Read Khoekhoegowab Habakuki 2 Bible Online

Habakuki 2 - Khoekhoegowab bible

Habakuki 2

¹Tita ge ti ǃûiǃkhais ai nî mâ tsî ta ge ǀgaisa ǂnubiǂgoab ai sī ge mâisen; tsî ta ge ge ǃûi, mû ta nîga, tare-eb ti ǃnâ nî ǃhoa ǃkhaisa, tsî tare-e ta nî ti ǂgōǀaus ai ǃeream ǃkhaisa.

²ǃNubaib ge ǃKhūba ǃeream te tsî ge mî: Aisa xoa îts ǁîsa ǂhaisase xoa-aidadi ai xoa, î-i ǃkhoe-ī ka-i hoa-e ǁîsa khomai ǁkhā.

³Ais nî ganupe mîmâisa ǁaeb kōse hâ xuige; ǁîs ge ǀams ǁga ra ǃnoe, ǁîs ge ǂhumi tide. Tsî ǁîs ga ǀhaweo, ǁîsa ǃâu; ǁîs ge amase nîra hā tsî ǃonkhao tide xuige.

⁴Mû, ǁîb di ǀoms ra kaikaisen; ǁîs ge ǁîb ǃnâ ǂhanu tama hâ, xawe ǂhanu-aib ge ǂgoms âba xu nîra ûi.

⁵Tsî ǁkhāti ǂauxûib ge a gāxaǃnâ, khūkhūsenxa aob ge mâhâhâ tama hâ, ǁnāb ams âba harase ra khowab ǀhobas khami, ǁnāb ǁōb khami tātsē ǁâ tamab, tsî ǃhaodi hoade ǁîb tawa ra ǀhaoǀhaob tsî ǁaedi hoade ǁîb tawa ra ǀguiǀguiba.

⁶ǁÎn hoana kha ǂkhoamî-e ǁîb xa ǃhoan tide, tsî ǁguiǃās ǀhae-aidi disa ǁîb xa mî tide? Tsîn ge ǁîna nēti nîra mî: Tsūba ǁnāb, ǁîb di tamana ra ǀhaoǀhaobasenna; matikōse? tsî ǁnāb, mîmâidi ǀkha ra ǃnao-aisenna.

⁷ǃNapetamasen kha khâi tide ǁnān satsa nî nâna, tsî ǃnoaǂkhain tide ǁnān satsa nî ǀkhū kaina? Tsî satsa kha ǁîn di ǁkhâuǁnâxū kaits tide?

⁸Sats ge ǂgui ǃhaode ǁkhâuǁnâ amaga di ge ǃgau ge ǁaedi hoade satsa nîra ǁkhâuǁnâ, ǀaob khoen dib ǃaroma; tsî ǁnā ǀgaidīs ǃhūb tsî ǃās tsî ǁîs ǁansaben hoanats ge dī-ūs ǃaroma.

⁹Tsūba ǁnāb tsū hōǂgāsa ommi âba ra sîsenbaba, ǀgapiseb ǃnâb nî oms âba omga, ǃommi ǂkhabab diba xub nî huiǂuisense.

¹⁰Sats ge sa omma taotaosa ǃkhaisa ge ǀapeǀapeba, ǂgui ǁaede ra ǂnauǃâts ge sa ǀoms ǃoagu ge ǁore

¹¹ǀUis ra ǂnubiǂgoaba xu ǂgai, tsî ǃnaob ra ǂamǃnâba xu ǁîsa ǃeream xui-ao.

¹²Tsūba ǁnāb, ǃāsa ǀaob ǀkha ga ǂnubib tsî ǁnāb, ǃāsa ǂkhabab ǀkha ga ǁapoǁapoba!

¹³Mû, ǃKhūb ǂnubidi diba xu ra hā ǃkhai tamasa kha ǁaedi ǀaesa ra sîsenbasa tsî khoen ra ǁause ǀhupuǀhupusensa?

¹⁴ǃHūbaib ge ǂans ǃKhūb di ǂkhaisib dis xa nîra ǀoa xui-ao, ǁgamgu ǃhūb hurib diba ra ǃgū-ai khami.

¹⁵Tsūba ǁnāb, ǀgūkhoeb âba ra āsib, sats ǀgabis sa ǂauxûib disa ra dīǀarots tsî ra āǁō kaitsa, ǁîn di ǀōǀkhāsibats nî ǃgapase.

¹⁶Sats on ge nîra ǁâ, taosib xa ǃgôab di amǃnâs ai; sats ona ā, îts aikhōb âtsa ǀhui-ai. ǀGabis ǃKhūb amǀkhāb ǁôab dis ge saǀî nîra unu, tsî taotaosasib xab ge sa ǂkhaisiba nîra hāǂamhe xuige.

¹⁷ǁNā ǀgaidīs Libanonni ge sîsenūhes ge satsa nîra ǃgū-ai, tsî hîǀhuruhes ǀgurun dis ge ǁîna nîra ǃhuriǃhuri, ǀaob khoen dib tsî ǀgaidīs ǃhūb tsî ǃās tsî ǁîs ǁansaben hoan ge sîsenūhes ǃaroma.

¹⁸Tare-eb kha nî harebe ǁnā ǃgaohesa īb, kuru-aob âb xa ǃgaohe hâba, tsî ǂnâhe hâ īb, ǂhumi ǁkhāǁkhā-aoba ob kuru-aoba nî kurub hâb ai ǂgomaiǂnûi; ǃgome ǁgôa-elogab ga dī ǃnubai.

¹⁹Tsūba ǁnāb, ǃnaob ǃoa: ǃNoaǂkhai! ti ra mîba, ǃgome ǀuiba ǃoa: ǃNoaǂkhai! ti ra mîba. Xare khoe-e ǁkhāǁkhāb nî ǁîba? Kō, ǁîb ge ǃhuniǀurib tsî ǀhaiǀurib tsîkha ǀkha ǃkhûǀkhāhe hâ; tsî gaga-i xare-i ge ǁîb ǃnâ a ǀkhai.

²⁰Xawe ǃKhūb ge ǃanu tempeli âb ǃnâ hâ; xuige ǃnō ǁîb di ais aiǃâ ǃhūbaits hoaragatse.