Read Khoekhoegowab Mixab 3 Bible Online

Mixab 3 - Khoekhoegowab bible

Mixab 3

¹ǃAruǀî ta ge tita ge mî: ǁNâu go re, sa danago Jakob digo tsî ǂamsago Israeli ommi digo: Anuba go tama i kha hâ ǂhanuba go nî ǂan ǃkhaisa?

²Xawe go ge sago ǃgâiba ǁkhan hâ tsî ǂkhababa ǀnam hâ, sago ge ǁîna khōb âna ra ǁhauǁnâǀkhā tsî ǁîn di ǁgansa ǂkhōba xu.

³Ā, sago ge ǁnāgo, ǁgans ti ǁaes disa ǂû tsî khōb âna ǁhauǁnâ tsî ǂkhōb âna khôaǂkhū tsî ǁîna ra ǁhāǃāgo, ǁgan i, sūs ǃnâ hâ i khami tsî ǁgan-i ketels ǃnâ hâ-i khami.

⁴ǁNāǃnubai gu ge ǃKhūb ǃoa nîra ǂgai, xawe ǁîb ge ǁîga ǁnâu-am tide, tsîb ge ais âba ǁnā ǁaeb ai ǁîga xu nîra gaugau, ǁîgu ge tsūdī amaga.

⁵Nētib ra ǃKhūba mî ǁnā kēbo-aogu, ti ǁaesa ra ǂgaeǂhapugu ǁga; ǁnāgu ǁgûn âgu ra nâxū-e ūhâ ǃnubai ǂkhîba ra ǂgaiǂuiga, xawe ǁnā-i, ǁîgu ams ǃnâ xū-e mā tama ra i-i, ǁî-i ǃoagu gu ge toroba ra khai.

⁶ǁNā-amaga du ge tsuxub xa nîra hāǂamhe ai-i ose tsî du ge nîra ǃkhaebahe aimûǀgarus xa, tsî sores ge nē kēbo-aoga nîra ǂgâǀkhā, tsî tsēs ge ǁîga nîra ǂnūba.

⁷Tsî mû-aogu ge nîra taotaohe tsî aimûǀgaru-aogu ge taob xa nîra dāhe, tsî gu ge hoatsama amǁgaugu âga nîra ǃgū-ai, ǃeream-i xare-i Eloba xu hā tide xui-ao.

⁸Xawe tita ge amase ǀgaib ǃKhūb Gagab dib xa ǀoa hâ, tsî ǂhanub tsî ǀgaib tsîkha xa, Jakoba ta nî ǃûǂams âba aoǁnâbase tsî Israela ǁîb di ǁoreba.

⁹Î nēsa ǁnâu, sa danago Jakob ommi din digo, sa go ǂhanub xa ra uixago tsî ǂhanun hoana ra dawaǃkhunigo,

¹⁰Sionsa ǀaob ǀkha ra ǂnubise tsî Jerusalemsa ǂhanuoǃnâsib ǀkha.

¹¹ǁÎs di danakhoegu ge ǃnarexūn ǃaroma ra ǂhanuǂhanu, tsî ǁîs pristergu ge amǃnâs ǃaroma ra ǁkhāǁkhā, tsî ǁîs kēbo-aogu ge marib ǃaroma ra aimûǀgaru, xawe gu ge ǃKhūb ai ǃgâsen tsî ra mî: ǃKhūba kha sida ǁaegu hâ tamab hâ? O da ge ǂkhaba-i xare-i xa hāǂamhe tide.

¹²ǁNā-amaga sago ǃaromas ge Sionsa ǃhana-i axase nîra ǃhūǃgaohe tsî Jerusalemsa nîra ǀuiǁkhopo kaihe tsî ǃhommi nē ommi dib ge nîra haixa ǀgapi kaihe.