Read Khoekhoegowab Numeri 6 Bible Online

Numeri 6 - Khoekhoegowab bible

Numeri 6

¹Tsîb ge ǃKhūba Moseb ǃoa ge mî:

²ǃHoa re Israeli ôan ǃoa îts mî: Aob kas, taras kas hoas ga khaisen tsî Nasireǁî-i di mîmâisa mîmâi o, ǃKhūba i nî khaisenbase,

³o i ge ǂauxûib tsî ǀgaisa xûiba xu nî khaisen; ǀkhuruxûib ǂauxûib xa ge dīheb tsî ǀgaisa xûib xa ge dīhe ǀkhuruxûiba i ge ā tide, tsî ǀasa, ǂnâsa ǂauxûiǂûnab ge ǂû tide.

⁴Nasireǁîsis â-i di tsēdi hoadi kōse i ge xū-i hîa ǂauxûib di hais xa dīhe hâ-e ǂû tide, ǂarana xu soron kōse.

⁵Nasireǁîsis â-i mîmâis tsēdi hoadi kōses ge ǂkhomgôasa ǁî-i di danas ai hā tide; ǁnā tsēdi, ǃKhūba i nî khaisenba hâdi nî ǀoas kōse i ge nî ǃanu, danaǀûn â-e ra ǀom kaiǃâ.

⁶ǁNā tsēdi, ǁî-i ǃnâ i ǃKhūba khaisenba hâdi kōse i ge ǁō hâ-i di sorosa sī ǀgū tide.

⁷ǁGûb kas ǁgûs kas, ǁî-i di ǃgâsab kas, ǁî-i di ǃgâsas kas hoasa xawe i ge ǁîn ǃaroma ǀuriǀurisen tide, ǁōn kao, Nasireǁîsis ǁî-i Elob dis ge ǁî-i danas ai hâ xui-ao.

⁸ǁÎ-i Nasireǁîsis tsēdi hoadi kōse i ge ǃKhūba a ǃanuba.

⁹Tsî ǁō hâ-i ga ǁî-i tawa ǃnapetamase tsî ǃhaese ǁō-o, Nasireǁîsis â-i danasa i nî ǀuriǀuribahes kōse, o i ge ǁî-i ǃanuǃanusens di tsēs ai danasa nî ǂkhom.

¹⁰Tsî ǁkhaisaǁî tsēs ai i ge ǀgam ǂnaira kas, ǀgam ǂkham ǂnabura kas hoasa pristeri ǃoa nî ūsī, tentoms ǀhûs dis di dao-ams tawa.

¹¹Ob ge pristera ǀguisa ǁoreǁguibase tsî nausa khauǁguibase ǁāǁā tsî ǁî-e nî ǂkhîbagu kai, ǁō hâ sorosa i ge ǁore-ūsa xu; nēti i ge ǁî-i di danasa ǁnā tsēs ǁkhās ai nî ǃanuǃanu.

¹²ǁNās khaoǃgâ i ge tsēdi ǁî-i Nasireǁîsis dide ǃKhūba nî khaiba tsî ǁkhao-i ǀgui kurixa-e ǀhapiǁguibase nî ǁguiba; tsî aibekam tsēdi ge nî ǁau, ǁî-i di Nasireǁîsis ge ǀuriǀurihe amaga.

¹³Tsî nēb ge ǂhanub Nasireǁî-i diba: ǁNā tsēs, ǁîs ais ga ǁî-i Nasireǁîsisa ǀoas ai i ge nēna tentoms ǀhûs dis di dao-ams tawa nî ūsī.

¹⁴O i ge ǁî-i di ǁguibase ǃKhūba nî ǁguiba ūo ǀgui kurixa ǁkhaoba, khauǁguibase tsî ūo ǀgui kurixa ǁkhaosa, ǁoreǁguibase tsî ūo bairaba, ganganǁguibase;

¹⁵tsî ǀgui ǀharus ǀkhuruoǃnâ amperedan ǀkha, tsampereb ǀkha dīhe hâ amperedan, olib ǀkha ǂnâ-aihe hân, tsî ǀkhuruoǃnâ ǂhaba tsamperen, olib ǀkha ǂnâ-aihe hân, ǁîn di ǂûǁguibas tsî ǁîn di ǂnâǁguibadi tsîn ǀkha.

¹⁶Tsî pristeri ge ǁîna ǃKhūb di ais aiǃâ ūsī tsî nî ǁî-i di ǁoreǁguibas tsî ǁî-i di khauǁguibas tsîra ǁāǁā.

¹⁷Tsîb ge ǁkhāti bairaba ganganǁguibase ǃKhūba nî ǁguiba ǀkhuruoǃnâ tsamperen hâǃnâ ǀharus ǀkha; tsî pristeri ge ǁî-i di ǂûǁguibas tsî ǁî-i di ǂnâǁguibas tsîra nî ǂhomi.

¹⁸Tsî Nasireǁî-i ge ǁnās khaoǃgâ tentoms ǀhûs dis di dao-ams tawa danas ǁî-i Nasireǁîsis disa nî ǂkhom; o i ge Nasireǁîsis â-i di danaǀûna ū tsî nî ǁîna ǀaes, ganganǁguibas ǃnaga hâs ai ǁgui.

¹⁹ǁNās khaoǃgâb ge pristera sâihe hâ ǁgarab bairab diba nî ū tsî ǀkhuruoǃnâ amperedaba ǀharusa xu tsî ǀkhuruoǃnâ ǂhaba peredaba; tsîb ge ǁîna Nasireǁî-i di ǃomkha ai nî ǁgui, ǁî-i di Nasireǁîsis ǀûna i ga ǂkhomo.

²⁰Tsî pristeri ge ǁîna gongonǁguibase nî gongon ǃKhūb di ais aiǃâ: ǁÎs ge pristera ǃanu xūse ība gongonǁguibas di ǁkhaib ǀkha tsî ǃkhōkhâiǁguibas di ǁgarab ǀkha; ǁnās khaoǃgâ i ge ǁnā Nasireǁî-e ǂauxûiba ā ǁkhā.

²¹Nēb ge ǂhanub, Nasireǁî-i ge ǃKhūba Nasireǁîsis â-i di ǁguibase nūbaba tsî ǃommi â-i ga hō xū-i hoa-i dib; ǁî-i di mîmâis hîa i ga mîmâis ǁkhās xase i ge nî dī, Nasireǁîsis di ǂhanub ǃoa.

²²Tsî ǃKhūb ge Moseb ǃoa ge mî:

²³ǃHoa re Aronni tsî ǁîb ôagu ǀkha îts mî: Nēti go ge Israeli ôana nî ǀkhae, ǁîna ǃoa ra mîǃâ:

²⁴Ab ǃKhūba ǀkhae tsi îb sâu tsi!

²⁵Ab ǃKhūba ǁîb di aisa ǃnâǃnâǂam tsi, îb ǀkhom tsi!

²⁶Ab ǃKhūba ǁîb di aisa ūkhâiǂam tsi îb ǂkhîba mā tsi!

²⁷Nēti gu ge ti ǀonsa Israeli ôan ai nî ǁgui; tsî tita ge ǁîna nîra ǀkhae.