Read Khoekhoegowab Mixab 1 Bible Online

Mixab 1 - Khoekhoegowab bible

Mixab 1

¹Mîs ǃKhūb dis, Mixab Moresetǁîba ge hābas, Jotammi tsî Axasi tsî Hiskiab tsîgu, Judab gao-aogu di tsēdi ǃnâ; ǁnās hîab ge Samarias tsî Jerusalems tsîra ǂama mûsa.

²ǁNâu so re saso, ǁaeso hoaso, ǃgaoǃgâ re, sats ǃhūbaitse, ǀoasib âts hoab ǀkha: ǃKhūb ǃKhūb ge nēsi sadu ǃoagu ǀhûǀguitimî-aose nîra ība du, ǃKhūb ǃanu tempeli âba xu.

³Î du kō, ǃKhūb ra ǂoa ǁanǃkhais âba xu, tsî ǁîb ge ra ǁgôaxa tsî ǀgapigu ǃhūbaib digu ai ra dā.

⁴O gu ge ǃhomga ǁîb ǃnaga nîra tsuni, o gu ge ǃgoaǃnāga nîra ǂariǃā ǂnuruǁnui-i ǀaes tawa ī khami, ǁgamgu, ǃgoaǃnās ǃnâ ra ǁhōxūhegu khami.

⁵Nēn hoan ge nîra ī Jakob ǃûǂams ǃaroma tsî Israeli ommi di ǁoren ǃaroma. Tarisa Jakob ǃûǂams di tsoatsoasa? Samaria tamasa? Tsî tarisa Judab ǀgapigu di tsoatsoasa? Jerusalem tamasa?

⁶ǁNā-amaga ta ge tita Samariasa ǀuiǁkhopos ǃaub dis ase nîra ǂnûi, ǂgā-aidi ǂauxûiǂûǃhanab didi ase, tsî tita ge ǀuidi âsa ǃgoaǃnāb ǃnâ nîra tsoroǁnâ tsî ǃgaoǃgaogu âsa nîra ǀkhaiǀkhaiǀkhā.

⁷Tsî ǁîs di ǃgaohesa īgu hoagu ge nîra ǂkhūǂkhūhe, tsî ǁîs ǀai-aon amǃnâdi hoadi ge ǀaes ǀkha nîra khauǃkhūhe, tsî ǁîs ǁgôa-eloga ta ge tita nîra hîkākā, ǁîs ge ǁîga ǀai-ao-amǃnâs ǀkha ǀhaoǀhaobasen, tsî gu ǁkhawa nîra ǀai-aon amǃnâ kai xui-ao.

⁸ǁÎ ǃkhais xa ta ge tita ǃgae tsî nîra ā, tita ge ǀâǀhanahe tsî ǀōǀkhāse nîra ǃgû, tita ge ǀgirin axase nîra ā tsî ǀamin khami nîra ǃgom.

⁹ǁÎs ǀhapidi a ǂgau ǁoa xui-ao, ā, ǁîdi ge Judab kōse ge sī, ǁîb ge ǁāgu ti ǁaes digu kōse ra sī, Jerusalems kōse.

¹⁰Tā ǁî ǃkhaisa ǂhôa Gats tawa, tā ǁnātikōse ǀkhomǀkhomsase ā, î tsarab ǃnâ ǃhoposen Bet-Afras ǃnâ.

¹¹ǃGûǃganu, sas, Safirs di ǁansabese, ǀōǀkhāse tsî taotaosase Saanans di ǁansaben ge doeǂoa tama hâ, ǃgae-ās Bet-Esels tawa hâs, ge nî mâǃkhais âba sado xu ū.

¹²ǁAnsaben Marots din ge ǃaob ǃnâ ǃgâi-e ra ǃâubasen, ǂkhaba-i ge ǃKhūba xu ǁgôaxa xui-ao, Jerusalems di ǁāb kōse.

¹³ǃHae xūna ǂgāǃao kunis ǃnâ, sadu, Laxis di ǁansabedo, sas ge Sionni ôas ǁoreb di tsoatsoasa, sa ǃnâ di ge Israeli ǃûǂamde hōhe xuige.

¹⁴ǁNā-amaga Moreset-Gatsa ǃnarexūna mā, omgu Axsibs digu ge gao-aogu Israeli diga ǂhumixūse nîra ība.

¹⁵Tita ge ganupe ǀnî ǀumi-aoba sasa nîra ūsība, sas Maresas di ǁansabese, ǁîb ge Adulams kōse nîra sī, Israeli di ǂkhaisib kōse.

¹⁶ǂKhomkaisen, îs ǃgoradana sa ǀnamǀnamsa ǀgôan ǃaroma, îs hoaragase ǃgoradana ǃariǃkhās axase, ǁîn ge ǃkhōsan ase sasa xu ǂgaeǂguibēhe amaga.