Read Khoekhoegowab Nahummi 1 Bible Online

Nahummi 1 - Khoekhoegowab bible

Nahummi 1

¹ǂHôas Nineves xa hâs. ǂKhanis Nahummi Elkosǁîb ais dis.

²Tauxa Elo tsî ǀkhao-aob ge ǃKhūba; ǀkhao-aob ge ǃKhūba tsîb ge kaise a ǀkhaoǂgaoxa. ǀKhao-aob ge ǃKhūba ǁîb di mâǃoasaben tawa, tsî ǁîb ra khakhoen âba ǁaiba ūhâba.

³ǃKhūb ge a ǃnūǃnâxa, xaweb ge kai ǀgaiba ūhâ; tsî ǁîb ge ǀhapixaba tātsē ǀhapiose ūhâ tama hâ. ǃKhūb di daob ge sareb tsî ǁgaoǂaos tsîra ǃnâ hâ, tsî tsarab ǁîb di ǂaira dib ge ǃâude.

⁴ǁÎb ra huriba ǀau tsî ǁîba ǂnâ kai; tsî ǁîb ra ǃāgu hoaga ǂnâ kai, Basanni tsî Karmeli tsîkha ra ǃū tsî ǃkhās Libanonni dis on ra ǃū.

⁵ǃHomgu ge ra ǀkhū ǁîb aiǃâ tsî ǃnomdi ge ra tsuni; tsî ǃhūb ra khâi ais âb aiǃâ, tsî ǃhūbaib tsî ǁîb ai ǁan hân hoana.

⁶Tari-e ǁgôasib âb aiǃâ nî mâ ǁkhā? Tsî tari-e ǀgamsib ǁîb ǁaib dib aiǃâ nî mâhō ǁkhā? ǁÎb di ǁgôasib ge ǁhōǂuihe hâ ǀae-i axase; tsî ǃhaogu ge ǁîb aiǃâ ra ǂkhū.

⁷ǃKhūb ge a ǃgâi, ǁîb ge a ǀgai tsēs ǂōǂōsib dis ai. Tsî ǁîb ge ǁnān, ǁîb ai ǂgomaiǂnûi hâna a ǂan.

⁸Xawe dâuǃganu ra dâu-i ǀkhab ge ǁîba ǃkhais âna nîra hîkākā; tsî ǃkhaenab ǃnâb ge khākhoen âba nîra sauruǂgâ.

⁹Tare-e du kha ra ǂâi ǃKhūb ǃoagu? ǁÎb ge aitsama nîra dītoa; ǀgam ǃnāra kōseb ge ǂōǂōsiba khâi tide.

¹⁰ǁÎn ge ǂgapuǁaehe hâ amaga ǁkhūn axase, tsî ǁîn ge āǀhoro hâ, ǁnā-amagan ra haputoahe ǂnâsa ǃhoroǃgaoda-i axase.

¹¹Sado xub ge ǀguiba ge ǃgûǂoa ǃKhūb ǃoagu, ǂkhababa ra ǂâiba, ǂkhaba ǀapemā-aoba.

¹²Nētib ra ǃKhūba mî: ǁÎn ga kaise ǀgaisa tsî matikōsen ga ǂgui xawen ge hîkākāhe tsî nîra bē. Tita ge satsa ge ǃgamǃgam, xawe ta ge ǃaruǀî ǃgamǃgam tsi tide.

¹³Tsî ta ge tita nēsi ǃnaob âba satsa xu nîra khôaǁnâ tsî ǃgae-ūdan âtsa nîra ǂgaeǃgao.

¹⁴Tsî sa ǂamab ge ǃKhūba ge mîmā, sa ǀons di suri-i xare-i tsorohe tide ǃkhai-e. Ommi sa elob diba xu ta ge tita nîra ǃhomǂui ǃgaohesa tsî ǂnâhesa īsiga. Tita ge ǁnāpa ǀhoba-e nîra dība tsi, ǃharaxūhesats a anu amaga.

¹⁵Mû ǃhomgu ai ǂaira ǁnāb ǃgâiba ra ǂhôab di ra, ǁnāb ǂkhîba ra ǁnâu kaib di ra! Khai sa kaitsēde, sats Judatse, matare sa mîmâide, Beliali aob xats ǃaruǀî ǃgûǃnâǃganuhe tide xuige; ǁîb ge hoaragase ǃhomǂuihe hâ.