Read Khoekhoegowab Saxariab 1 Bible Online

Saxariab 1 - Khoekhoegowab bible

Saxariab 1

¹ǁKhaisaǁî ǁkhâb ǃnâ, ǀgamǁî kurib Dariub dib ǃnâs ge mîs ǃKhūb disa Saxariab, Berexjab ôab, Idob ôab, kēbo-aoba ge hāba, mî rase:

²ǃKhūb ge sadu îga kaise ge ǁaixaǂam,

³ǁnā-amaga ǁîna mîba: Nētib ra ǃKhūb ǂnubidi diba mî: Tita ǁga oa, tib ra ǃKhūb ǂnubidi diba mî, o ta ge tita sadu ǁga nî oa, tib ra ǃKhūb ǂnubidi diba mî.

⁴Tā sadu îgu khami ī, ǁîga gu aibekam kēbo-aoga gere ǂgaiǀîga, mî rase: Nētib ra ǃKhūb ǂnubidi diba mî: ǃHobasen du re sadu ǂkhaba daoga xu, tsî sadu ǂkhaba dīga xu; xawe gu ge ǁnâu tsî tita ǃgâ tama ge i, tib ra ǃKhūba mî.

⁵Sadu îga mapa gu hâ? Tsî kēbo-aoga kha ǀamosib kōse gu nî ûi?

⁶Xawe ti mîdi tsî ti ǂnûiǂgādi, ti ǃgāgu, kēbo-aoga ta ge tita mîmādi, ǁîdi xa saoǁaehe tama gu hâ sadu di îga? Oa rase gu ge: ǃKhūb ǂnubidi dib ge sidab nî dī-ūse ǂâi khami sida daogu ǃoa tsî sida dīgu ǃoa, ǁnās ǁkhās khamib ge ǁîba sida ge dī-ū ti mîs kōse.

⁷ǀGamdisihakaǀaǁî tsēs ai disiǀguiǀaǁî ǁkhâb ǃnâ, ǁkhâb Skebab ge a ǁî, ǀgamǁî kurib Dariub dib ǃnâs ge mîs ǃKhūb disa Saxariab, Berexjab ôab, Idob ôab, kēbo-aoba ge hāba, mî rase:

⁸Tita ge ge kō tsuxub ǃnâ tsî mû, khoeb ǀapa hāba ǃgapi hâb ge mirtehaidi ǃgoaǃnāb ǃnâ hâdi ǁaegu ge mâ i. Tsî ǁîb ǃgâb ai gu ge ǀapa tsî ǂgama tsî ǃuri hāga ge hâ i.

⁹O ta ge tita ge mî: Ti ǃKhūtse, tarena kha nēna? ǃNubaib ge ǀhomǃgāb tita ra ǃhoa-ūba: Tita ge nî ǁgau tsi, taren a ǃkhaisa, ti ge mî.

¹⁰ǃNubaib ge ǁnā aob, mirtehaidi ǁaegu mâba ǃeream tsî: Nēn ge ǁnān, ǃKhūb xa sîǂuihe hâna ǃhūbaiban nî ǃgûǃnâǃganuse, ti ge mî.

¹¹O gu ge ǁîga ǀhomǃgāb ǃKhūb dib, mirtehaidi ǁaegu mâba ǃeream tsî: Sige ge ǃhūbaiba ge ǃgûǃnâǃganu tsî mû, ǃhūbaib hoaragab ge ǂkhîse ǁgoe tsî a ǃnōsa, ti ge mî.

¹²ǃNubaib ge ǀhomǃgāb ǃKhūb diba ǃeream tsî ge mî: ǃKhūtse ǂnubidi ditse, matikōsets kha ǀkhom tide Jerusalems ǂama tsî ǃādi Judab didi, ǁîdi ǂamats ge ǁaixa hâ ide hûdisi kurigu kōse?

¹³Ob ge ǃKhūba ǁnā ǀhomǃgāb, tita ǀkha ra ǃhoaba ǃgâi mîdi, ǁkhaeǂgaoxa mîde ge ǃeream.

¹⁴Ob ge ǁnā ǀhomǃgāb tita ǀkha ra ǃhoaba tita ǃoa ge mî: ǂGaiǂui îts mî: Nētib ra ǃKhūb ǂnubidi diba mî: Tita ge kaise ra tau Jerusalems ǂama tsî Sionni ǂama.

¹⁵Tita ge ama kaise ge ǁaixa hâ i ǁnā sâsa ǃhaodi ǂama. Tita ge ǂkharirose ǀgui ge ǁaixa hâ i, xawe ǁîn ge ǂkhababǀî ge hui.

¹⁶ǁNā-amagab ra ǃKhūba nēti mî: Tita ge Jerusalems ǃoa ge oa ǀkhomxaǂgaosigu ǀkha, ti ommi ge ǁîs ǃnâ nîra ǂnubihe, tib ra ǃKhūb ǂnubidi diba mî, tsî ǀguiro-ūtsurib ge Jerusalems ǂama nîra ǂgaekhorahe.

¹⁷ǃAruǀî ǂgai îts mî: Nētib ra ǃKhūb ǂnubidi diba mî: Ti ǃādi ge gorose nîra hāǂamhe ǃgâib xa: ǃKhūb Sionna ganupe nîra ǁkhaeǂgao xui-ao tsî ǁîb ge Jerusalemsa ganupe nîra ǁhûiǂuibasen.

¹⁸Tsî tita ge kōkhâi tsî mû, haka ǁnâgu ge ti aiǃâ ge hâ i.

¹⁹O ta ge tita ǁnā ǀhomǃgāb, tita ra ǃhoa-ūb ǃoa: Tarega nēga? ti ge mî. Ob ge ǁîba tita ǁga ge mî: Nē gu ge ǁnā ǁnâgu, Judab, Israeli tsî Jerusalems tsîna ge ǀgaruǀgaruga.

²⁰Tsîb ge ǃKhūba haka ǀuriǂnau-aoga ge ǁgau te.

²¹O ta ge tita: Tare-e gu dīǃgû hâ? ti ge mî. Ob ge ǁîba ǃeream te tsî ge mî: Nēgu ge ǁnā ǁnâgu, Judaba ge ǀgaruǀgaruga, khoe-i xare-i ge danas âba ūkhâi tama is kōse, xawe nēgu ge go hā, nauga gu nî ǃhuriǃhurise, ǁnâgu ǃhaodi diga gu nî aoǁguise, ǁnāgu, ǁnâga Judab ǃhūb ǃoagu ge ūkhâiga, ǁîba gu nî ǀgaruǀgaruse.