Read Khoekhoegowab Mixab 5 Bible Online

Mixab 5 - Khoekhoegowab bible

Mixab 5

¹Tsî sas, Betlehems-Efratas, ǂkharis a sasa Judab di ǀoadisidi ǃnâ. Sasa xub ge nîra ǀkhība te ǁnāb, Israeli di gaosa nîrab, ǃgûǂoadi âb hugasa xu hâba ǀamosib di tsēde xu.

²ǁNā-amagab ge ǁîna nîra māǁnâ ǁnās ǁora nîs nîra ǁora ǁaeb kōse. ǃNubai gu ge ǃgau gagu ǁîb ǃgâsagu diga Israeli ôan ǀkha nîra oa.

³Ob ge ǁîba mâ tsî ǁîna nîra ǃûsi ǃKhūb di ǀgaib ǃnâ, ǀons ǃKhūb ǁîn Elob dis di ǀgapisib ǃnâ, on ge ǁîna sâsase nîra ǁan, nēsib nî ǁîba kai xui-ao, ǃhūbaib ǀkhâuǀamdi kōse.

⁴Tsî nēb ge nîra ǂkhî: Asuri ga sida ǃhūb ǃnâ hāo, tsî ǁîb ga sida î-omgu ǃnâ ǂgâo, o da ge sida ǁîb ǃoagu hû ǃûi-aoga nîra mâi tsî ǁkhaisa gaosagu khoen diga.

⁵ǁÎgu ge ǃhūb Asiriab diba nîra ǃûǁnâ gôab ǀkha, tsî ǃhūb Nimrodi diba ǂgâdaodi âb ǃnâ. Nētib ge ǁîba nîra ore da Asiriab dina xu, ǁîn ga sida ǃhūb ǃnâ hāo tsî ǃhūb di ǀkharib ǃnâ ǂgâxao.

⁶On ge ǃgau kan Jakob dina ǂgui ǁaedi ǁaegu ǀaub, ǃKhūba xu ra hāb, khami nîra ī, tsî ǀnanus khami, ǁhaon ai, khoeba ǃâu tama tsî khoen ôana ǃâumâ tamase.

⁷Ā, ǃgau kan Jakob din ge ǁaedi ǃnâ nîra hâ ǀoasa ǁaedi ǁaegu xammi khami haiǀgoms di ǀgurun ǃnâ, ǂkham xammi khami gūn di gūdi ǁaegu, ǁnāb ǃgûǃnâǃganub ra, o ra dāǃgâ tsî ra ǀkhauǃāba, khoe-i xare-i a hui ǁoas kōse.

⁸Sa ǃommi ge sa mâǃoasaben ǂamǃnâ nîra ǀgapiǀgapihe, tsî sa khākhoen ge nîra hîǀhuruhe.

⁹Tsî ǁnā tsēs ai ta ge tita, tib ra ǃKhūba mî, sa hāga sado xu nîra ūbē tsî ta ge sadu kunide nîra hîkākā.

¹⁰O ta ge tita ǃādi ǃhūb dide nîra hîkākā, tsî ta ge sadu di ǁaposa ǃkhaidi hoade nîra khôaǁnâ.

¹¹O ta ge ǃgaidīde sadu ǃomǁaeba xu nîra ǃhomǂui, tsî du ge ǃgaidī-ao-i xare-e ūhâ tide.

¹²O ta ge tita sadu di ǃgaohesa īgu tsî sadu di ǂnûikhâihesa īga nîra hîkākā, ǃaruǀî du sîsenni sadu ǃomgu dib aiǃâ ǃhonǁgoa tidese.

¹³ǃAruǀî ta ge tita sadu di ǃanu haiǃgaode sadu ǁaeguba xu nîra ǃhomǂui, tsî ta ge tita sadu ǃāde nîra hîkākā.

¹⁴O ta ge tita ǁaib ǃnâ tsî ǁgôasib ǃnâ nîra ǀkhao ǁnā ǁaedi, ǁnâu tama ge hâ ide.