Read Khoekhoegowab Sefanjab 1 Bible Online

Sefanjab 1 - Khoekhoegowab bible

Sefanjab 1

¹Mîs ǃKhūb dis ge Sefanjab, Kusxi ôab, Gedaljab ôab, Amariab ôab, Hiskiab ôaba ge hāba Josiab, Amonni ôab Judab gao-aob di tsēdi ǃnâ.

²Tita ge hoana nē ǃhūba xu nîra ǁkharobēǃari tib ra ǃKhūba mî.

³Tita ge khoen tsî ǀgoan tsîna nîra ǁkharobē; tita ge anin ǀhommi dina nîra ǁkharobē tsî ǁaun hurib din, tsî ǁgonaǂgaodi eloxoresan didi tsîna, ā, tita ge khoena nē ǃhūba xu nîra ǃhomǂui tib ra ǃKhūba mî.

⁴Tsî tita ge ǃommi âtaba Judabǀî nîra ǀhōǂui tsî ǁansaben Jerusalems din hoanǀî. Tsî tita ge nē ǃāsa xu nîra ǃhomǂui ǃgau gen Baali din, tsî ǀons ǁgôa-eloǃoaba-aon disa pristergu ǀkha,

⁵tsî ǁnān omǂamaidi ai ǂnubis ǀhommi dis aiǃâ ra ǃhonǁgoan tsî ǃhonǁgoa rase ǃKhūb tawa ra nūn, tsî Milkommi tawa ra nūna;

⁶ǁkhāti ǁnān, ǃKhūb khaoǃgâba xu ra oan, tsî ǃKhūba ôa taman tsî ǁîba dîǃgâ tamana.

⁷ǃNō re ǃKhūb ǃKhūb di ais aiǃâ, ǃKhūb di tsēs a ǀgū xuige. ǃKhūb ge ǁguiba-e ǁāǁā tsî ǁkhausaben âba khai xuige.

⁸Tsî i ge tsēs ǃKhūb ǁguibas dis ai nîra ī, tita nîra ôaǃnâ ǃkhaisa gaosagu ǂama, gao-aob ôan ǂama tsî ǃhao sarana ra anan hoan ǂama.

⁹ǁKhāti ta ge tita ǁnātsē nîra ôaǃnâ dao-amsa-ū ga uri-ī-i hoa-i ǂama, ǁnān, ǀhonkhoegu ân di omma ǀgaidīb tsî gāxaǃnâsib tsîkha ǀkha ra ǀoaǀoan ǂama.

¹⁰Tsî i ge ǁnātsē nîra ī tib ra ǃKhūba mî, dom-i ǃgaes di-i ǁauǁāba xu nîra ǁnâuhe ǃkhaisa, tsî āsa ǀgamǁî ǃâs ǃās disa xu tsî kai ǀōb khôas diba ǃnomde xu.

¹¹Ā du re, sadu ǃgoaǃnāb ǁansabedo; ǁamagu-aon hoan ge ǁhāǂuihe hâ, maritani-aogu hoagu ǃhomǂuihe hâ xuige.

¹²Tsî i ge ǁnātsē nîra ī, tita nî Jerusalemsa ǃamamǀaedi ǀkha ôaǃnâǃganu ǃkhaisa, tsî tita nîra ôaǃnâ ǃkhaisa ǁnā aogu, ǁîgu di ǂgomab ai ge kauga, ǁnān, ǂgaob ân ǃnâ: ǃKhūb ge ǃgâi-i kas, ǂkhaba-i kas hoasa dī tama hâ ti ra mîna.

¹³ǁNā-amagan ge xūn âna ǁkhâuǁnâhe, tsî omdi âna nîra hîǀhuruhe. ǁÎn ga omde ǂnubibasen, xawen ge ǁîde ǁanǃnâ tide; tsî ǂauxûiǂûǃhanagan ga ǂgā, xawen ge ǂauxûib âga ā tide.

¹⁴Kaitsēs ǃKhūb dis ge a ǀgū, ǁîs ge a ǀgū tsî kaise a ǃhae; ǁnâu, ǃKhūb di tsēsa. ǁĒ-aob ge ǁnāpa ause nîra ǃau.

¹⁵ǁNā tsēs ge ǁgôasib di tsēse nîra ī, ǂōǂōsib tsî ǀhūb tsîkha di tsēse, ǃū-ais tsî hîǀhurus tsîra di tsēse; ǃkhaeb tsî ǃkhaenas tsîra di tsēse, ǀnanus tsî durutsuxub tsîra di tsēse,

¹⁶xâiǁnâb tsî ǀōb tsîkha di tsēse ǁaposa ǃādi ǃoagu tsî ǀgapi ǁhôadi ǃoagu.

¹⁷Tsî tita ge khoena nîra ǃaoǃao, ǂgī hân khamin nîra ǃgûs kōse, ǁîn ge ǃKhūb ǃoagu ǁore amaga. Ob ge ǀaob âna nîra ǂnâxūhe tsarab axase tsî ǁgans âna xaub khami.

¹⁸ǁÎn di ǀhaiǀurib kas, ǁîn di ǃhuniǀurib kas hoas ge ǁîna ore ǁkhā tide ǁgôasib ǃKhūb dib di tsēs ai. Tsî ǀaes ǁîb ôasasib dis xab ge ǃhūb hoaba nîra hapuhe, ǁîb nîra ǀamǀam, ā hîkākāb ge ǁansaben nē ǃhūb din hoana xui-ao.