Read Khoekhoegowab Numeri 9 Bible Online

Numeri 9 - Khoekhoegowab bible

Numeri 9

¹Tsîb ge ǃKhūba Moseb ǀkha ge ǃhoa ǃgaroǃhūb Sinaib ǃnâ ǀgamǁî kurib ǃnâ, Egipteǃhūba xun ge doeǂoas khaoǃgâ, ǂguro ǁkhâb ǃnâ, mî rase:

²An Israeli ôana Pasxaba dī mîmâisa ǁaeb ai;

³disihakaǀaǁî tsēs nē ǁkhâb dis ai du ge ǁîba nî dī, ǀgam ǃûiǁaekha ǁaegu, mîmâisa ǁaeb ai; ǁîb di ǂnûiǂgādi hoadi ǃoa, tsî ǁîb di ǂhanugu hoagu ǃoa du ge ǁîba nî dī.

⁴Ob ge Moseba Israeli ôan ǀkha ge ǃhoa, Pasxaban nî dīsa.

⁵On ge Pasxaba gere dī disihakaǀaǁî tsēs ǂguro ǁkhâb dis ai ǀgam ǃûiǁaekha ǁaegu ǃgaroǃhūb Sinaib ǃnâ; ǃKhūb ge Moseba mîmās ǁkhās xasen ge Israeli ôana ge dī.

⁶ǃNubain ge khoena hâ ge i, ǁō hâ soros khoe-i dis ǂama ge ǃanuoǃnân, tsî ǁnā tsēs ǁkhās ai Pasxaba dī ǁoa ge ina; ǁnā-amagan ge Moseb di ais aiǃâ tsî Aronni di ais aiǃâ ge hā ǀgū ǁnā tsēs ǁkhās ai.

⁷Tsî ǁnā khoen ge ǁîkha ǃoa ge mî: Sida ge a ǃanuoǃnâ ǁō hâ soros khoe-i dis ǂama; tare xū-i ǃaroma da kha ǁnâi nî tôasi, ǃKhūb di ǁguibasa da ǁîb di mîmâisa ǁaeb ai ǁguiba ǁkhā tidese, Israeli ôan ǁaegu?

⁸Ob ge Moseba ǁîn ǃoa ge mî: Mâ, î ta tita ǁnâu tare xū-eb nî ǃKhūba mîmā ǃkhaisa.

⁹ǁGoasib ge ǃKhūba Moseb ǃoa ge mî:

¹⁰ǃHoa re Israeli ôan ǃoa îts mî: Khoe-i sadu di-i tsî sadu ǃhaodi di-i ga ǁō hâ soro-i ǂama ǃanuoǃnâ xawe, ǃnū daob ai i ga hâ xawe i ge ǃKhūba Pasxaba nî dība.

¹¹ǀGamǁî ǁkhâb ǃnâ, disihakaǀaǁî tsēs ai, ǀgam ǃûiǁaekha ǁaegun ge ǁîba nî dī; ǀkhuruoǃnâ peregu tsî au ǁharen ǀkhan ge ǁîba nî ǂû.

¹²ǁÎn ge ǁîb xa xū-e ǃgau tide, ǁgoas kōse, tsîn ge ǁîb di ǂkhō-i xare-e khôa tide; Pasxab di ǂnûiǂgās hoas ǃoan ge ǁîba nî dī.

¹³Khoe-i ga ǃanu tsî i ga daob ai hâ tama i, xawe i ga Pasxaba dīsa ǁnākhao hâo, ǁnā ǀoms ǂhanis ge ǁîs di ǁaede xu nî ǃhomǂuihe; ǁîb ge ǁguibas ǃKhūb disa ǁaeb âb ai ǁguiba tama amagab ge ǁnā khoeba ǁoreb âba nî tani.

¹⁴Tsî ǃhaokhoe-i ga sadu tawa ǃhaokhoese hâo, tsî i ga ǁkhāti Pasxaba ǃKhūba dībao, o i ge Pasxab di ǂnûiǂgās ǃoa tsî ǁîb di dommi ai ǁîba nî dī; ǀgui ǂnûiǂgās ǀguisa du ge nî ūhâ, ǃhaokhoe-i kas, ǃhūb ǃnaesabe-i kas hoasa.

¹⁵Tsî tabernakeli ge ǂnubikhâihe tsēs ais ge ǀnanusa tabernakela ge ǃgū-ai, ǀhûǀguitimîs di tentoms ai; tsî ǃuia i ge tabernakeli ai ǀaes di ī-i khami ge i, ǁgoas kōse.

¹⁶ǁNāti i ge hugaǀgui ge ī, ǀnanus ge ǁîba tsēa ge ǃgū-ai, tsî tsuxuba i ge ǀaes di ī-i xase ge i.

¹⁷Tsî ǀnanus ge tentomsa xu ūkhâihe ǃnubain ge Israeli ôana ǁkhāti ge dāǁnâ; tsî ǀnanus ge sī hâpa, ǁnāpan ge Israeli ôana ge ǁgoe.

¹⁸ǃKhūb di mîmās ain ge Israeli ôana ge dāǁnâ, tsî ǃKhūb di mîmās ǃoan ge gere ǁgoe; ǀnanus ge tabernakeli ai hâ i tsēdi hoadi kōsen ge gere ǁgoe.

¹⁹Tsî ǀnanus ge ǂgui tsēde tabernakeli ai ǀhawe, on ge Israeli ôana ǃKhūb di ǃûisa gere ǃûi tsî dāǁnâ tama.

²⁰Tsî ī i geo, ǀnanus ge ǀoro tsēde tabernakeli ai hâo, on ge ǃKhūb di mîmās ǃoa gere ǁgoe, tsî ǃKhūb di mîmās ǃoa gere dāǁnâ.

²¹Tsî ī i geo, ǀnanus ge ǃuisa xu ǁgoas kōse hâ tsî ǀnanus ge ǁgoas ai khâi ǃkhaisa, on ge gere dāǁnâ; tsēas kao, tsuxubas kao, ǃâus ra ūkhâisen ǃnubain ge gere dāǁnâ.

²²Tsî ǀnanus ge ǀgam tsēra kōses kas, ǀgui ǁkhâb kōses ka xawe tabernakeli ai ǀhaweo, ǁîb ai ra hâse, on ge Israeli ôana ǁgoe tsî doe tama; tsî khâis ka ǃnubain ge gere doe.

²³ǃKhūb di mîmās ǃoan ge gere ǁgoe, tsî ǃKhūb di mîmās ǃoan ge gere doe; ǃKhūb di ǃûisan ge ge dī ǃKhūb ge mîmā khami, Moseb di ǃoabasa xu.