Read Khoekhoegowab Mixab 7 Bible Online

Mixab 7 - Khoekhoegowab bible

Mixab 7

¹Ae, tita-e, tita ge ǁkhunaǂûn ra ǀhaoǀhaohe ǃkhais khami ī tsî ǃgaos ǂauxûiǂûn dis di ǃgauron ra ǁhorahe ǃkhais khami, ǂauxûiǂû-i xare-i ge ǂûsa a ǀkhaiba, ti ǀoms ge aiǁan hâ ǀnomana ra tura.

²ǃGâi khoe-i ge ǃhūb ǃnâ a ǀkhai tsî ǂhauǃnâ khoe-i ge khoen ǃnâ a kā, hoatsaman ge ǁîna ǀaoba ra ǃkhē, mâ-i hoa-i ge ǁî-i di ǃgâsaba ra ǃâu ǃnuitsurib ǀkha.

³ǃOmkha ânan ge ǂkhabab ǃoa ra ǀhōǂui, sau tamasen nî dīga. Nētib ra gaosaba ǂgaoǀkhā, tsî ǂhanuǂhanu-aob ra ǂgan, tsî kaikhoeb ra ǃhoa turab ǁîb ǀoms diba, tsî kha ge ǁî xūna ra ǃhûǁare.

⁴Hoagu xa ǃgâib âgu ge ǁkhū-i khami ī, hoagu xa îǂhôab âgu ge ǃnoeǃharas xa a tsū, tsēs sa ǃûi-aogu dis, sa ôaǃnâs dis, ge go hā, nēsi gu ge ǁîgu di ǁhapus xa nîra hāǂamhe.

⁵Khoexakhoeba tā ǂgom, î du tā ǂgomaiǂnûi ǀhōsab âts ai, sâu ǁāgu sa ams diga ǁnās, sa tîǂams ǃnâ ǁgoesa xu.

⁶ǀGôab ra ǁgûba ǃharaxū, ǀgôas ra ǁgûsa mâǃoa; ǀuiǀgôas ra ǀuiǁgûsa mâǃoa tsî khoeb khākhoen a ǁîb ommi ǂûb di xuige.

⁷Xawe tita ge ǃKhūb ai nî kō, tita ge Elob ti ǃgâiǃōb diba nîra ǃâu, ti Elob ge nîra ǁnâu te.

⁸Tā ti ǂama ǃgâiaǂgao, ti khākhoese, ǁnā ta ka xawe ta ge ǁkhawa nîra khâi, ǃkhaenab ǃnâ ta ga ǂnû, xawe ǃKhūb ge ǃnâse nî ība te.

⁹Tita ge ǃKhūb di ǁgôasiba nî tani, ǁîb ǃoagu ta ge ǁore xui-ao, ti ǂnoagusab nî ǂnoaguba te, tsî ti ǂhanubab nî dība tes kōse. ǁÎb ge ǃnâb ǃoa nîra ūǂui te, o ta ge turab ǀkha ǁîb di ǂhanu-aisiba nîra mû.

¹⁰Os ge ti khākhoesa ǁîsa mû tsî taob xa nîra ǃgū-aihe, ǁîs hîa: Mapab hâ ǃKhūb sa Eloba? ti ra mîǀî tesa. Ti mûra ge turab ǀkha nîra mû, nēsis ge ǁîsa nîra dāǃgâxū kai ǃās ǃgangu di ǂgoab axase.

¹¹Tsēs ge nîra hā ǂnubiǂgoagu âs nî ǂnubi-unuhesa, ǁnā tsēs aib ǀkharib âsa nîra ǀaroǃnâhe.

¹²ǁNā tsēs ain ge ǁkhāti sas ǃoa nîra sī Asiriaba xu tsî ǃādi Egipteb dide xu; tsî Egipteba xu Eufratǃāb kōse tsî huriba xu hurib kōse tsî ǃhomma xu ǃhommi kōse.

¹³Xawe nē ǃhūb ge nîra ǃū-aisa ǁîb di ǁansaben ǃaroma, ǁîn dīgu ǃaroma.

¹⁴Î satsa ǁnâi ǁaes âtsa ǃûsi sa hais ǀkha, gūn sa ǀumis din, ǀguri ǁan hâna, haiǀgoms ǃnâ, ǂûtanixa ǃhū-i ǁaegub ǃnâ; an ǃû Basanni tsî Gileadi tsîkha ǃnâ, hugakam tsēdi khami.

¹⁵Tita ge ǁîsa buruxana nîra mû kai, Egipteǃhūba xus ge doeǂoa tsēdi khami.

¹⁶O di ge ǃhaode ǁî ǃkhaisa mû tsî nîra tao, ǁîn di ǀgaib hoab xa; on ge ǃomma ams ai nî ǁgui, ǁîn ge nîra ǂganaǂgae.

¹⁷On ge tsaraba nîra nabe ǀaob khami, on ge ǂhanaben axase nîra gon ǁîn di āde xu, on ge burugâ hâse ǃKhūb sida Elob ǃoa nîra hā, on ge satsa nîra ǃao.

¹⁸Mapab kha hâ sats khami ī Eloba, ǂhanuoǃnâsiba ra ǀûbaba tsî ǃûǂams ǁîb ǀumis di ǃgauron disa ra ǃgû-īǀkhāba? ǁÎb ge ǁaib âba ǀamosib kōse ūhâ tama hâ, ǁîb ǀkhomxaǂgaosib ǃnâ turaba ūhâ xui-ao.

¹⁹ǁÎb ge ǁkhawa nîra ǀkhom da, ǁîb ge ǂhanuoǃnâsigu âda nîra dāǂkhū; ā, sats ge ǁîn di ǁoren hoana ǃgamsib hurib dib ǃnâ nîra aoǂgā.

²⁰Sats ge Jakoba îǂhôasiba nî mā tsî Abrahamma ǀkhomxaǂgaosib, sats ge aboga hugakam tsēde xu nūbaba nîra mā.