Read Khoekhoegowab Numeri 8 Bible Online

Numeri 8 - Khoekhoegowab bible

Numeri 8

¹ǃNubaib ge ǃKhūba Moseb ǃoa ge mî:

²ǃHoa re Aronni ǃoa îts ǁîba mîba: ǃAmamǀaedets ga ǃamamo, o di ge hû ǃamamǀaede kandelari ǃoa-ai nî ǃnâ.

³Ob ge Aronna ǁnāti ge dī. Kandelari ǃoa-aib ge ǁîb di ǃamamǀaede ge ǃamam; ǃKhūb ge Moseba mîmā khami.

⁴Tsî kandelari ge ǃhuniǀuri ǀgui ge i, ǁôab âb kōse, ǃkhārogu âb kōseb ge ǂnauǃgâiǃgâihe hâ ge i; ǁnā īsib, ǃKhūb ge Moseba ǁgaub ǁkhāb xaseb ge kandelara gere dī.

⁵Tsî ǃKhūb ge Moseb ǃoa ge mî:

⁶Ū Leviǁîga Israelǁîn di ǁaeguba xu îts ǁîga khai.

⁷Tsî nētits ge ǁîga nî dī, ǁîgats nî ǃanuǃanuga: ǁÎgu ai ǀgapi ǁoreokais di ǁgam-i xa, î gu ǂkhomgôasa ǁîgu di ǁgans hoas ai hā kai, î gu ǁîgu di sarana ǁā, î gu ǃanuǃanusen.

⁸ǁNās khaoǃgâ gu ge nî ū ǂkham ǁgōba, ǁîgu di ǂûǁguibas tsampereb dis, olib ǀkha ǂnâ-aihe hâb dis ǀkha; tsî ǀnî ǂkham ǁgōbats ge nî ū ǁoreǁguibase.

⁹Tsîts ge Leviǁîga tentoms ǀhûs disa nî ǀgūǀgū; tsîts ge ǀhaohâb Israeli ôan dib hoaba nî ǀhûǀhû.

¹⁰Ā, Leviǁîgats ge ǃKhūb di aisa nî ǀgū kai, on ge Israeli ôana ǃomgu âna Leviǁîga nî ǁgui-ai.

¹¹Ob ge Aronna Leviǁîga gongonǁguibase ǃKhūb di ais aiǃâ nî gongon, Israeli ôan ǂama, hâ tsî gu nî ǃKhūb di ǃoabasa ǃoabase.

¹²O gu ge Leviǁîga ǃomgu âga ǁgōkha di danara ai nî ǁgui; ǁnās khaoǃgâts ge ǀguiba ǁoreǁguibase tsî nauba khauǁguibase ǃKhūba nî ǁāǁāba, Leviǁîgu ǂamats nî ǂkhîbagusa dīse.

¹³Tsîts ge Leviǁîga Aronni di ais aiǃâ tsî ǁîb ôagu di ais aiǃâ nî mâi, tsîts ge ǁîga gongonǁguibase ǃKhūba nî ǁguiba.

¹⁴Tsîts ge Leviǁîga Israeli ôan di ǁaeguba xu nî ǀgora, Leviǁîgu nî tiga.

¹⁵Tsî ǁnās khaoǃgâ gu ge Leviǁîga nî ǂgâ, tentoms ǀhûs disa gu nî ǃoabaga; tsîts ge ǁîga nî ǃanuǃanu, tsîts ge ǁîga gongonǁguibase nî gongon.

¹⁶ǁÎgu ge māhe hâ, tita gu ge māhe hâ Israeli ôan di ǁaeguba xu; ǁhās hoasa ra ǁkhowa-ammi, ǂguroǃnaesabeb Israeli ôan dib hoab di amǃnâs ai ta ge tita ǁîga ge ū.

¹⁷ǂGuroǃnaesabeb Israeli ôan dib hoab ge a ti amaga, khoen ǃnâs kao, ǀgoan ǃnâs kao; Egipteǃhūb ǃnâ ta ge ǂguroǃnaesabegu hoaga ǂnau tsēs ai ta ge ǁîga ge khaibasen.

¹⁸Tsî tita ge Leviǁîga ge ū ǂguroǃnaesabegu Israeli ôan digu hoagu di amǃnâs ai.

¹⁹Tsî tita ge Leviǁîga Aronni tsî ǁîb di ôaga ǀkhaexūse ge mā, Israeli ôan di ǁaeguba xu, ǃoabas Israeli ôan disa gu nî tentoms ǀhûs dis ǃnâ ǃoabase, tsî Israeli ôana gu nî ǂkhîbagusa dībase, ǁnora-ai-i xare-i Israeli ôan ǃnâ hâ tidega, Israeli ôan ga ǃanusiba ǀgūo.

²⁰Tsî Moseb tsî Aronni tsî Israeli ôan di ǀhaohâb hoab ge Leviǁîgu tawa ǃKhūb ge Moseba Leviǁîgu xa mîmān hoan ǃoa ge dī, ǁnās ǁkhās xasen ge Israeli ôana ǁîgu tawa ge dī.

²¹O gu ge Leviǁîga ǁoreokaisen tsî saran âga ge ǁā, tsî Aronni ge ǁîga gongonǁguibase ge gongon ǃKhūb di ais aiǃâ; tsî Aronni ge ǁîgu ǂama ǂkhîbagusa ge dī, ǁîgab nî ǃanuǃanuse.

²²Tsî ǁnās khaoǃgâ gu ge Leviǁîga ge hā, ǁîgu di ǃoabasa gu nî ǃoabase, tentoms ǀhûs dis ǃnâ Aronni di ais aiǃâ tsî ǁîb ôagu di ais aiǃâ; ǃKhūb ge Moseba Leviǁîgu xa mîmās ǁkhās xasen ge ǁîgu tawa ge dī.

²³Tsî ǃKhūb ge Moseb ǃoa ge mî:

²⁴Nēs ge Leviǁîgu xa hâ: ǀGamdisikoroǀa kurigu â-ib tsî ǁnāsa ǃnā hâba xu gu ge nî ǂgâ, ǂnoaguba nî ǂnoaguse tentoms ǀhûs dis di ǃoabas ǃnâ.

²⁵Xawe korodisi kurixab kao, ob ge ǂnoagus nē ǃoabas disa xu nî ǃnora, tsîb ge ǃaruǀî ǃoaba tide.

²⁶Tsîb ge ǃgâsagu âb ǀkha nî ǃoaba, tentoms ǀhûs dis ǃnâ ǃûisa nî ǃûise, xawe ǃoabasab ge ǃoaba tide. ǁNātits ge Leviǁîgu tawa nî dī ǁîgu di ǃûidi ǃnâ.