Read Khoekhoegowab Hagaib 2 Bible Online

Hagaib 2 - Khoekhoegowab bible

Hagaib 2

¹ǀGamdisihakaǀaǁî tsēs ǁkhâb dis ai, ǃnaniǁî ǁkhâb ǃnâ, ǀgamǁî kurib gao-aob Dariub dib ǃnâ.

²Hûǁî ǁkhâb di ǀgamdisiǀguiǀaǁî tsēs ais ge mîs ǃKhūb disa kēbo-aob Hagaib di ǃoabasa xu hā tsî ge mî:

³ǃHoa, Serubabeli, Sealtieli ôab, Judab gao-aob ǃoa tsî Josuab, Josadab ôab, ǀgapipristeri ǃoa tsî ǃgau gen ǁaes din ǃoa, mî rase:

⁴Tari-e sadu ǃnâ ǃgau hâ, nē omma ǂguro ǂkhaisib âb ǃnâ ge mû-e? Tsî mati du ǁîba nēsi ra mû? Nēba xū tamaseb ī tama hâ sadu mûǁae?

⁵Xawe nēsi ǀgai, sats Serubabeltse, tib ra ǃKhūba mî, îts ǀgai, sats Josuats, Josadab ôats, ǀgapipristertse, îs ǀgai, sas ǁaes ǃhūb dise, tib ra ǃKhūba mî, î du sîsen, tita sadu ǀkha hâ xuige, tib ra ǃKhūb ǂnubidi diba mî.

⁶ǁNā mîs, tita ge sadu ǀkha Egipteba xu du ge doeǂoa ǃnubai ǃgaeǀhaose dīs, tsî ti Gagab ge sadu ǃnâ hâ; tā ǃao.

⁷Nētib ra ǃKhūb ǂnubidi diba mî xuige: ǁKhawa ǀgui ǃnās ǀguis, ǂkhari ǁaero-i ǀgui-i, o ta ge tita ǀhommi tsî ǃhūbaib tsî hurib tsî ǂnâsa ǃhūb tsîga nîra ǀkhū kai.

⁸Tita ge ǃhaodi hoade nîra ǀkhū kai, ob ge ǃkhūsib ǃhaodi hoadi diba nîra hā, tsî tita ge nē omma ǂkhaisib ǀkha nîra ǀoaǀoa, tib ra ǃKhūb ǂnubidi diba mî.

⁹Tib ge ǀhaiǀuriba, tsî tib ge ǃhuniǃhuriba, tib ra ǃKhūb ǂnubidi diba mî.

¹⁰ǂKhaisib nē ommi dib ge ǂguro ommi dib ǃgâ-ai nîra kai, tib ra ǃKhūb ǂnubidi diba mî, tsî nē ǃās ǃnâ ta ge tita ǂkhîba nîra mā, tib ra ǃKhūb ǂnubidi diba mî.

¹¹ǀGamdisihakaǀaǁî tsēs khoeseǁî ǁkhâb dis ai, ǀgamǁî kurib Dariub dib ǃnâs ge mîs ǃKhūb disa kēbo-aob Hagaib di ǃoabasa xu hā tsî ge mî:

¹²Nētib ra ǃKhūb ǂnubidi diba mî: Pristerga ǀnai dîǃgâ ǂhanub xa îts mî:

¹³Kō, khoe-i ga ǃanu ǁgan-e ǀams ǁî-i sarab dis ǃnâ tanio, tsî i ga ǀams â-i ǀkha pereb kas, sâihe hâ ǂûn kas, ǂauxûib kas, olib kas, ǀnî ǂû-ai-i hoa-i kas hoasa tsâǀkhāo, xare ǃanu i nî ǁî-e? O gu ge pristerga ǃeream tsî: Hî-î, ti ge mî.

¹⁴Ob ge Hagaiba ge mî: Khoe-i ǁō hâ soro-i xa a ǀurisa-i ga ǁnā xūn xa xū-e tsâǀkhāo, ǀurixa i nî ǁî-e? O gu ge pristerga ǃeream tsî: ǁÎ-i ge nî ǀurixa, ti ge mî.

¹⁵Ob ge Hagaiba ǃeream tsî ge mî: ǁNās ǁkhās xases ge nē ǁaesa ī, tsî ǁnās ǁkhās xases ge nē ǃhaosa ī ti ais aiǃâ, tib ra ǃKhūba mî. Tsî ǁnās ǁkhās xaseb ge sîsenni ǁîn ǃomgu dib hoaba ī, tsî ǁîn ra ǁnāpa ǁguiban ge a ǀurixa.

¹⁶Î du ǁnâi nēsi sadu di ǂgaoba ǁî ǃkhais ai ǂnûi, nē tsēsa xu tsî aiǃâb ǃoa ǀuis ra ǀuis ai ǁguihes aiǃâ ǃKhūb di tempeli tawa.

¹⁷ǁNā xūn ge īs aiǃâ i ge khoe-e ǃhoroǂguib ǀgamdisi ǀguirode ūhâb tawa sīo, o di ge disidi ǀguide hâ, tsî dāǃnâǃoreb ǂauxûib dib tawa i ge sīo, korodisi ǀguirode i nî ǃoreb ǃnâ ǃkhāse, o di ge ǀgamdisidi ǀguide hâ.

¹⁸Tita ge sado khau hâ ǃhorob tsî ǂae ra ǀaub tsî ǃnareb tsîgu ǀkha ge ǂnau, sadu ǃomgu sîsenni hoaba, xawe sadu ge tita ǁga oa tama hâ, tib ra ǃKhūba mî.

¹⁹Î du ǁnâi sadu di ǂgaoba ǁî ǃkhais ai ǂnûi, nē tsēsa xu aiǃâb ǃoa, ǀgamdisihakaǀaǁî tsēs khoeseǁî ǁkhâb disa xu, î du ǃgaoǃgaob ǃKhūb di tempeli dib ga ǁîs ai ǁguihe tsēsa xu sadu di ǂgaoba ǁî ǃkhais ai ǂnûi.

²⁰ǃHoroba ganupe hâb a sâu-ommi ǃnâ, ǀkherahais kas, ǂauxûiǂûhais kas, ǀnomahais kas, xranathais kas hoas ge ǂûtani tama hâ. ǁÎde ta ge tita nē tsēsa xu nîra ǀkhae.

²¹Tsî mîs ǃKhūb dis ge ǀgamdisihakaǀaǁî tsēs ǁkhâb dis ai ǀgamǁî ǃnāsa Hagaiba ge hāba, mî rase:

²²Serubabeli, Judab gaosab ǁga ǃhoa îts mî: Tita ge ǀhomgu tsî ǃhūbaib tsîga nîra gongon.

²³Tsî tita ge trons gaosidi disa nîra ǃkhomǃnâ tsî ǀgaib ǁaedi gaosidi diba nîra hîkākā; tsî tita ge kunis tsî ǁîs ai ǂnôana nîra hîkākā tsî hāgu tsî ǁîgu ai ǃgapi hâgu ge nîra ǁnā, nēba naub di gôaba xu.

²⁴ǁNātsē ta ge tita, tib ra ǃKhūb ǂnubidi diba mî, sats Serubabelts, Sealtieli ôats, ti ǃgātsa nîra ū, tib ra ǃKhūba mî, tsî tita ge satsa ǀkhunuǂnûidas ǂganǀgaiǀgais dise nîra ǂnûi, satsa ta tita ǃkhōǂuibasen hâ xui-ao, tib ra ǃKhūb ǂnubidi diba mî.