Read Khoekhoegowab Mixab 6 Bible Online

Mixab 6 - Khoekhoegowab bible

Mixab 6

¹ǁNâu ǁnâi, tare-eb ra ǃKhūba mîsa: Khâi îts ǃhomgu tawa ǂnoagu, î di ǃnomde dommi âtsa ǁnâu.

²Î go ǁnâu, sa ǃhomgo, ǂnoagus ǃKhūb disa, tsî sa ǀgaisa ǃgaoǃgaogo ǃhūbaib digo tsîna, ǃKhūb ǂnoagu-e ǁaes âb ǀkha ūhâ xuige, tsî ǁîb ge Israeli ǀkha ǀgoraǃgâs ǃnâ nîra ǂgâ.

³O, ti ǁaese, tare-e ta kha ǁnâi ge dī-ū si? Tsî mâ xū-i ǀkha ta kha ǁnâi ge ǀhupuǀhupu si? ǃEream te re!

⁴Tita kom ǁnā ta Egipteǃhūba xu ge ǂgaeǂguiǂui si tsî khobosis omma xu ge ore si tao, tsî tita kom sa aiǃâ ge sîo Moseb tsî Aronni tsî Miriams tsîna.

⁵Ti ǁaese, ǂâi, re tare-eb ge Balaki Moab gao-aoba ǀapeǀapesa, tsî tare-eb ge Bileammi, Beori ôaba, ǃeream bi ǃkhaisa, tsî taren ge Sitimsa xu Gilgals kōse ī ǃkhaisa, ǂhanu-aisigu ǃKhūb digas nî ǂanga.

⁶Tare-i ǀkha ta kha tita ǃKhūba ǃgûǃoa tsî nî ǃhonǁgoa ǀgapi Elob aiǃâ? ǁÎba ta kha khauǁguibadi ǀkha nî ǃgûǃoa ǀgui kurixa tsâugu ǀkha?

⁷ǃKhūba kha ǁnâi ǀoadisi bairagu xa ǃgâibaheb nî? Disi ǀoadisi oliǃārogu xa? Ti ǂguroǃnaesabeba ta nî mā ti ǃûǂams ǃaroma? ǂÛb ti ǃnāb diba ti ǀoms di ǁoreb ǃaroma?

⁸ǁÎb ge sats khoetsa ge ǂanǂan tare-i a ǃgâi ǃkhaisa, tsî tare-eb ra ǃKhūba ǂgaoǀkhā tsi? ǂHanuse sîsens ǀguis tsî ǃgâidīs ǀguis tsî Elob âts ǀkha ǃgamǃgamsensase tanisens ǀguis.

⁹Dommi ǃKhūb dib ra ǃāsǀî ǂgai, ǀons âts īsiba ra mû xui-ao: ǁNâu ǀhamhaiba tsî ǁîba ge hā kaiba.

¹⁰Ganupeb ǁuib eloxoresasib diba mâb eloxoresagu dib hoab di ommi ǃnâ hâ ǂkhari ǀnō-ūdab, ǃharaxūsase ība?

¹¹Xare ta kha nî ǃanu ǂhanuoǃnâ ǀnō-ūxūs ǀkha? Tsî gāxaǃnâ ǀnō-ūǀuidi xa ǀoa hâ ǁhōb ǀkha?

¹²ǃKhūnin ân ge ǀgaidīs xa ǀoa hâ, tsî ǁansaben âs ra ǂhumiba ǃhoa, tsî nams ân a gāxaǃnâ ams ân ǃnâ amaga.

¹³ǁNā-amaga ta ge tita satsa tsûsa ǀhapis ǀkha ra ǂnau tsî hîǀhurus ǀkha sa ǁoren ǃaroma.

¹⁴Sats ge nî ǂû, xawets ge ǁâ tide, tsî ǃâs âts ge ǃnāb âts ǃnâ nîra hâ, sats ge nî ǃkhō, xawets ge xū-e ūbē tide, tsî ūbēts ka xū-i, ǁî-e ta ge tita gôaba nîra māǁnâ.

¹⁵Sats ge nî tsoro, xawets ge ǃgao tide, sats ge ǀkherahais ǂûna nî dāǃnâ, xawets ge olib ǀkha ǂkhausen tide, tsî ǂkhon ǂauxûiba nî dī, xawets ge ǂauxûi-i xare-e ā tide.

¹⁶Ā, ǂnûiǂgādi Omrib didi ge ra ǃkhōǀgaipehe tsî sîsenni Axab ommi dib hoaba, tsîts ge ǁîn ǀape-aidi ǃnâ ra ǃgû, o ta ge tita satsa hîǀhuruse nîra ǂnûi tsî ǃās ǁansabena ǃhōxūse, nētimî du ge ǃharaxūb ti ǁaes diba nîra tani.