Read Khoekhoegowab Mixab 4 Bible Online

Mixab 4 - Khoekhoegowab bible

Mixab 4

¹Tsî i ge ǀuni tsēdi ai nîra ī, ǃhommi ǃKhūb ommi dib nî ǂaob ǃhomgu dib ai mâiǁapoǁapohe ǃkhaisa, ob ge ǃnomde nîra ǃnā, o di ge ǁaede ǁîb tawa nîra ǃkhoeǀhao.

²O di ge ǂgui ǃhaode hā tsî nîra mî: Hā î da ǃhommi ǃKhūb dib ai ǃapa tsî ommi Jakob Elob dib ǃoa, îb ǁîba ǁkhāǁkhā da daogu âb xa, î da ǁîb di daogu ǃnâ ǃgû. Sionna xub ge ǂhanuba nîra ǂoa, tsî ǃKhūb mîsa Jerusalemsa xu xuige.

³Tsî ǁîb ge ǂgui ǁaede nîra ǀgoraǃgâ tsî ǀgaisa ǃhaode nîra ǁkhara, ǃnūseb kōse, on ge gôagu âna nîra ǃhūǃkhāxū kai tsî ǁhâigôagu âna nîra ǃgao-ūgôa kai, os ge ǀgui ǁaesa nau ǁaes ǃoagu gôaba ūkhâi tide tsîn ge ǃaruǀî torodīsa ǁkhāǁkhāsen tide.

⁴Tsîn ge nîra ǂnû mâ-i hoa-e ǁî-i ǂauxûiǂûhais ǃgao tsî ǁî-i ǀnomahais ǃgao, tsî ǁîna nî ǃhuriǃhuri khoe-i xare-i ge nîra ǀkhai, ams ǂnubidi di ǃKhūb dis ge ǁî ǃkhaisa ǃhoa xui-ao.

⁵ǁAedi hoadi ge nîra ǃgû mâs hoasa ǁîs elob di ǀons ǃnâ, xawe sida ge nîra ǃgû ǃKhūb sida Elob di ǀons ǃnâ ǀamose tsî hugaǀgui.

⁶ǁNātsē, tib ra ǃKhūba mî, ta ge tita ǁnān ǃhorana nîra ǀhaoǀhao, tsî ǁnān, doeǁgabēhe ge hâ ina nîra ǀhûǀhû, tsî tita xa tsūse ge dī-ūhena.

⁷Tsî ta ge ǁnān ǃhorana nîra ǃgau hâ ǃâro kai tsî ǁnān, ǃnūse ge ǂhāxūhe hâ ina, nîra ǀgaisa ǁae kai, tsî ǃKhūb ge ǁîn ǂama gao-aose nîra ī, Sionni ǃhommi ai nēsisa xu ǀamosib kōse.

⁸Tsî sats gūǂgō-omts, sats, Sionni ôas di ǃnomtse, sa tawas ge nîra hā, ā, sa tawas ge aibekam gaosa nîra hā, gaosis Jerusalems ôadi disa.

⁹Tsî nēsi tarexasa, kaises ra ǃausa? Sa ǃnâ gao-ao-e hâ tama i hâ? Sa ǀapemā-aoba ǀkhaib a, os tsûb xa ra hāǂamhe ǁora ra tara-i axase?

¹⁰Tsûba tsâ îs sîsen, ūǀkhīs nîga, sas Sionni ôase, ǁoratara-i axase. Sas nî nēsi ǃāsa xu ǂoa tsî ǃaub ǃnâ ǁan xuige, tsîs ge Babilons tawa nî sī. ǁNāpas ge nî huiǂuihe; ǁnāpab ge ǃKhūba nîra ore si sa khākhoen ǃomǁaeba xu.

¹¹Nēsi di ra ǂgui ǃhaode sa ǃoagu ǀhû: As ǀuriǀurihe îs sida di mûsa Sionsa ǃgapaǀî ti ra mîna.

¹²Xawen ge ǁîna ǂâidi ǃKhūb dide a ǀū tsî ǁîb di ǀape-aisa ǁnâuǃā tama hâ, ǁîb ge ǁîna ǃhoroǃgaeǀkhādadi axase dāǃnâǃkhais ai ge ǀhaoǀhao, ti.

¹³Khâi îs dāǃnâ, sas, Sionni ôase. Tita ge sa ǁnâba nîra ǀuri kai tsî sa ǁkhorade nîra ǂai kai, tsîs ge ǂgui ǁaede nîra ǂkhūǂkhū, tsî tita ge ǁîn di xūna ǃKhūba nîra khaiba, tsî ǁîn ǃkhūsiba ǃhūbaib hoaragab di ǃKhūba.

¹⁴Îs nēsi ǀhû, sas ǂnubis di ôase, ǁîn ge nîra xāǂgā si, ǁîn ge ǂhanuǂhanu-aob Israeli diba haib ǀkha ǃnanib ai nîra ǂnau.