba nî ǁguiǁnâ; ǁnās khaoǃgâ i ge ǁî-i di surudeba nî dī-unu-ai, danaǀgaus âs tsî koroǁî ǃâs âs ǃoa i ge ǃnā hâse dīǀaro tsî nî ǁî-e mā, ǁî-i tawa i ge ǀhapixa-e.

⁸Xawe ǁnā khoeb ga ore-aob surudeb nî ǁîba mādawa-amheb xareba ūhâ tama io, ob ge ǁnā surudeb ǃKhūba nî mādawa-amheba nî pristeri di kai, bairab ǂkhîbagus dib, ǁîb ǀkhab ra ǂkhîbagusa dīb ose.

⁹ǁNās ǁkhās xasen ge ǃkhōkhâiǁguiban hoan, Israeli ôan di ǃanu xūn hoan, pristeri ǃoan ra ūhāna nî ǁîb di.

¹⁰Tsî mâ-i hoa-i di ǃanu xūn ge nî ǁîb di; khoe-i ga pristera mā xū-i hoa-i ge nî ǁîb di.

¹¹ǃAruǀîb ge ǃKhūba Moseb ǃoa ge mî:

¹²Israeli ôan ǀkha ǃhoa îts mî: Aob di taras ga ǁnāǁgôa tsî ǃûǂam-i ǀkha ǁîb aiǃâ ǃûǂamo;

¹³ǀkhara khoeb ga ǁîs ǀkha ǁgoeo tsî ǁî ǃkhais ga aob âs di mûra ǃnâ ǂganǃgâsao tsî ǁîs ga ǃkhaisa gaugauo, ǀurisa kais ge xawe; ǃkhō-amao-i ga ǁîs ǃoagu ǀkhaio, dīs ǃnâs ǃkhōhe tama hâ xui-ao;

¹⁴tsî gagas tauxasib dis ga ǁîb ǂama hā tsîb ga taras âb ǂama tauo, ǃanuoǃnâs ge amaga; gagas tauxasib dis ga ǁîb ǂama hā tsîb ga taras âb ǂama tauo, ǃanuoǃnâ tamas hâ xawe;

¹⁵ob ge ǁnā aoba taras âba pristeri tawa nî ūsī tsîb ge nî ǁguibas âs ona ūsī, disiǁî ǃâs ǀgui efab gersttsampereb disa; tsîb ge oli-e ǂnâ-aisi tide tsî wiroka ǁgui-ai si tide, tauxasib di ǁguibas a amaga, ǂûǁguibas ǂâiǂâisens dis a amaga ǂhanuoǃnâsib xa nî ǂâihese.

¹⁶Ob ge pristera ǁîsa nî ǀgū kai, ob ge ǁîsa ǃKhūb di ais aiǃâ nî mâi.

¹⁷Ob ge pristera ǃanu ǁgam-i xa ǃhūsoa-i ǃnâ nî ū; tsî tsarab tabernakeli di ǃhūb ai hâb xab ge pristera ū tsî nî ǁgam-i ǃnâ ǂgā bi.

¹⁸ǁGoasib ge pristera tarasa ǃKhūb di ais aiǃâ mâi tsî ǁîsa ǀōdana kai tsî nî ǂûǁguibas ǂâiǂâisens dis—tauxasib di ǂûǁguibasa—ǁîs di ǃomǁae ǁgui; tsî pristeri ǃomǁaeb ge au ǁgam-i, ǀâxareba ra ūhāba nî hâ.

¹⁹Ob ge pristera ǁîsa nūba tsî ǁnā taras ǃoa nî mî: Khoe-i xare-i ga sa ǀkha ǁgoe tama io tsî aob âs ǃnâ hâǃâs ga ǃanuoǃnâsi-i ǃoa ǁnāǁgôa tama io, as ǃnorasa nē au ǁgam-i xa, ǀâxareba nî ūhāba;

²⁰xawe sa aob ǃnâ hâǃâs ga ǁnāǁgôa tsî ǃanuoǃnâo, sa aob oseb ge ǀnî khoeba sa ǀkha ǁgoe ǃkhais ǃaroma;

²¹ob ge pristera ǁnā tarasa ǀâxarexūsens di nūb ǀkha nî nūba tsî pristeri ge taras ǃoa nî mî: Ab ǃKhūba ǂnûi si ǀâxarese tsî nūse sa ǁaes ǁaegu, îb ǃKhūba sa ǂnamisa toa kai tsî sa ǃnāba xâi kai;

²²îb nē ǁgam-i ǀâxareba ra ūhāba sa ǃnāb ǃnâ ǂgâ, ǃnābab nî xâi kaise tsî ǂnamisab nî toa kaise. ǃNubais ge ǁnā tarasa Amen, Amen! ti nî mî.

²³Ob ge pristera nē ǀâxaregu ǁkhāga ǂhapeb ai xoa tsî nî ǁîga au ǁgam-i ǀkha ǀari.

²⁴Tsîb ge ǁnā tarasa ǁnā au ǁgam-i, ǀâxareba ra ūhā-e nî āsi, î-i ǁgam-i, ǀâxareba ra ūhā-e ǁîs ǃnâ ǂgâ, aubahes nîga.

²⁵Tsî pristeri ge ǁnā taras di ǃomǁaeba xu ǂûǁguibas tauxasigu disa ū tsî ǁnā ǂûǁguibasa ǃKhūb di ais aiǃâ gongon tsî nî ǁîsa altars ai ǁguiba.

²⁶Tsî pristeri ge ǁkhāti ǁnā ǂûǁguibas xa ǂâiǂâisenǁguibase ǀgui ǃomsǀoa-e ū tsî nî ǁîsa altars ai ǂhubi; tsî ǁnās khaoǃgâb ge ǁnā ǁgam-e ǁnā tarasa nî āsi.

²⁷Tsî ǁnā ǁgam-eb ga ǁîsa āsio, o-i ge ǁgam-i, ǀâxareba ra ūhā-e ausib ǃoa ǁîs ǃnâ nî ǂgâ, ob ge ǃnāb âsa nî xâi, os ge ǂnamis âsa nî toa; os ge ǁnā tarasa ǁaes âs ǁaegu ǀâxarese nîra hâ.

²⁸Xawe taras ga ǃanuoǃnâ tama i, tsîs ga ǃanu, os ge nî ǃnorasa, os ge suriba nî ǀkhaehe.

²⁹Nēb ge ǂhanub tauxasib diba, taras ga aob ǃnâ hâǃâ ǁnāǁgôa tsî ǃanuoǃnâo;

³⁰aob ǂamas ga gagas taus disa hā, tsîb ga taras âb ǂama tauo, ob ge tarasa ǃKhūb di ais aiǃâ nî mâi, îb pristera ǁîs tawa nē ǂhanub hoaba ǀoaǀoa.

³¹Tsî aob ge nî ǀhapio ǂhanuoǃnâsiba xu, xawe ǁnā taras ge ǁîs di ǂhanuoǃnâsiba nîra tani.