Read Khoekhoegowab Sefanjab 3 Bible Online

Sefanjab 3 - Khoekhoegowab bible

Sefanjab 3

¹Tsûba ǁnā ǁgaisi tsî ǂnaoǂnaosen hâ tsî ǁgâiǀāxa ǃāsa!

²ǁÎs ge domma ǁnâu tama hâ, ǁîs ge ǂgōǀausa ǃkhōǃoa tama hâ. ǁÎs ge ǃKhūb ai ǂgomaiǂnûi tama hâ, ǁîs Elobas ge ǀgū tama hâ.

³ǁÎs gaosagu ge a ǃgui ra xam ǁaegub âs ǃnâ, ǁîs ǂhanuǂhanu-aogu ge ǃuiǂhiragu, ǂkhō-i xare-e ǁgoas ǃaroma ǃgau tamaga.

⁴ǁÎs kēbo-aogu ge a supuǂâixa; hoaragase îǂhôaoǃnâ aogu ge a ǁî. ǁÎs di pristergu ge ǃanuba ra ǀuriǀuri, ǁîgu ge ǂhanuba ra ǀgaidī.

⁵ǂHanu-ai ǃKhūb ge ǁîs ǃnâ hâ; ǁîb ge tsūdī tama hâ. Mâ ǁgoas hoasab ra ǂhanub âba ǃnâb ǃnâ mā, tātsēs tsîna ǀkhai tama, xawe ǂkhabab ge taosa a ǀū.

⁶Tita ge ǁaede ge ǃhomǂui; ǁîn di ǁhôadi ge hîǀhuruhe hâ. Tita ge ǃās tsî daogu âsa ge ǃū-aisa kai khoe-i xare-i ǁîga ǃgûǃganu tama hâs kōse. ǁÎn di ǃādi ge hîǀhuruhe hâ, khoe-i a ǀkhais kōse, ǁansabe-i xare-i a kās kōse.

⁷O ta ge tita ge mî: Titas ge ga ǃao, ǂgōǀausas ge ga ǃkhōǃoa, os ge oms âsa hîǀhurus xa hāǂamhe tide. Tita ge ǁîsa ôaǃnân hoan tawan ge amase khâi tsî ǁîn dīgu hoaga ge ǁgaoǁgao.

⁸ǁNâi tita ǃâu, tib ra ǃKhūba mî, tita nî ǁkhâuǁnâsa khâiba tsēs kōse, ti ǀgoraǃgâs a nē xuige, ǃhaode ta nî ǀhaoǀhaosa, gaoside ta nî ǀguiǀguisa, ti ǁgôasib hoab tsî ti ǁaib di ǀgamsib hoaba ta nî ǁîn ǂama ǁhōǂuise, nē ǃhūb hoaragab nî ǀaes ti ôasasib dis xa hapuhe xuige.

⁹ǁNāǃnubai ta ge tita ǂanǂansase ǁaede ǃanu amǁgauga nîra mā, hoatsaman nî ǃKhūb di ǀonsa ǂgaiǀîse, ǁîban nî ǀguiǃnâxasib ǀguib ǀkha ǃoabase.

¹⁰Etiopiab ǃāgu di nau ǃnaniga xun ge ti ǀgoreǀî-aona, ǀgôas ti ǀgaruǀgarusan disa ǁguibase nîra ūhāba te.

¹¹ǁNā tsēs ge sasa taotaohe tide sa dīgu, ǁîgas ge ti ǃoagu ǃûǂamgu hoagu ǂama: ǁNāǃnubai ta ge tita sa ǁaeguba xu nîra ūbē ǁnān, ǃguriǂâixana, tsîs ge ǃaruǀî ǃguriǃgurisen tide ti ǃanu ǃhommi ai.

¹²Tsî tita ge sa ǁaegub ǃnâ ǀkhomǀkhomsa tsî ǀgâsa ǁae-e nîra ǃgau kai, ǁîn ge ǃKhūb di ǀons ai nîra ǂgomaiǂnûi.

¹³ǃGau gen Israeli din ge ǂkhaba-i xare-e dī tide, tsî ǂhumi-i xare-e ǃhoa tide, tsî ams ân ǃnâ i ge gāxaǃnâ nam-i xare-e hōhe tide, xawen ge ǃû tsî nîra ǁgoe tsî khoe-i xare-i ge ǁîna ǃhuriǃhuri tide.

¹⁴Dâ ǁnâi, sas Sionni ôase; dâ sadu Israeli dido! ǃGâiaǂgao îs ǂgaob hoaba xu dâ, sas Jerusalems ôase!

¹⁵ǃKhūb ge sa ǀgoraǃgâde ge ūbē. ǁÎb ge khākhoen âsa ǀnapubē xuige. Gao-aob Israeli dib, ǃKhūb, ge sa ǁaegub ǃnâ hâ, os ge ǃaruǀî tsū-i xare-e ǃao tide.

¹⁶ǁNā tsēs ǁkhās ais ge Jerusalemsa nîra mîǀîhe: Tā ǃao Sionse; î kha sa ǃomkha tā ǃopo.

¹⁷ǃKhūb sa Elob ge sa ǁaegub ǃnâ ǁē-aob, ore ǁkhāb ase hâ. ǁÎb ge sa ǂama nîra ǃgâiaǂgao dâb ǀkha; ǁîb ge ǀnammi âb ǃnâ nîra ǃnō; ǁîb ge sa ǂama nîra dâ ǃgâiaǂgaob ǀkha.

¹⁸ǁNān, ǃoa hân dâǁâusa xu ǃnūse hân, ǁîna ta ge tita nîra ǀhaoǀhao, ǁîn ge a sa, ǃhōs ga ǃgomse ǁîn ai hâ xawe.

¹⁹Mû, tita ge ǁnātsē sa ǁgâiǀā-aon hoana nîra hîkākā; tsî tita ge ǁnān, ǀī rana nîra sâu tsî ǂhāǂuihe hâna nîra ǀhaoǀhao. Tsî tita ge ǁîna ǃkhōǀkhāse nîra mâi tsî ǀonse, ǁîn hoaraga ǃhūbaib ǃnâ ge taotaohe hâ ina ǃhūb hoab ǃnâ.

²⁰ǁNā ǁaeb ai ta ge tita sado nîra ūhā; tita sado nî ǀhaoǀhao ǁaeb ai, o ta ge sado ǂanǂansase ǀonse tsî ǃkhōǀkhāse nîra ǂnûi ǁaedi ǃhūbaib didi hoadi ǃnâ, tita ga sadu ǃkhōside sadu mûdi aiǃâ unu ǃnubai, tib ra ǃKhūba mî.