Read Khoekhoegowab Hagaib 1 Bible Online

Hagaib 1 - Khoekhoegowab bible

Hagaib 1

¹ǀGamǁî kurib gao-aob Dariub dib ǃnâ, ǃnaniǁî ǁkhâb ǃnâ, ǂguro tsēs ǁkhâb dis ais ge mîs ǃKhūb disa ge hā kēbo-aob Hagaib di ǃoabasa xu Serubabeli, Sealtieli ôab, Judab gaosab ǁga, tsî Josuab, Josadab ôab, ǀgapipristeri ǁga, mî rase:

²Nētib ra ǃKhūb ǂnubidi diba ǃhoa: Nē ǁaes ra mî: ǁAeb ge ganupe hā tama hâ ǃKhūb di ommi nî ǁîb ai ǂnubiheba.

³Os ge mîs ǃKhūb disa kēbo-aob Hagaib ǃoabasa xu ge hā, mî rase:

⁴Sadu di ǁaeba kha nēba, sadu nî ǃgūǂamhe hâ omdi ǃnâ ǁanna, nē ommi ǃū-aisase ǁgoe hîa?

⁵Tsî nēsi, nētib ra ǃKhūb ǂnubidi diba mî: ǂNûi sadu di ǂâisa sadu daogu ai.

⁶Sadu ge kaise ra tsoro, xawe du ge ǀorose ra ūǂgābasen. Sadu ge ra ǂû, xawe du ge ǁâ tama hâ. Sadu ge ra ā, xawe du ge ākhanu tama hâ. Sadu ge sarana ra ana, xawe du ge ǃnae tama hâ, tsî amǃnâ-e ra ǃkhōǃoa-i, ǁnā-i ge ǁî-i amǃnâ-e ǁhū hâ ǁhō-i ǃnâ ra ǃkhōǃoa.

⁷Nētib ra ǃKhūb ǂnubidi diba mî: ǂNûi sadu di ǂâisa sadu daogu ai.

⁸ǃApa ǃhommi ai î du haina ūhā, î du nē omma kuru, o ta ge tita ǁîb xa ǃgâibahe tsî nîra ǂkhaiǂkhaihe, tib ra ǃKhūba mî.

⁹Sadu ge ǂguina ra kōǂuibasen, xawe kō, sadu ge ǀorona ra hōbasen, tsî ǁîrona du ga ommi ǃnâ ūǂgâ xawe ta ge tita ǁîrona ra ǃgombē. Tarexasa? tib ra ǃKhūb ǂnubidi diba mî: Ti ommi ǃū-aisase ǁgoeb ǃaroma, tsî sadu mâ-i hoa-i âdo ǁî-i oms ǂhanisa ra ǃkhoebas ǃaroma.

¹⁰ǁNā-amaga gu ge ǀhomga sado xu ra ūdawasen, ǀau-i xare-i a ǀkhai tsî ǃhūb ra ǂûn âba ūdawasa.

¹¹Tita ge ǀkhuru-e ǃhūb ǂama ǂgai xui-ao tsî ǃhomgu ǂama, tsî ǃhorob ǂama, tsî ǂkhon ǂauxûib ǂama, tsî olib ǂama tsî ǃhūbaib nî ūǀkhīn hoan ǂama, ǁkhāti khoen ǂama tsî ǀgoan ǂama, tsî ǃomgu di sîsenni hoab ǂama.

¹²ǃNubain ge Serubabeli, Sealtieli ôab, tsî Josuab, Josadab ôab, ǀgapipristeri tsî ǃgau gen ǁaes din hoana dommi ǃKhūb, ǁîn Elob dib tsî mîdi kēbo-aob Hagaib dide ge ǃgâ, ǃKhūb ǁîn Elob ge ǁîba sî xase. Tsî ǁaes ge ais ǃKhūb disa ge ǃao.

¹³Ob ge Hagaib, ǃKhūb di sîsabeba, ǂhôas ǃKhūb dis ǃnâ ǁaes ǃoa ǃhoa tsî ge mî: Tita ge sadu ǀkha hâ, tib ra ǃKhūba mî.

¹⁴Tsî ǃKhūb ge gagas Serubabeli, Sealtieli ôab, Judab gaosab dis, tsî gagas Josuab, Josadab ôab, ǀgapipristeri dis, tsî gagas ǃgau gen ǁaes din hoan disa ge ǂkhaiǂkhaikhâi, on ge hā tsî sîsenni ǃKhūb ǂnubidi dib, ǁîn Elob ommi diba gere dī.