Read Khoekhoegowab Nahummi 3 Bible Online

Nahummi 3 - Khoekhoegowab bible

Nahummi 3

¹Tsūba si ǁnā ǀao ǃās, hoaragase ǂhumib tsî ǂkhabadīb tsîkha xa ǀoa hâsa, ǁkhâuǁnâs ge ǁîs ǃnâ toa tama hâ.

²ǃGoas samib dis ge ǁîs ǃnâ hâ, tsî ǀōb kuniǀnūdi di ǂkhupib diba, tsî ǃkhoe ra hān tsî ǃhaese ra ǃnari kunidi diba!

³ǃGapi-aob ra ǃgapi ǂkhai ra gôab ǀkha tsî napa ra ǁhâigôab ǀkha. Tsî ǃgamhesan ge nîra ǂgui, tsî ǁō hâ sorodi di ǃgôab ge nîra kaise ǂgui, sorodi ge toa tide, khoen ge ǁîn di sorodi ai nîra ǃnôa.

⁴ǀOasa ǀaigu ǁnā kaise ǀnamǀnamsa ǀai-aos digu ǂama, ǃgaidī-aigu di ǁkhāǁkhā-aos ǁîs di ǀai-aigu ǀkha ǁaega ge ǁamaxūsa tsî ǃhaode ǁîs di ǃgaidīgu ǀkha.

⁵Kō, tita ge nîra hāǂam si tib ra ǃKhūb ǂnubidi diba mî. Tsî ta ge ǂomamǃgâgu âsa ais âs ǂamǃnâ nîra ǀkhaiǀkhai. Tsî tita ge ǁaede sa ǀōǀkhāsib tsî gaoside sa taosiba nîra ǁgau.

⁶Tsî tita ge ǁgaiǁgaisa xūna sa ai ao, tsî nîra taotao si, tsî tita ge sasa mûhe nî xūse nîra dī.

⁷O i ge nîra ī, sasa ga mûn hoan nî sasa xu ǁhai ǃkhaisa tsî Nineves ge hîǀhuruhe hâ! Tari-e nî ǁîsa ǀkhom! ti nîra mî. Mapa xu ta ǁkhaeǂgao-aona nîra ôaba si?

⁸Sasa kha No-Amons, Nylǃāb ǁgamgu amǃgâ ǁgoes xa a ǃgâi? ǁNās ǁgammi xa hâǂgāhe hâs, ǁnās, ǃāba aiǂnubiǂgoase ūhâs, ǂnubiǂgoab ase ǁîb xa ībahesa.

⁹Etiopiab tsî Egipteb tsîkha ge ǁîs di ǀgai ge i; tsî ǀams ge ǀkhai ge i; Puti tsî Libiab tsîkha ge huise ge ība si.

¹⁰Xawes ge ǃkhōsase ǃkhōsis ǃnâ ge ǃgû. ǁKhātin ge ǁîs di ôarona ǃās ǃgangu hoagu di ǁhôadi ai ge ǂkhūǂkhūhe. Tsî ǁîs di ǃgôahesan ǂaman ge ǀkhūsa ge ao, tsî ǁîs di kaigu hoagu ge ǃgae-ūdan ǀkha ge ǃgaehe.

¹¹Sas on ge nîra ǃkhariǃkhō; sas on ge nîra ǃgâu, sas on ge nîra ǃhū ǂgao khākhoeba xu.

¹²Sa ǁaposa ǃkhaidi hoadi ge a ǀnomahai ǂguro ǂûn ǀkha; ǁîdi ga gongonheo, on ge ǁnāb ǂû ǂgao rab di ams ǃnâ ra ǁnā.

¹³Mû, sa ǁaes ge sa ǃnâ nîra tara kai! ǁĀgu sa ǃhūb digu ge sa khākhoena harase nîra ǁkhowa-ambahe; ǀaes ge sa ǂganamxūna hapu hâ.

¹⁴ǁGam-e xuribasen xāǂgās ǃaroma; ǁaposasidi âsa ǀgaiǀgai! ǂGâ ǂgoab ǃnâ, îs ǂgoaba dāǃnâ ǂnubiǂgoaǀuidi kuru-ū xūna ūbasen.

¹⁵ǀAes ge ǁnāpa nîra hapu si; gôab ge nîra hîkākā si, ǁîb ge nîra hara si ǂhoms khami, ǂguiǂguisens ka ǂhoms khami xawe, kaise ǂgui ǂhoms khami!

¹⁶Sas ge ǀhommi ai hâ ǀgamirodi ǃgâ-ai ǂgui ǁamagu-aona ūhâ, ǂhoms ge khōb ana ǁhûnuǁnâ tsî nîra doebē.

¹⁷ǃÛi-aogu âs ge ǂhoms khami ī, tsî sa toroǂamsagu ge kai ǂhomn khami ī ǃharadi ai ǃkhai tsēdi ai ra ǁgoe gu khami, sores ra ǁhaio, on ra doebē, ǁîn hâ ǃkhaisats a ǀūs kōse.

¹⁸Sa ǃûi-aogu ge nîra ǂomhî, sats Asiriab di gao-aotse; sa ǃgari-aogu ge nîra ǁgoe, sa ǁaes ge ǃhomgu ai ǀgarusase nîra ǁgoema, tsî khoe-i xare-i ge ǁîna ǀhaoǀhao tide.

¹⁹Sa ǂkhôas ge ǂuruǂuruhe ǁoa; sa ǀhapis ge a ǂgauǂgauhe ǁoa. Sa gomma ga ǁnâun hoan ge sas ǂama nîra ǁam, tari-i ǂamab kha ǂkhabasib âsa hugaǀgui hā tama ge hâ i?