Read Khoekhoegowab Nahummi 2 Bible Online

Nahummi 2 - Khoekhoegowab bible

Nahummi 2

¹Hîkākā-aob ra sa ǃoagu ǃapa xuige sâu sa ǁaposa ǃkhaisa, kō daoba, kamanaba ǀgaiǀgai, îts ǁkhāsib âtsa ǀgaiǀgai.

²ǃKhūb ge ǂkhaisib Jakob diba ǁkhawa ge ǀasaǀasa, Israeli di ǂkhaisib ǁkhāb khami xuige, hîǀhuru-aogu ge ǁîsa ge ǀkhaiǃnâ kai, tsî gu ge ǂauxûiǂûhais ǂgonaga ǁgaoǁgao xui-ao.

³Khōsikhōgu ǁîb di ǁē-aogu digu ge a ǀapa; ǃgari-aogu di saran on ge a ǀapa. Kunidi ge ǀaes ǁhabub khami ī ǁîb ga ǂhomisen tsēs ai; tsî ǁhâigôagu ge ra sabuhe.

⁴Kunidi ge ǃās di ǃgangu ǃnâ ra ǂkhupi, ǁîdi ge ǃās di daogu ǃnâ ra ǃkhoema. ǁÎdi īsigu ge ǃamǀaedi digu khami ī, ǁîdi ge napagu khami ra ǃnâ.

⁵ǁÎb ge ǃnāǂamsagu âb xa nîra ǂâi, xawe ǁîgu ge ǃgangu ân ai nîra ǃnôa, ǁîgu ge ǂnubiǂgoab ǃoa nîra ǃhae, sâuǃkhais a om mâisa ǃkhais ǁga.

⁶ǁĀgu ǃāgu digu ge nîra ǁkhowa-amhe, tsî î-ommi ge nîra tsuni.

⁷Tsî gao-aos ge ǃkhōsabese nîra ūǃgûbēhe, ǁîs ge nîra ǃgû kaihe. Tsî ǁîs di ǃgādi ge ǁîs ǂama ǂnabudi khami ra ǃgae, ǁkhaib âdi ai ra ǂnause.

⁸Nineves ge ǁgamǃkhubis xase ge i, hâs ge i tsēde xu, xawe ǁîn ge nîra ǁhâ: Mâ re, mâ re, tin nî ǂgai, xawe khoe-i xare-i ge kōnǃgâ tide.

⁹ǃNari ǀhaiǀuriba, ǃnari ǃhuniǀuriba! Hâ xūn toa tide, ǂkhaisib mâ turahesa xūn dib toa tide xuige!

¹⁰ǁÎs ge ǀkhaiǀkhaiǃnâhe hâ, ā ǀkhaiǀkhaiǃnâhes ge ǁîsa hâ! ǁHoroǂuiǃnâhes ge hâ, ǂgaob âs ra ǂkhabu tsî ǁgoakha ra ǁnope, tsî mâ kamanab hoab ge tsû hâ, tsî ǁîn di aidi hoadi ge ra ǀhai.

¹¹Mapas kha ǁnâi nēsi hâ ǁanǃkhais xamgu disa, tsî ǂûǃkhais ǂkham xamgu disa? ǁNā ǃkhais, ǁîs ain xammi tsî xams tsî xamron tsîna gere hâmasa khoe-i xare-i xan ǃhuriǃhurihe tamase.

¹²ǁNā xammi ǂkhamn âba ǂâuba hâs kōse gere ǀkhauǃāb, tsî xamdi âba gere ǃgaubab, ǁnāb, ādi âba ǃkhōb gen ǀkha gere ǀoaǀoaba tsî ǁanǃkhaidi âba ǃgammi hân ǀkha.

¹³Mû, Tita ge nîra hāǂam tsi tib ra ǃKhūb ǂnubidi diba mî. Tsî tita ge ǁîs di kunide nîra khauǃkhū, tsî gôab ge sa ǂkham xamga nîra hapu, tsî tita ge sadu di ǁkhâuǁnâsa nîra hîkākā ǃhūbaiba xu, tsî dommi sa sîsabegu dib ge ǃaruǀî ǁnâuhe tide.