Read Khoekhoegowab Habakuki 3 Bible Online

Habakuki 3 - Khoekhoegowab bible

Habakuki 3

¹ǀGores kēbo-aob Habakuki dis, Sigionots ai.

²ǃKhūtse, sa ǃhoasa ta ge ǁnâu ǃnubai ta ge tita ge ǃao. ǃKhūtse, sa sîsenna sâu re ûib ǃnâ, kurigu di ǁaegub ǃnâ, îts ǁîba ǂanǂan kurigu di ǁaegub ǃnâ, îts ǁaib ǃnâ ǁîba ǀkhoms xa ǂâi re.

³Elob ge Temansa xu ge hā, tsî ǃAnuba ǃhommi Paranna xu. ǁÎb di ǂkhaisib ge ǀhomga ge ǃgū-ai tsî ǃhūbaib ge ǃkhōǀkhās âb xa ǀoa hâ. Sela.

⁴Tsî ǂkhaib ǃnâb dib axaseb ge ge ǀkhī; tsî ǃnâb ǀkhâugu ge ǃomǁaeb âba xu ra ǀkhī, tsî ǁnāpab ge ǀgaib âba ǂganǃgâsase ge hâ.

⁵Ais âb aiǃâb ge ǂhīǁōba garu; tsî ǁkhō ǀaesenni ge ǁîba saogaru.

⁶Nētib ge ǁîba mâ tsî ǃhūba ge ǀguiro; ǁîb ge kō tsî ǃhaode ge ǁnopeǁnope, o gu ge ǀamo ǃhomga ge ǀgaruǀgaruhe, o di ge ǃnomdi ǀamosib dide ge ǂamǂamhe. ǃGangu hugakam ǁaeb digu ge a ǁîb di.

⁷Tita ge tentomdi Kusanni dide ǃaob ǃnâ ra mû, ǃgū-ai ǃkhaigu Midianni ǃhūb digu ge ra ǀkhū.

⁸ǃKhūba kha ǃāga ge ǁaixaǂam hâ i? Sa ǁaiba kha ǃāgu ǃoab ge hâ i, sa ǁgôasiba hurib ǃoa? Sats ge sa hāgu ai ǃgapi ǃnubai, sa kunidi dans didi ai.

⁹ǃNubais ge ǀkhaiǀkhā hâ, khās âtsa tsî ǁgaugu ge khāsǁapab ai a mâisa. Sela. Sats ge ǃāgu ǀkha ǃhūbaiba ra ǂkhawe;

¹⁰ǃhomgu ge satsa mû tsî ge ǂgubi. ǁGamgu ge ge dâuǃganu; ǃgammi ge dommi âba ge ūkhâi, ǁîb ge ǃomgu âba ǀgapib ǃoa ge ūkhâi.

¹¹Sores tsî ǁkhâb tsîra ge ǁîra di hâǃkhais ǃnâ ǃnōsase ge mâ; ǃnâb ǀkha gu ge ǂāgu âtsa ge ī, ǂkhaib ǀkha napa ra ǁhâigôab âtsa.

¹²ǁGôasib ǀkhats ge satsa ǃhūba ge dāǃganu, ǁaib ǀkhats ge satsa ǃhaode ge dāǃnâ.

¹³Sats ge ores sa ǁaes disa ge ǃgûǂoaba, ores sa ǂkhauǀkhāsabeb disa; sats ge eloxoresab ommi di danasa ge ǂkhūǂkhū, ǃgaoǃgaoba ra ǀkhaiǀkhaiǀkhāǃâ ǃaob kōse. Sela.

¹⁴Sats ge ǁhâigôagu âb ǀkha danas, ǃhae khoegu âb disa ge ǁhâiǃganu, titan nî ǀgaruǀgaruse ge ǃkhoeǀkhīn disa, ǁnān ǃgâiaǂgao hâna, ǀkhomǀkhomsabena nî ǂganǃgâsib ân ǃnâ hapun axase.

¹⁵Sats ge hāgu âts ǀkha huriba ge dā-ai, ǀgaisa ǁgamgu ǀguipa hâga.

¹⁶ǁÎ ǃkhaisa ta ge ǁnâuo, ob ge ti ǃnāba ge gongonǃnâhe; ti amǁgaukha ge ǀōb xa ge ǀkhū; ob ge ǁgaoǁgaosiba ti ǂkhōgu ǃnâ ge hā, o ta ge tita ti ǃkhais ǃnâ ge ǀkhū. Tita ge ǂanǂansase nîra ǃâu ǂōǂōsib di tsēsa îs hā, ǁnā ǁaes sida ge ǁgâiǀās ai.

¹⁷ǀNomahais ǁhoa tide xawe tsî ǂû-i xare-i ǂauxûiǂûhais ai hâ tide xawe, ǀkherahais di ǂûtanib nî ǂkhabusa tsî ǃhanagu ǂû-i xare-e ūǀkhī tide xawe, gūn ge ǃharas ǃnâ nî ǀkhai, tsî goma-i xare-i nî gomaǃharadi ǃnâ kā xawe,

¹⁸xawe tita ge ǃKhūb ǃnâ nî ǃgâiaǂgao, tita ge nîra dâ Elob ti ǃgâiǃōb dib ǃnâ.

¹⁹ǃKhūb, ǃKhūb ge a ti ǀgai; tsî ǁîb ge ti ǂaira ǁkhamadi di ǂaidi khami nîra ī kai, tsî ǁîb ge tita ti ǀgapigu ai nîra dā kai. Amǁnae-aoba Neginots ǃoa.