Read Khoekhoegowab Mixab 2 Bible Online

Mixab 2 - Khoekhoegowab bible

Mixab 2

¹Tsūba ǁnān ǂhanuoǃnâsib xa ra ǂâin tsî kharob ân ai ǂkhababa ra dīna; ǁgoas di ǃnâb ǃnân ra ǁî xūna dī, ǁîn ǃommi ǀgaib ǃnân ǁîna hâ amaga.

²Tsî ǁîn ǃhanaga tura tsî ǁîga ra ǀâ, tsî omde tsî ǁîde ra ū, nētin ra aob tsî ǁîb omma ǀgaidī-ū, ā, mâ-i hoa-i tsî ǁî-i di ǀumisa.

³ǁNā-amagab ra ǃKhūba nēti mî: Mû, tita ge ǂkhaba-i xa ra ǂâi, nē ǃhaos ǂama, ǁî-i xa du sadu di ǃaoga ǂgaeǂui tide-e, tsî ǁnāti ǂhanuse ǃgû tide-e, tsū ǁae-i nîra ī xui-ao.

⁴ǁNā tsēs ǁkhās ain ge ǂkhoamî-e sadu xa nîra mî, tsîn ge ǃgaetsana-e nîra ǃgae tsî: Sida ge hoaragase hîǀhuruhe hâ ti nîra mî, ǁîb ra amǃnâs ti ǁaes disa māǃkhuni; matib ra ǁîba ǁîsa tita xu ūbē. ǁÎb ra sida ǃhanaga ǀgoraǂui sida ra ǀhanaǃâ.

⁵ǁNā-amagats ge satsa khoe-i ǀnō-ūtsuriba ǀumis âts ǂama nî ao-i xare-e ūhâ tide ǃKhūb di ǀhaohâb ǃnâ.

⁶Tā sago kēbo, tin ra mî, î gu nauga kēbo. Nēn ǂamats ga kēbo tama io, on ge tātse ǀhaeǀû tide.

⁷O sadu, Jakob ommi di ti ǀon hâdo: ǃNūǃnâxa tamab kha hâ ǃKhūb di Gagaba? Nēga kha ǃKhūb sîsenga? Ti mîde kha ǃgâise sîsen tama di hâ, ǁnān, ǂhauǃnâse ra tanisenn tawa?

⁸Xawe ǁaris ge ti ǁaesa khākhoese go khâi, sarab tsî anaǂamxūb tsîkha du ge ǁnān, ǂkhîse ra ǃgû-īna xu ra ǂgaeǁnâ, ǁnān ǃkhamsa ra mâǃoana xu.

⁹Taradi ti ǁaes dide du ge ra doeǁgabē, mâs hoasa ǁîs dâb di omsa xu, ǁîs ôana xu du ge ti ǂkhaisiba ge ūbē ǀamosib kōse.

¹⁰Khâi î du ǁnâi ǃgû, nē ǃhūb ǃnâ i sâ-i xare-e a ǀkhai xuige, ǀurisasib ra ǁgaoǁgaosiba sîsen amaga, ā, ǁgaisi ǁgaoǁgaosiba.

¹¹Khoeb ga ǂoaba ǂharugu-ū tsî ǂkhabase ǂhumi: Tita ge ǂauxûib ǂama, tsî ǀgaisa xûib ǃaroma nî kēboba tsi ti, ǁîb ge nē ǁaesa kēbo-aose nî ība.

¹²Amase ta ge tita sats, Jakotsa, hoaragase nîra ǀhaoǀhao, amase ta ge tita Israeli xa ge ǃgauna nîra ǀhaoǀhao. Tita ge ǁîna nîra ǀhaoǀhao ǀgui ǃharas di gūn axase, gūn, hîa ǃharas ân ǃnâ hân ī khami, gūn ǃû-ais ân ai hân khami, ǁnāti i ge khoesib xa nî ǂkhupixa.

¹³Khôaǃganu-aob ge ais ân aiǃâ nîra ǃgû, on ge ǁîna nîra khôaǃganu tsî ǁāba-ū nîra ǂgâ tsî ǁîba-ū nîra ǂoa, tsî gao-aob ân ge ǁîn di ais aiǃâ nîra ǃgû, tsî ǃKhūba ǁîn danase.