Read Khoekhoegowab Sefanjab 2 Bible Online

Sefanjab 2 - Khoekhoegowab bible

Sefanjab 2

¹ǂŌrisase ôaǃnâsen, ā, ǂōrisase ôaǃnâsen, sas ǁaes, tao tamase.

²ǂÂibasens ra ǃnaes aiǃâ, ǀapob khamis ra tsēsa ǃgôa-ī, ǀgamsib ǃKhūb ǁaib dib xa du ganupe hāǂamhe tama, tsēs ǃKhūb ǁaib dis gorose sadu ǂama hā tama hîa.

³ǃKhūba ôa, sadu tsamtsiǃnâdu ǃhūb didu, ǂhanub âba ra sîsendu hoado. Î du ǂhanu-aisiba ôa, î du tsamtsiǃnâsiba ôa; o du ge ǀnîsi nî sâuhe tsēs ǃKhūb ǁaib dis ai.

⁴Gasas ge nîra ǁnāxūhe tsî Askelons ge nîra ǃgaroǃkhai kaihe xuige. Asdods din ge tsēǃgâb ai nîra doeǁgaǂuihe, tsî Ekrons ge nîra ǃhomǂuihe.

⁵Tsūba sadu hurib amǃgâ ǁgoe ǃhūǃâsa ǁanǃnâ hâdu hoado, Kereti ǁaedo, mîs ǃKhūb dis ge sadu ǃoagu nîra hā, sats Kanaants, Filisteǁîn di ǃhūtse. Tita ge sado nîra hîkākā, ǁansabe-i xare-i nî ǀkhais kōse.

⁶Tsî ǃhūǃâs hurib amǃgâ ǁgoes ge ǃûǃkhai tsî tsause ǃûi-aoga di ǂgâ tsî gūdi di ǃharase nîra ī.

⁷Tsî ǃhūǃâs ge ǃgau gen Judab ommi din dise nîra ī; ǁîs ǃnân nî ǃûse. ǃUian ge omdi Askelons didi ǃnâ nîra ǁgoe, ǃKhūb ǁîn di Elob nî ǁîna sari tsî ǃkhōsis âna unu xui-ao.

⁸Tita ge ǃhōmîdi Moab dide ge ǁnâu, tsî ǀaomîdi Amonni ôan didi, ǁîdi ǀkhan ge ti ǁaesa ǃhō tsî ǀkharib ân ǃoagu kaikaisende.

⁹ǁNā-amaga, tita a ûitsama ǃkhais ao, tib ǃKhūb ǂnubidi diba ra mî, Israeli di Eloba, Moab ge ǂanǂansase Sodoms khami nîra ī, tsî Amonni ôana Gomoras khami ǁkhūxa ǃû-ais tsî ǂōǂgâs, tsî hîǀhuru-aise ǀamosib kōse. ǃGau gen ti ǁaes din ge ǁîna nîra ǀâǀhana; tsî ǃgau gen ti ǁaes din ge ǁîna ǀumise nîra ūhâ.

¹⁰ǁÎ xūnan ge ǃgurib ân ǃaroma ge hāǂamhe; ǁîn ge gere ǃhō, tsî gere kaikaisen, ǁaes ǂnubidi di ǃKhūb dis ǃoagu xui-ao.

¹¹ǃAoǃaosaseb ge ǃKhūba ǁîna nîra ība, ǁîb ge elogu ǃhūbaib digu hoaga nîra kā kai. O i ge mâ-i hoa-e ǁî-i di ǃkhaisa xu ǁîba nîra ǀgoreǀî, huri-am ǃhūgu di ǃhaodi hoade.

¹²ǁKhāti du ge sadu Etiopiaǁîdo, ti gôab di ǃgamsabese nîra ī.

¹³ǁÎb ge ǃommi âba ǁkhāti ǀapasǀî nîra ǀhōǂui, tsîb ge Asiriaba nîra hîkākā, tsî ǁîb ge Ninevesa ǃū-aisa ǃkhaise nîra ǂnûi, ǂnâsa tsî ǃgaroǃhūse.

¹⁴Tsî ǁîs ǁaegu di ge gūde nîra ǁgoe tsî, ǀgurun ǃaub din hoana. Kai-anis tsî ǃnoab on ge kapiteldi ân ai nîra hâǁgoa, dommi ge mûǂuidaos ǃnâ nîra ǁnae, hîǀhurus ge dā-aihaib ai nîra hâ, ǁîb ga sederhaiba ǀkhaiǀkhā kai ǃnubai.

¹⁵Nēs ge ǁnā ǃās, dâb xa ra urikhâis, sâusase ǁan hâs, ǂgaob âs ǃnâ: Tita ge ǁî ta, tsî ti oses ge ǀnîsa a ǀkhai ti ra mîsa. Matis kha ǁîsa ǃū-aisa ǃkhai kai tsî go ǀgurun di ǁgoeǃkhai kai! ǁÎsa ga ǃgû-īǀkhā-i hoa-i ge ǁîsa nî ǃhō, ǁî-i ge ǃommi â-e nîra ǁnapo.